ପ୍ରୟାଗରାଜ,୮।୧: ଉତ୍ତରପ୍ରଦେଶ ବିଧାନସଭାର ପୂର୍ବତନ ବାଚସ୍ପତି ତଥା ପଶ୍ଚିମବଙ୍ଗର ପୂର୍ବତନ ରାଜ୍ୟପାଳ କେଶରୀ ନାଥ ତ୍ରିପାଠୀଙ୍କ ୮୯ ବର୍ଷରେ ପରଲୋକ ଘଟିଛି। ଦୀର୍ଘଦିନ ଧରି ସେ ଅସୁସ୍ଥ ଥିବା ବେଳେ ଘରେ ତାଙ୍କର ଚିକିତ୍ସା କରାଯାଉଥିଲା। ସେଠାରେ ରବିବାର ସକାଳ ୫ଟାରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଅପରାହ୍ନ ୪ଟାରେ ପ୍ରୟାଗରାଜର ରସୁଲାବାଦ ଘାଟରେ ତାଙ୍କର ଅନ୍ତିମ ସଂସ୍କାର କରାଯିବ ବୋଲି ଜଣାପଡ଼ିଛି।
ତେବେ କେଶରୀ ନାଥ ୧୯୩୪ ନଭେମ୍ବର ୧୦ରେ ଜନ୍ମଗ୍ରହଣ କରିଥିଲେ। ତିନି ଥର ବିଧାନସଭା ବାଚସ୍ପତି ଥିଲେ। ଏହାଛଡ଼ା ଜୁଲାଇ ୨୦୧୪ରୁ ଜୁଲାଇ ୨୦୧୯ ଯାଏ ସେ ପଶ୍ଚିମବଙ୍ଗ ରାଜ୍ୟପାଳ ଭାବେ କାର୍ଯ୍ୟ କରିଥିଲେ। ଏହାଛଡ଼ା ତାଙ୍କ ପାଖରେ ବିହାର, ମେଘାଳୟ ଏବଂ ମିଜୋରାମ ରାଜ୍ୟପାଳଙ୍କ ଦାୟିତ୍ୱ ମଧ୍ୟ ଥିଲା। ଏବେ ତାଙ୍କ ଦେହାନ୍ତ ଖବର ଜଣାପଡ଼ିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଆରମ୍ଭ କରି ବହୁ ମାନ୍ୟଗଣ ବ୍ୟକ୍ତି ଶୋକବ୍ୟକ୍ତ କରିଛନ୍ତି।
