ଦିନ ଥିଲା ମନର ଭାବକୁ ମଣିଷ ବିଭିନ୍ନ ପକ୍ଷୀର ପରକୁ ସ୍ୟାହୀରେ ବୁଡାଇ ଲେଖୁଥିଲା। ପରେ ଆସିଲା କଲମ ବା ଫାଉଣ୍ଟେନ ପେନ୍ର ଯୁଗ। ଯେଉଁଥିରେ ସ୍ୟାହୀ ସଞ୍ଚୟ କରି ରଖିବାର ବ୍ୟବସ୍ଥା ଥିଲା। ଲେଖିବାବେଳେ ସେହି ସ୍ୟାହୀ ନିବ ଦେଇ ବାହାରୁଥିଲା। ପରେ ଆସିଲା ବଲ୍ ପଏଣ୍ଟ ପେନ୍ର ଯୁଗ। ଏହାର ଚାହିଦା ଏତେ ରହିଲା ଯେ ଫାଉଣ୍ଟେନ ପେନ୍ର ଆଦର କମିଗଲା। ତେବେ ଏହାର ଚାହିଦା ଏବେ ବି ସମ୍ପୂର୍ଣ୍ଣଭାବେ କମିନି। ଆଜି ମଧ୍ୟ ଅନେକେ ସୁନ୍ଦର ହସ୍ତାକ୍ଷର ପାଇଁ ଏହାକୁ ବ୍ୟବହାର କରୁଛନ୍ତି। ହେଲେ ଜାଣନ୍ତି କି ଏହାକୁ କିଏ ପ୍ରଥମେ ତିଆରି କରିଥିଲେ? ପେତ୍ରାଚେ ପୋଏନରୁଙ୍କୁ ପ୍ରଥମ ଫାଉଣ୍ଟେନ ପେନ୍ର ଉଦ୍ଭାବକ କୁହାଯାଏ। ସେ ଏକ ହଂସର ବଡ଼ ପରକୁ ବ୍ୟବହାର କରି ଏହାକୁ ତିଆରି କରିଥିଲେ। ଯେଉଁଥିରେ ସ୍ୟାହୀ ଷ୍ଟୋର କରି ରଖିହେଉଥିଲା। ପରେ ରବର୍ଟ ଓ୍ବିଲିୟମ ଥମ୍ସନ୍ ୧୮୪୯ରେ ବି ଏକ ଫାଉଣ୍ଟେନ ପେନ୍ ଉଦ୍ଭାବନ କରିଥିଲେ, ଯାହା କିଛିଟା ଉନ୍ନତମାନର ଥିଲା।
ଭାରତରେ ଫାଉଣ୍ଟେନ ପେନ୍: ଭାରତରେ ୮୦-୯୦ ଦଶକରେ ଫାଉଣ୍ଟେନ ପେନ୍ ବେଶି ଲୋକପ୍ରିୟ ହେଇଥିଲା। ପିଲାଠାରୁ ବୟସ୍କ ସମସ୍ତେ ଏହାକୁ ବ୍ୟବହାର କରୁଥିଲେ। ତେବେ ସରକାରୀ ଭାବେ ୧୯୩୨ରେ ରତ୍ନମ୍ ପେନ୍ ଓ୍ବାର୍କସ୍ ଦ୍ୱାରା ନିର୍ମିତ ହୋଇଥିଲା ପ୍ରଥମ ଭାରତୀୟ ଫାଉଣ୍ଟେନ ପେନ୍। ଆଉ ସେହି ସ୍ବଦେଶୀ କଲମକୁ ୧୯୩୫ରେ ମହାତ୍ମା ଗାନ୍ଧୀଙ୍କୁ ପ୍ରଦାନ କରାଯାଇଥିଲା। ୮୦-୯୦ ଦଶକରେ କାନପୁର ସହର ଫାଉଣ୍ଟେନ ପେନ୍ ତିଆରି କରୁଥିବା ଅଗ୍ରଣୀ ସହରଭାବେ ପରିଚିତ ଥିଲା। ଏଠାରେ ୧୦ରୁ ଅଧିକ ଫାଉଣ୍ଟେନ ପେନ ଫ୍ୟାକ୍ଟରୀ ଥିଲା। ଏଠାରେ ନିର୍ମିତ ଫାଉଣ୍ଟେନ ପେନ୍ ସାରା ପୃଥିବୀରେ ପ୍ରସିଦ୍ଧ ଥିଲା। ଏବେ କାନପୁରରେ କେବଳ ‘କ୍ୟାନରାଇଟ୍’ ନାମକ କମ୍ପାନୀ ଫାଉଣ୍ଟେନ ପେନ୍ ତିଆରି କରୁଛି, ଯାହାକି ୧୯୮୬ରୁ ଫାଉଣ୍ଟେନ ପେନ୍ ତିଆରି କରି ଆସୁଛି। ୯୦ ଦଶକର ଶେଷଭାଗକୁ ଡଟ୍ ପେନ, ବଲ ପଏଣ୍ଟ ପେନ, ଜେଲ ପେନ୍, ରୋଲର୍ ପେନ୍ ଆସିଯିବା ଦ୍ୱାରା ଫାଉଣ୍ଟେନ ପେନ୍ର ବଜାର ଧରାଶାୟୀ ହେଇଗଲା। ହେଲେ ଏବେ ଦେଖିବାକୁ ମିଳୁଛି ପୁଣିଥରେ ଏହାର ଚାହିଦା ବଢୁଛି। ତେଣୁ ଭାରତ ସହିତ ୨୫ଟି ଦେଶରେ କାନପୁରର ଫାଉଣ୍ଟେନ ପେନ୍ ଓ ନିବ୍ର ଚାହିଦା ଜବରଦସ୍ତ ବଢିଛି। ପୃଥିବୀରେ ୪ଟି ଦେଶ ଫାଉଣ୍ଟେନ ପେନ ତିଆରି କରୁଛନ୍ତି। ସେ ହେଲା ଜର୍ମାନୀ, ଜାପାନ, ଚାଇନା ଓ ଭାରତ। ଜର୍ମାନୀ ଓ ଜାପାନରେ ନିର୍ମିତ ପେନ ବହୁତ ଦାମୀ ହୋଇଥାଏ। ଚାଇନାରେ ପ୍ରସ୍ତୁତ ଫାଉଣ୍ଟେନ ପେନ୍ର କ୍ୱାଲିଟି ଭଲ ନ ଥାଏ। ହେଲେ ଭାରତରେ ତିଆରି ଫାଉଣ୍ଟେନ ପେନ୍ର କ୍ୱାଲିଟି ଓ ଦାମ ଉଭୟ ଭଲ। ତେଣୁ ଭାରତୀୟ ଫାଉଣ୍ଟେନ ପେନ୍ର ଚାହିଦା ସାରା ପୃଥିବୀରେ ଅଛି। ତେବେ ଭାରତ ସମତେ ଅନ୍ୟ ଦେଶଗୁଡିକରେ ଫାଉଣ୍ଟେନ ପେନ୍ ଏବେ କେବଳ ସଉକଭାବେ ବ୍ୟବହାର କରାଯାଉଛି। ସୁନା ଓ ପ୍ଲାଟିନମ୍ ନିବ୍ ଥିବା ଫାଉଣ୍ଟେନ ପେନ୍କୁ ଅନେକେ ସଉକଭାବେ କିଣୁଛନ୍ତି।
