ଚେନ୍ନାଇ,୩।୧୨ : ଅଣ ସରକାରୀ ସଂଗଠନ ଅରାପ୍ପୋର ଇକ୍କମ ପକ୍ଷରୁ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଏ.କେ. ପଲାନିସାମୀଙ୍କ ବିରୋଧ ସର୍ବସାଧାରଣରେ ଦିଆଯାଉଥିବା ମନ୍ତବ୍ୟ ଉପରେ ମାଡ୍ରାସ ହାଇକୋର୍ଟ ରୋକ ଲଗାଇଛନ୍ତି। ବିଚାରପତି କୃଷ୍ଣନ ରାମାସ୍ବାମୀଙ୍କ ନେତୃତ୍ୱରେ ଗଠିତ ଖଣ୍ଡପୀଠ ପଲାନିସାମୀଙ୍କ ସପକ୍ଷରେ ରାୟ ଦେଇ ଅସ୍ଥାୟୀ ଭାବେ ନିଷେଧାଜ୍ଞା ଜାରି କରିଛନ୍ତି। ଖଣ୍ଠପୀଠ କହିଛନ୍ତି ଯେ,ଭାରତୀୟ ସମ୍ବିଧାନ ସମସ୍ତଙ୍କୁ ବାକ୍ ସ୍ବାଧୀନତା ପ୍ରଦାନ କରିଛନ୍ତି। ତେବେ ଏହାର ଅର୍ଥ ନୁହେଁ ଯେ, ଅନ୍ୟଙ୍କ ବିରୋଧରେ ଆପତ୍ତି ଜନକ ମନ୍ତବ୍ୟ ପ୍ରଦାନ କରି କାହାକୁ ବଦନାମ କରିବା। ଏଭଳି ଅଧିକାର ସମ୍ବିଧାନ କାହାକୁ ଦେଇନାହିଁ।
ମୁକ୍ତ ଭାଷଣର ଅଧିକାର ଅନ୍ୟକୁ ବଦନାମ କରିବା ପାଇଁ ପ୍ରଦାନ କରାଯାଇ ନାହିଁ। ଅନ୍ୟ କାହାର ସ୍ବତନ୍ତ୍ରତାରେ ହସ୍ତକ୍ଷେପ କରିବା ଆଇନ ଅନୁଯାୟୀ ଦୋଷାବହ। ପ୍ରତି ବ୍ୟକ୍ତିଙ୍କର ପ୍ରତିଷ୍ଠା, ସମ୍ମାନର ସହିତ ବଞ୍ଚିବାର ଅଧିକାର ରହିଛି। ଲୋକତାନ୍ତ୍ରିକ ବ୍ୟବସ୍ଥାରେ କାହାର ଅନ୍ୟ କାହାର ପ୍ରତିଷ୍ଠା ଏବଂ ମାନ ସମ୍ମାନରେ ଆଞ୍ଚ୍ ଆଣିବାର ଅଧିକାର ନାହିଁ ବୋଲି ଖଣ୍ଡପୀଠ କହିଛନ୍ତି।
