ଫିଲାଡେଲଫିଆ, ୫ା୭: ପେନାଲ୍ଟି କିକ୍ରୁ କିଲିଆନ ଏମ୍ବାପେଙ୍କ ଗୋଲ ବଳରେ ରବିବାର ଖେଳାଯାଇଥିବା ରାଉଣ୍ଡ ଅଫ୍-୧୬ ମ୍ୟାଚ୍ରେ ଫ୍ରାନ୍ସ ୧-୦ ଗୋଲରେ ପାରାଗୁଏକୁ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛି। ଏହି ଗୋଲ ସହ ଏମ୍ବାପେ ବିଶ୍ୱକପ୍ ଇତିହାସରେ ସର୍ବାଧିକ ୨୦ ଗୋଲ କରିଥିବା ଆର୍ଜେଣ୍ଟିନାର ଲିଓନେଲ ମେସିଙ୍କଠାରୁ ଗୋଟିଏ ଗୋଲ ପଛରେ ରହିଛନ୍ତି।
ଏଥିସହିତ ସେ ଟୁର୍ନାମେଣ୍ଟର ଗୋଲ୍ଡେନ ବୁଟ ରେସରେ ଆର୍ଜେଣ୍ଟିନାର ଲିଓନେଲ ମେସିଙ୍କ ସମକକ୍ଷ ହୋଇଛନ୍ତି। ଦୁହେଁ ଏପର୍ଯ୍ୟନ୍ତ ୭ଟି ଲେଖାଏ ଗୋଲ କରିଛନ୍ତି। ଏହି ରେସରେ ନରଓ୍ବେର ଏର୍ଲିଂ ହାଲାଣ୍ଡ ଓ ଇଂଲଣ୍ଡର ହାରୀ କେନ ମଧ୍ୟ ରହିଛନ୍ତି। ଉଭୟଙ୍କ ନାମରେ ୫ଟି ଲେଖାଏ ଗୋଲ ରହିଛି। ଫ୍ରାନ୍ସ ତା’ର କ୍ୱାର୍ଟର ଫାଇନାଲରେ ମରକ୍କୋକୁ ଭେଟିବ। ଏହି ଦଳ ଶନିବାର ତା’ର ପ୍ରି-କ୍ୱାର୍ଟର ଫାଇନାଲ ମ୍ୟାଚ୍ରେ ସହ ଆୟୋଜକ କାନାଡାକୁ ୩-୦ ଗୋଲରେ ହରାଇଥିଲା। ଗତ କାତାର ୨୦୨୨ ସଂସ୍କରଣରେ ମରକ୍କୋକୁ ସେମିଫାଇନାଲରେ ହରାଇ ଫ୍ରାନ୍ସ ଫାଇନାଲ ପହଞ୍ଚିଥିଲା।
୬୮,୩୨୪ ଦର୍ଶକଙ୍କ ଉପସ୍ଥିତିରେ ଫିଲାଡେଲଫିଆ ଷ୍ଟାଡିୟମରେ ଖେଳାଯାଇଥିବା ଏହି ଅତ୍ୟଧିକ ସଂଘର୍ଷପୂର୍ଣ୍ଣ ମ୍ୟାଚ୍ର ପ୍ରଥମାର୍ଦ୍ଧ ଗୋଲ ଶୂନ୍ୟ ରହିଥିଲା। ଦ୍ୱିତୀୟାର୍ଦ୍ଧର ୭୦ତମ ମିନିଟ୍ରେ ପାରାଗୁଏ ମିଡ୍ଫିଲ୍ଡର ଡିଏଗୋ ଗୋମେଜ ବକ୍ସ ମଧ୍ୟରେ ଡିଜାୟର ଡୋଙ୍କୁ ଟାକେଲ କରିଥିଲେ। ଏଥିଯୋଗୁ ଫ୍ରାନ୍ସକୁ ମିଳିଥିବା ପେନାଲ୍ଟି କିକ୍କୁ ଏମ୍ବାପେ ଗୋଲରେ ପରିଣତ କରିଥିଲେ। ଏହା ୧୯ ବିଶ୍ୱକପ୍ ମ୍ୟାଚ୍ରେ ଏମ୍ବାପେଙ୍କ ଲାଗି ୧୯ତମ ଗୋଲ ଥିଲା। ଏମ୍ବାପେ ପ୍ରଥମ ଖେଳାଳି ଭାବେ ୩ ବିଶ୍ୱକପ୍ର ୩ ନକ୍ଆଉଟ୍ ମ୍ୟାଚ୍ରେ ଗୋଲ କରିଛନ୍ତି। ମ୍ୟାଚ୍ରେ ପାରାଗୁଏ ଦଳର ଖେଳାଳିମାନେ ଅତ୍ୟଧିକ ଫିଜିକାଲ ଗେମ୍ ଖେଳିଥିଲେ। ଏଥିଯୋଗୁ ମ୍ୟାଚ୍ ସମାପ୍ତି ଲାଗି ହ୍ବିସିଲ ବାଜିବା ପରେ ଏମ୍ବାପେ ପାଖରେ ଥିବା ପାରାଗୁଏ ଗୋଲକିପର ଅର୍ଲାଣ୍ଡୋ ଗିଲ୍ଙ୍କ ସହ ହାତ ମିଳାଇ ନ ଥିଲେ।