ବ୍ରହ୍ମପୁର ଅଫିସ,୪।୩: କୋଭିଡ୍-୧୯ ମହାମାରୀ ବେଳେ ବ୍ରହ୍ମପୁର ସହରରେ ଲକ୍ଡାଉନ୍, ଶଟଡାଉନ୍ ଓ ରାତ୍ରିକାଳୀନ କର୍ଫ୍ୟୁ ହୋଇଥିଲା। ସେହି ସମୟରେ କଣ୍ଟେନମେଣ୍ଟ ଜୋନ୍ ପାଇଁ ବ୍ୟାରିକେଡ୍ କରାଯିବା ଏବଂ ଗୋରୁ, ଷଣ୍ଢ, ବୁଲାକୁକୁର ଓ ଅନ୍ୟ ଜୀବଜନ୍ତୁଙ୍କୁ ଖାଦ୍ୟ ଦେବା ଲାଗି ସରକାରଙ୍କ ପକ୍ଷରୁ ବ୍ରହ୍ମପୁର ମହାନଗର ନିଗମକୁ ବିପୁଳ ପରିମାଣର ସ୍ବତନ୍ତ୍ର ଅନୁଦାନ ମଞ୍ଜୁର ହୋଇଥିଲା। ହେଲେ ଖର୍ଚ୍ଚର ହିସାବରେ ତାଳମେଳ ରହୁ ନ ଥିବାରୁ ଜାଲିଆତି କରାଯାଇଥିବା ବରିଷ୍ଠ ଆଇନଜୀବୀ ତଥା ଗଞ୍ଜାମ ଓକିଲ ସଂଘ ପ୍ରାକ୍ତନ ସମ୍ପାଦକ ପୀତବାସ ପଣ୍ଡା ବୁଧବାର ଅଭିଯୋଗ କରିଛନ୍ତି। ଏହାର ଉଚ୍ଚସ୍ତରୀୟ ବା ଭିଜିଲାନ୍ସ ତଦନ୍ତ ଓ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି। ନ ହେଲେ ଏହାର ପ୍ରତିବାଦରେ ସଚେତନ ଲୋକଙ୍କୁ ମେଳି କରି ଆନ୍ଦୋଳନ ସୂତ୍ରପାତ କରାଯିବାକୁ ଚେତାବନୀ ଦେଇଛନ୍ତି। ଧରିତ୍ରୀକୁ ପଣ୍ଡା କହିଛନ୍ତି, ଉପରୋକ୍ତ ବିଷୟ ନେଇ ସୂଚନା ଅଧିକାର ଆଇନ ବଳରେ ସେ ସମ୍ପୂର୍ଣ୍ଣ ତଥ୍ୟ ମାଗିଥିଲେ। ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ତାଙ୍କୁ ଯେଉଁ ତଥ୍ୟ ମିଳିଛି ତାହା ବିଭ୍ରାନ୍ତିକର। ଗୋରୁଗାଈ, ଷଣ୍ଢ, ପଶୁପକ୍ଷୀଙ୍କୁ ଖାଦ୍ୟ ଯୋଗାଣ ଲାଗି ନିଗମକୁ ସରକାର ୭ ଲକ୍ଷ ୨୦ ହଜାର ଟଙ୍କା ଅନୁଦାନ ଦେଇଥିଲେ। ଦୈନିକ ୧୦ ହଜାର ଟଙ୍କା ଖର୍ଚ୍ଚ କରି ରନ୍ଧାଖାଦ୍ୟ ବଣ୍ଟନ ପାଇଁ ନିର୍ଦ୍ଦେଶ ରହିଥିଲା। ୩୩ ଦିନ ଖାଦ୍ୟ ଯୋଗାଇବାକୁ ଅବଧି ରଖାଯାଇଥିଲା। ସୁମଙ୍ଗଲମ୍ ନାମକ ଲକ୍ ହୋଟେଲକୁ ଦାୟିତ୍ୱ ଦିଆଯାଇଥିବା ତଥ୍ୟରେ କୁହାଯାଇଛି। ସେହି ହୋଟେଲ ପ୍ରତିଦିନ ଏ ବାବଦରେ ୮ ହଜାର ଟଙ୍କା ଲେଖାଏ ନେଇଥିବା ବିଏମ୍ସି ଦର୍ଶାଇଛି। ୩୩ ଦିନରେ ୩ ଲକ୍ଷ ୨୧ ହଜାର ୩୧୫ ଟଙ୍କା ପୈଠ ହୋଇଛି। ପୀତବାସଙ୍କ କହିବା ପ୍ରକାରେ ଖାଦ୍ୟଯୋଗାଣ ପାଇଁ ସରକାରୀ ନିୟମାନୁସାରେ ଟେଣ୍ଡର କିିମ୍ବା ଜୀବଜନ୍ତୁଙ୍କୁ ବଣ୍ଟାଯିବାର ପ୍ରଚାର ଓ ପ୍ରସାର ହୋଇନଥିଲା। ଅପରପକ୍ଷରେ ଦୈନିକ ୮ ହଜାର ଟଙ୍କା ହିସାବରେ ୩୩ ଦିନର ବିଲ୍ ବାବଦରେ ୨ ଲକ୍ଷ ୬୪ ହଜାର ହେବା କଥା। କିନ୍ତୁ ୩ ଲକ୍ଷ ୨୧ ହଜାର ୩୧୫ ଟଙ୍କା ଦିଆଯାଇଥିବା ତଥ୍ୟରେ ଦର୍ଶାଯାଇଥିବାରୁ ହିସାବ ଗୋଳମାଳ ସହ ଜାଲିଆତି ହୋଇଥିବା ସନ୍ଦେହ ଘେରକୁ ଆସିଛି। ସେହିପରି ମହାନଗରର ୧୫ କଣ୍ଟେନ୍ମେଣ୍ଟ ଜୋନ୍ରେ ବାଉଁଶ ବ୍ୟାରିକେଡ୍ କରିବା ପାଇଁ ସରଧା ନାମକ ଏକ ଇଭେଣ୍ଟକୁ ଦାୟିତ୍ୱ ଦିଆଯାଇଥିଲା। ସେହି ସଂସ୍ଥା ଦୁଇ ପର୍ଯ୍ୟାୟରେ ୮ ଲକ୍ଷ ୪୨ ହଜାର ୬୦୧ ଟଙ୍କା ନେଇଥିବା ଆରଟିଆଇ ତଥ୍ୟରେ ବିଏମ୍ସି ପକ୍ଷରୁ କୁହାଯାଇଛି। ଆବଶ୍ୟକ ମୁତାବକ ବାଉଁଶ କିଣା ନ ଯାଇ ଭଡ଼ା ବାବଦରେ ବିପୁଳ ପରିମାଣର ଟଙ୍କା ଦିଆଯାଇଥିବାରୁ ଏହା ଅପବ୍ୟୟ ହୋଇଥିବା ପଣ୍ଡା ସୂଚାଇଛନ୍ତି। ତେଣୁ ଉପରୋକ୍ତ ଘଟଣାର ଭିଜିଲାନ୍ସ ତଦନ୍ତ କରାଗଲେ ଜାଲିଆତି ରହସ୍ୟ ପଦାକୁ ଆସିବ ବୋଲି ପଣ୍ଡା କହିଛନ୍ତି।