ନୂଆଦିଲ୍ଲୀ,୧୨ା୨: ପୂର୍ୱତନ ସେନା ମୁଖ୍ୟ ଏମ୍.ଏମ୍. ନରଓ୍ୱଣେଙ୍କ ପୁସ୍ତକ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’କୁ ନେଇ ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ୍ ପେଙ୍ଗୁଇନ୍ ରାଣ୍ଡମ୍ ହାଉସ୍ ଇଣ୍ଡିଆକୁ ବୁଧବାର ନୋଟିସ ଜାରି କରିଛି। ଏହି ପୁସ୍ତକ ପ୍ରକାଶନ ପୂର୍ୱରୁ ଏହାର ପିଡିଏଫ୍ କିଭଳି ସୋସିଆଲ ମିଡିଆରେ ଲିକ୍ ହେଲା ସେନେଇ ନୋଟିସ ଜାରି କରାଯାଇଛି। ପ୍ରକାଶ ପାଇବା ପୂର୍ୱରୁ ନରଓ୍ୱେଣଙ୍କ ପୁସ୍ତକ ବିବାଦୀୟ ହୋଇପଡ଼ିବାରୁ ଗତ ସୋମବାର ଦିଲ୍ଲୀ ପୋଲିସ ଏତଲା ଦାଏର କରିଥିଲା। ସମ୍ପୃକ୍ତ ପୁସ୍ତକର ପ୍ରକାଶନ ଲାଗି ଆବଶ୍ୟକ ଅନୁମୋଦନ ଲୋଡ଼ାଯାଇଥିଲା ବେଳେ ଏହାପୂର୍ୱରୁ କେମିତି ସଫ୍ଟ କପି ସୋସିଆଲ ମିଡିଆରେ ପୋଷ୍ଟ କରାଗଲା ବୋଲି ଅଭିଯୋଗ ଆଣି ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ ଅନୁସନ୍ଧାନ ଆରମ୍ଭ କରିଛି। ମଙ୍ଗଳବାର ଏହି ପ୍ରସଙ୍ଗରେ ପେଙ୍ଗୁଇନ ଇଣ୍ଡିଆ ନିଜର ପ୍ରତିକ୍ରିୟା ରଖିଥିଲାବେଳେ ଜେନେରାଲ ନରଓ୍ୱେଣ ମଧ୍ୟ ଏହାକୁ ସମର୍ଥନ କରିଥିଲେ।
