ମାଲେ,୨୬।୧୨: ମାଲଦ୍ୱୀପ କୋର୍ଟ ପୂର୍ବତନ ରାଷ୍ଟ୍ରପତି ଅବଦୁଲ୍ଲା ୟାମିନଙ୍କୁ ୧୧ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ୟାମିନ ଦୁର୍ନୀତି ଏବଂ ଅର୍ଥ ହେରଫେର ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ଏହି ଅଭିଯୋଗରେ କୋର୍ଟ ୟାମିନଙ୍କୁ ଦୋଷୀ ସାବ୍ୟସ୍ତ କରିବା ସହ ତାଙ୍କୁ ପାଞ୍ଚ ଲକ୍ଷ ଟଙ୍କା ଜୋରିମନା କରିଛନ୍ତି।
ସରକାରଙ୍କ ମାଲିକାନାରେ ଥିବା ଏକ ଦ୍ୱୀପ ଲିଜ ବଦଳରେ ୟାମିନ ଲାଞ୍ଚ ଗ୍ରହଣ କରିବାରେ ଦୋଷୀ ସାବ୍ୟସ୍ତ ହୋଇଥିଲେ। ୟାମିନ ୨୦୧୩ ରୁ ୨୦୧୮ ପର୍ଯ୍ୟନ୍ତ ମାଲଦ୍ୱୀପର ରାଷ୍ଟ୍ରପତି ଥିଲେ। ସେ ୨୦୧୮ରେ ନିର୍ବାଚନ ହାରିଥିଲେ। ତେବେ ୨୦୨୩ରେ ହେବାକୁ ଥିବା ନିର୍ବାଚନ ପାଇଁ ୟାମିନଙ୍କୁ ପ୍ରଗତିଶୀଳ ପାର୍ଟି ଅଫ ମାଲଦ୍ୱୀପ ପାଇଁ ରାଷ୍ଟ୍ରପତି ପ୍ରାର୍ଥୀ ଘୋଷିତ କରାଯାଇଥିଲା।
ପୂର୍ବରୁ ହୋଇଥିବା ଦୁର୍ନୀତି ମାମଲାରେ ତାଙ୍କୁ ୨୦୧୯ରେ ପାଞ୍ଚ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା। ୨୦୧୯ରେ ୧ ମିଲିୟନ ଡଲାର ଅର୍ଥ ହଡପ କରିଥିବାରୁ ତାଙ୍କୁ ୫ ମିଲିୟନ ଡଲାର ଜୋରିମନା କରାଯାଇଥିଲା। ଦୋଷୀ ସାବ୍ୟସ୍ତ ହେବା ପରେ, ୟାମିନଙ୍କୁ ୨୦୨୦ରେ ଗିରଫ କରାଯାଇଥିଲା ଏବଂ ମାସକ ପରେ ତାଙ୍କୁ ମୁକ୍ତ କରାଯାଇଥିଲା।
ତେବେ ଦୁଇ ବର୍ଷ ପରେ ସୁପ୍ରିମକୋର୍ଟ ଏହି ରାୟକୁ ଖାରଜ କରି କହିଛନ୍ତି, ପ୍ରମାଣରେ ତ୍ରୁଟି ରହିଛି ଏବଂ ବ୍ୟକ୍ତିଗତ ଲାଭ ପାଇଁ ୟାମିନ ସରକାରୀ ପାଣ୍ଠିରୁ ୧ ମିଲିୟନ ଡଲାର ଲୁଟି ନେଇଛନ୍ତି।
