କଟକ ଅଫିସ,୨ା୬: ଅନ୍ଲାଇନ୍ ମାଧ୍ୟମରେ କିଣା ଯାଇଥିବା ୧୩୧୯ ଟଙ୍କାର ଏକ ଜୋତା ପାଇଁ କମ୍ପାନୀକୁ ୬୦ ହଜାର ଟଙ୍କା ଜରିମାନା ଦେବାକୁ କଟକ ଖାଉଟି ଅଦାଲତ ନିର୍ଦ୍ଦେଶ ଦେଇଛନ୍ତି। ଏଥିସହ ଜୋତାର କିଣାମୂଲ୍ୟ ୧୩୧୯ ଟଙ୍କା ମିଶି ମୋଟ ୬୧,୩୧୯ ଟଙ୍କା ଆବେଦନକାରୀଙ୍କୁ ୩୦ ଦିନ ମଧ୍ୟରେ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି। ମାମଲାର ବିବରଣୀରୁ ପ୍ରକାଶ, ବାଦାମବାଡ଼ି ଥାନା ଅଞ୍ଚଳର ଦୀପକ ରଞ୍ଜନ ଷଡ଼ଙ୍ଗୀ ନାମକ ବ୍ୟକ୍ତି ଅନ୍ଲାଇନ୍ରେ ଏକ ଜୋତା ୧୩୧୯ ଟଙ୍କା ପଇଠ କରି ମଗାଇଥିଲେ। ହେଲେ ଜୋତା ପାଇବା ପରେ ତାହା ସେ ଅର୍ଡର କରିଥିବା କମ୍ପାନୀର ନୁହେଁ ବୋଲି ଜାଣିବାକୁ ପାଇଥିଲେ। ଏନେଇ ସେ ଉକ୍ତ କମ୍ପାନୀ ନିକଟରେ ଇମେଲ ଯୋଗେ ଅନେକ ଥର ଅଭିଯୋଗ କରିଥିଲେ ସୁଦ୍ଧା ସୁଫଳ ମିଳି ନ ଥିଲା। ପରେ ସେ ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ। ଖାଉଟି ଅଦାଲତର ସଭାପତି ଦେବାଶିଷ ନାୟକ ଓ ସଦସ୍ୟ ଶିବାନନ୍ଦ ମହାନ୍ତି ମାମଲାର ବିଚାର କରି ରାୟ ଶୁଣାଇଥିଲେ।
