କେସିଙ୍ଗା, ୧୬।୧୦ (ତୁମେଶ୍ୱର ସାହୁ):କଳାହାଣ୍ଡି ଜିଲା କେସିଙ୍ଗାସ୍ଥିତ ଓଡ଼ିଶା ଅଗ୍ନିଶମ ସେବା କେନ୍ଦ୍ର ପରିସରରେ ନିର୍ମାଣାଧୀନ ଚାରି ମହଲା କୋଠା କାମ ମନ୍ଥର ଗତିରେ ଚାଲିଥିବା ଅଭିଯୋଗ ହୋଇଛି। ନିର୍ମାଣ କାର୍ଯ୍ୟରେ ନିମ୍ନମାନର ସାମଗ୍ରୀ ବ୍ୟବହାର ଏବଂ ନିୟମିତ ପାଣି ସିଞ୍ଚନ କରାଯାଉ ନଥିବା ନେଇ ମଧ୍ୟ ପ୍ରଶ୍ନ ଉଠିଛି। ଏପରିକି ନିର୍ମାଣସ୍ଥଳରେ ସୂଚନା ଫଳକ ନ ଥିବା ଅଭିଯୋଗ ହୋଇଛି।
୨୦୦୧ ମସିହା ଅକ୍ଟୋବର ୧୫ ତାରିଖରେ ସ୍ଥାପିତ ଏହି ଅଗ୍ନିଶମ କେନ୍ଦ୍ର ପରିସରରେ ଓଡ଼ିଶା ଷ୍ଟେଟ ପୋଲିସ ହାଉସିଂ ଆଣ୍ଡ ୱେଲଫେୟାର କର୍ପୋରେସନ ଲିମିଟେଡ, ଭୁବନେଶ୍ୱର ପକ୍ଷରୁ ଟେଣ୍ଡର ମାଧ୍ୟମରେ ଟିଟିଲାଗଡ଼ର ଜଣେ ଠିକାଦାରଙ୍କୁ ନିର୍ମାଣ ଦାୟିତ୍ୱ ଦିଆଯାଇଛି। ଅଗ୍ନିଶମ କର୍ମଚାରୀଙ୍କ ଆବାସିକ ସୁବିଧାର ଉନ୍ନତି ପାଇଁ ୧ କୋଟି ୨୦ ଲକ୍ଷ ଟଙ୍କା ବ୍ୟୟରେ ଚାରି ମହଲା କୋଠା ଏବଂ ୪୦ ଲକ୍ଷ ଟଙ୍କା ବ୍ୟୟରେ ପାଚେରି ନିର୍ମାଣ କରାଯାଉଛି।
ଅଗ୍ନିଶମ କର୍ମଚାରୀମାନେ ଖରାବର୍ଷାରେ ଜୀବନକୁ ବାଜି ଲଗାଇ ଲୋକଙ୍କୁ ଉଦ୍ଧାର କରିବା, ବନ୍ୟାଜଳରେ ବୁଡ଼ିଯାଉଥିବା ଲୋକଙ୍କୁ ବଞ୍ଚାଇବା ଏବଂ ରାସ୍ତାରେ ପଡ଼ିଥିବା ଗଛ କାଟି ଯାତାୟାତ ସୱାଭାବିକ କରିବା ଭଳି ବିପଦପୂର୍ଣ୍ଣ କାର୍ଯ୍ୟ କରୁଛନ୍ତି। ହେଲେ ସେମାନଙ୍କ ପାଇଁ ଉପଯୁକ୍ତ ଆବାସ, ପାନୀୟ ଜଳ ଓ ବିଦ୍ୟୁତ୍ ଭଳି ମୌଳିକ ସୁବିଧା ସୁନିଶ୍ଚିତ କରିବା ଦିଗରେ ଅବହେଳା ହେଉଥିବା ଅଭିଯୋଗ ହୋଇଛି।
ଅଭିଯୋଗ ଅନୁଯାୟୀ, ପୂର୍ବରୁ ନିର୍ମିତ କୋଠାଗୁଡ଼ିକର ରକ୍ଷଣାବେକ୍ଷଣ ଠିକ ଭାବେ ହୋଇନାହିଁ। କେତେକ କୋଠାର କବାଟ ଓ ଝରକା ଭାଙ୍ଗି ନଷ୍ଟ ହୋଇଥିବା ବେଳେ ତିନି ମହଲା କୋଠାରୁ ସିମେଣ୍ଟ ଖସୁଥିବା ଦେଖିବାକୁ ମିଳୁଛି। ଏହି ପରିସ୍ଥିତିରେ ନୂତନ କୋଠା ନିର୍ମାଣର ମାନକୁ ନେଇ ମଧ୍ୟ ଚିନ୍ତା ପ୍ରକାଶ ପାଇଛି।
କେସିଙ୍ଗା ଅଗ୍ନିଶମ କେନ୍ଦ୍ରର ଫାୟାର ଅଫିସର ଜେ. ଲାଲଜିଙ୍କ ଅଭିଯୋଗ ଅନୁସାରେ, ନୂତନ କୋଠାର ଫାଉଣ୍ଡେସନ କାମରେ ହାଲୁକା ରଡ ବ୍ୟବହାର କରାଯାଉଥିବା ସେ ଦେଖିଥିଲେ। ଏନେଇ ଠିକାଦାରଙ୍କ ସହ ତାଙ୍କର ଯୁକ୍ତିତର୍କ ହେବା ପରେ ଫାଉଣ୍ଡେସନ ଭାଙ୍ଗି ପୁନର୍ବାର କାମ ଆରମ୍ଭ କରାଯାଇଥିଲା। ପୁରୁଣା କୋଠାଗୁଡ଼ିକର କବାଟ ଓ ଝରକାର ଅବସ୍ଥା ସମ୍ପର୍କରେ ସେ ବିଭାଗୀୟ ଅଧିକାରୀଙ୍କୁ ଅଭିଯୋଗ କରିଥିବା ମଧ୍ୟ କହିଛନ୍ତି।
ଅନ୍ୟପକ୍ଷରେ, ବିଭାଗୀୟ ଜେଇ ବୁଦ୍ଧେଶ୍ୱର ମୁର୍ମୁଙ୍କୁ ଏ ସମ୍ପର୍କରେ ପଚରାଯିବାରୁ ସୂଚନା ଫଳକ ବିନା କାମ ଚାଲିଥିବା ଏବଂ ନିମ୍ନମାନର କାମ ଯୋଗୁଁ ଫାଉଣ୍ଡେସନ ଭାଙ୍ଗି ପୁଣି ନିର୍ମାଣ କରାଯାଇଥିବା ପ୍ରସଙ୍ଗରେ ସେ ସ୍ବୀକାର କରିଥିବା ଜଣାପଡ଼ିଛି। ପୁରୁଣା କୋଠାର ମରାମତି ପାଇଁ କୌଣସି କାମ ନଥିବା କହି ସେ ଏହି ଖବରକୁ ଖବରକାଗଜରେ ପ୍ରକାଶ କରିବାକୁ ମଧ୍ୟ କହିଥିବା ଅଭିଯୋଗ ହୋଇଛି।
ନିର୍ମାଣ କାମରେ ନିୟମିତ ପାଣି ସିଞ୍ଚନ କରାଯାଉ ନଥିବାରୁ ସିମେଣ୍ଟ ପଲସ୍ତରା ଖସିବାର ଆଶଙ୍କା ରହିଛି। ତେଣୁ ନିର୍ମାଣ କାର୍ଯ୍ୟର ଗୁଣବତ୍ତା ଯାଞ୍ଚ କରିବା ସହ କାମ ଶୀଘ୍ର ଓ ନିୟମ ଅନୁଯାୟୀ ଶେଷ କରିବା, ସୂଚନା ଫଳକ ଲଗାଇବା ଏବଂ ପୁରୁଣା କୋଠାଗୁଡ଼ିକର ଆବଶ୍ୟକ ମରାମତି କରିବାକୁ ସାଧାରଣରେ ଦାବି ହେଉଛି।