ଦାରିଙ୍ଗବାଡ଼ି/ସୋରଡ଼ା,୧୩ା୯(ଅରୁଣ ସାହୁ/ରଜନୀ ମହାପାତ୍ର): ଗୋପାଳପୁରଠାରୁ ରାଇପୁରକୁ ସଂଯୋଗ କରୁଥିବା ୫୯ ନଂ ଜାତୀୟ ରାଜପଥର ଗାଜଲବାଡ଼ି ଘାଟିରେ ବାରମ୍ବାର ଦୁର୍ଘଟଣା ଘଟୁଛି। ଗୋଟିଏ ସପ୍ତାହରେ ୨ଟି ଘଟଣା ଘଟିଥିବା ଏବେ ଜାତୀୟ ରାଜପଥ ବିଭାଗର ଭାରୀଯାନ କଟକଣା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରକାଶ ଯେ, ଏକ କଣ୍ଟେନର ଦିଲ୍ଲୀରୁ କଳାହାଣ୍ଡି ଜିଲା ଭବାନୀପାଟଣା ଦେଇ ଉକ୍ତ ରାଜପଥରେ ବାଲିଗୁଡା, ଦାରିଙ୍ଗବାଡ଼ି ଦେଇ ବ୍ରହ୍ମପୁର ଅଭିମୁଖେ ଯାଉଥିଲା। ତେବେ ଉକ୍ତ ଅଣଓସାରିଆ ଘାଟି ରାସ୍ତାର ୧୩ନଂ ବୁଲାଣି ରାସ୍ତାରେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। କଣ୍ଟେନର ଭିତରେ ରହିଥିବା ଚାଳକଙ୍କ ସମେତ ଅନ୍ୟମାନେ ସୁରକ୍ଷିତ ରହିଥିବା ଓ ଉକ୍ତ ଘାଟିରେ ଯାତାୟାତ କରୁଥିବା ଯାତ୍ରୀ ତାଙ୍କୁ ଉଦ୍ଧାର କରି ସୋରଡ଼ା ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ପଠାଇଥିବା କୁହାଯାଇଛି।
ସୂଚନାଯୋଗ୍ୟ, ଉକ୍ତ ରାଜପଥର ଘାଟି ରାସ୍ତା ସମ୍ପ୍ରସାରଣ ପାଇଁ ୭ ଶହ ୪୨ କୋଟି ଟଙ୍କା ଅନୁଦାନ ରହିଛି। ଫରେଷ୍ଟ କ୍ଲିୟରାନ୍ସ ସରିଛି କିନ୍ତୁ ଟେଣ୍ଡର ହୋଇ ନ ଥିବା ଓ ସମ୍ପ୍ରସାରଣ ବିଳମ୍ବ ଯୋଗୁ ଦୁର୍ଘଟଣା ବାରମ୍ବାର ଘଟୁଛି। ବିଶେଷକରି ଗୁଗଲ ମ୍ୟାପ୍ରେ ଉକ୍ତ ରାଜପଥ ଦେଖାଉଥିବାରୁ ମ୍ୟାପ୍ ଦେଖି ଆସି ଅନେକ ଗାଡ଼ି ବୁଲାଣିରେ ବୁଲାଇ ନ ପାରି ଫସି ରହୁଥିବା ବେଳେ ଦୁର୍ଘଟଣା ମଧ୍ୟ ବୃଦ୍ଧି ପାଉଛି। ଜାତୀୟ ରାଜପଥ ବିଭାଗ ଉକ୍ତ ଘାଟିରାସ୍ତା ଆରମ୍ଭ ଓ ଶେଷରେ ୨ଟି ବଡ଼ ବଡ଼ ହୋର୍ଡିଂ ଲଗାଇ ଭାରୀଯାନ ଉକ୍ତ ଘାଟିରେ ଯାତାୟାତ ପାଇଁ ବାରଣ କରିଥିଲେ ମଧ୍ୟ ଅମାନିଆ ଗାଡ଼ିଚାଳକ ଭାରୀଯାନ ନେଇ ଯାତାୟାତ କରୁଛନ୍ତି। ଫଳରେ ଏଭଳି ଘଟଣା ଏବେ ଉକ୍ତ ଘାଟିରେ ନିୟମିତ ଘଟୁଥିବା ଦେଖିବାକୁ ମିଳୁଛି।
