ବୋଲଗଡ଼,୨୨ା୫(ଡି.ଏନ୍.ଏ.): ଖାଦ୍ୟ ସୁରକ୍ଷା ଯୋଜନା ମାଧ୍ୟମରେ ଦିଆଯାଉଥିବା ଚାଉଳରେ ମିଶାଯାଉଛି ଫର୍ଟିଫାଏଡ ଚାଉଳ। ତେବେ ପ୍ରଶାସନର ସଚେତନତା ଅଭାବରୁ ହିତାଧିକାରୀମାନେ ଉକ୍ତ ଫର୍ଟିଫାଏଡ ଚାଉଳକୁ ପ୍ଲାଷ୍ଟିକ ଚାଉଳ ବୋଲି ସନ୍ଦେହ କରୁଛନ୍ତି। ବୋଲଗଡ଼ ବ୍ଲକ ଅନ୍ତର୍ଗତ ଡାବରଧୁଆପାଟଣା ଓ ଆଖପାଖ ପଞ୍ଚାୟତର କେତେଜଣ ହିତାଧିକାରୀ କଣ୍ଟ୍ରୋଲ ଚାଉଳରେ ପ୍ଲାଷ୍ଟିକ ଚାଉଳ ଥିବା ଅଭିଯୋଗ ଆଣିବା ସହ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେବେ ଏନେଇ ବ୍ଲକ ସାଧାରଣ ବଣ୍ଟନ ଅଧିକାରୀ ସାଗରିକା ମାହାଲି କହିଛନ୍ତି, ଏହା ପ୍ଲାଷ୍ଟିକ ନୁହେଁ, ଫର୍ଟିଫାଏଡ ଚାଉଳ। ପ୍ରତି କେଜିଏ ଚାଉଳରେ ଦଶ ଗ୍ରାମ ପୁଷ୍ଟିକର ଭିଟାମିନ ମିଶ୍ରଣ କରାଯାଇଛି। ସାଧାରଣ ଚାଉଳକୁ ମେଶିନ ମାଧ୍ୟମରେ ଗୁଣ୍ଡ କରି ସେଥିରେ ଲୌହସାର, ଫଲିକ ଏସିଡ୍ ଓ ଭିଟାମିନ ବି-୧୨ ଆଦି ବୈଜ୍ଞାନିକ ପଦ୍ଧତିରେ ମିଶାଯାଇଛି, ଯାହାକି ରକ୍ତହୀନତା ଓ ପୁଷ୍ଟିହୀନତା ଦୂର କରିବାରେ ସହାୟକ ହୁଏ। ସରକାର ବିଶ୍ୱ ସ୍ବାସ୍ଥ୍ୟ ସଙ୍ଗଠନ ପରାମର୍ଶରେ ଏହି ଫର୍ଟିଫାଏଡ ଚାଉଳ ଟେକ୍ନୋଲୋଜି ମାଧ୍ୟମରେ ପ୍ରସ୍ତୁତ କରି ବାଣ୍ଟୁଛନ୍ତି। ତେବେ ଏନେଇ ବ୍ୟାପକ ସଚେତନତା କାର୍ଯ୍ୟକ୍ରମ କରାନଯାଇ କେବଳ କେତେକ ବଣ୍ଟନ କେନ୍ଦ୍ରରେ ପ୍ରଚାରପତ୍ର ମାଧ୍ୟମରେ ସୂଚନା ପ୍ରଦାନ କରାଯାଇଥିବାରୁ ହିତାଧିକାରୀ ଜାଣି ନ ପାରି ଉକ୍ତ ଚାଉଳ ପ୍ଲାଷ୍ଟିକ ଚାଉଳ ବୋଲି ସନ୍ଦେହ କରୁଛନ୍ତି। ତେବେ ଏହି ଚାଉଳ ରନ୍ଧାଯାଇ ଅଙ୍ଗନଓ୍ବାଡି କେନ୍ଦ୍ର, ସ୍କୁଲରେ ମଧ୍ୟାହ୍ନଭୋଜନ ଓ ଆହାର କେନ୍ଦ୍ରରେ ଉପଲବ୍ଧ ହେଉଛି। ସଚେତନତା ଅଭାବରୁ କେତେଜଣ ହିତାଧିକାରୀ କଣ୍ଟ୍ରୋଲ ଚାଉଳରେ ପ୍ଲାଷ୍ଟିକ ଚାଉଳ ମିଶିଥିବା ସନ୍ଦେହ କରୁଛନ୍ତି ବୋଲି ମାହାଲି କହିଛନ୍ତି।
