ବର୍ଲିନ,୨୯ା୬(ଏପି): ସମଗ୍ର ୟୁରୋପ ମହାଦେଶ ବର୍ତ୍ତମାନ ଭୟଙ୍କର ଗ୍ରୀଷ୍ମ ପ୍ରବାହ ମଧ୍ୟରେ ସନ୍ତୁଳିତ ହେଉଛି। ପ୍ରବଳ ଗରମ ଯୋଗୁ ଗତ ବୁଧବାର, ଗୁରୁବାର, ଶୁକ୍ରବାର କେବଳ ଫ୍ରାନ୍ସରେ ପ୍ରାୟ ୪,୦୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ଦେଶର ଜାତୀୟ ଜନସ୍ବାସ୍ଥ୍ୟ ସଂସ୍ଥା ରବିବାର ସୂଚନା ଦେଇଛି। ଅନ୍ୟପଟେ ତାପମାତ୍ରା ବୃଦ୍ଧି ଯୋଗୁ ଜର୍ମାନୀର ଜଙ୍ଗଲଗୁଡ଼ିକରେ ଭୟାବହ ନିଆଁ ଲାଗିଥିବାବେଳେ ରାଜଧାନୀ ବର୍ଲିନରେ ଜନସାଧାରଣ ଓ ପର୍ଯ୍ୟଟକମାନଙ୍କୁ ପ୍ରବଳ ଗରମରୁ ରକ୍ଷା କରିବା ପାଇଁ ପୋଲିସ ପକ୍ଷରୁ ଜଳ କମାଣ ବ୍ୟବହାର କରାଯାଇଛି।
ଫ୍ରାନ୍ସର ଜାତୀୟ ଜନସ୍ବାସ୍ଥ୍ୟ ସଂସ୍ଥା ‘ପବ୍ଲିକ ହେଲ୍ଥ ଫ୍ରାନ୍ସ’ ପକ୍ଷରୁ ଜାରି ତଥ୍ୟ ଅନୁଯାୟୀ, ଗ୍ରୀଷ୍ମ ପ୍ରବାହ ପୂର୍ବରୁ ଏପ୍ରିଲ ଓ ମେ’ ମାସରେ ଦେଶରେ ଦୈନିକ ହାରାହାରି ୯୦୦ରୁ ୧,୦୦୦ ମୃତ୍ୟୁ ରେକର୍ଡ ହେଉଥିଲା। ମାତ୍ର ଗତ ବୁଧବାର ଦେଶର ତାପମାତ୍ରା ସର୍ବକାଳୀନ ରେକର୍ଡ ସ୍ତର ସ୍ପର୍ଶ କରିବା ପରେ ସେହି ଗୋଟିଏ ଦିନରେ ୧,୨୦୦ରୁ ଅଧିକ ଏବଂ ପରବର୍ତ୍ତୀ ଦୁଇ ଦିନରେ ଦୈନିକ ୧,୪୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଛି। ଏହି ତିନି ଦିନ ମଧ୍ୟରେ ପ୍ରାୟ ୧,୦୦୦ରୁ ଅଧିକ ଅତିରିକ୍ତ ଲୋକ ଗରମ ଯୋଗୁ ପ୍ରାଣ ହରାଇଛନ୍ତି। ମୃତକଙ୍କ ମଧ୍ୟରୁ ପ୍ରାୟ ୮୫ ପ୍ରତିଶତ ଲୋକ ୬୫ ବର୍ଷରୁ ଅଧିକ ବୟସ୍କ ବୋଲି ଜଣାପଡ଼ିଛି।
ପ୍ରବଳ ଗରମ ଯୋଗୁ ପୂର୍ବ ଜର୍ମାନୀର ଗୋହରିସହେଡ୍ ଏବଂ ଦକ୍ଷିଣ-ପଶ୍ଚିମ ଜର୍ମାନୀର ଟ୍ରାଇସେନ ସହର ନିକଟସ୍ଥ ବୃହତ୍ ଜଙ୍ଗଲଗୁଡ଼ିକରେ ନିଆଁ ଲାଗିଛି। ଏହି ଜଙ୍ଗଲଗୁଡ଼ିକ ମଧ୍ୟରେ ଦ୍ୱିତୀୟ ବିଶ୍ୱଯୁଦ୍ଧ ସମୟର ଅନେକ ଜୀବନ୍ତ ଗୋଳାବାରୁଦ ଓ ବିସ୍ଫୋରକ ଏବେ ବି ମାଟିତଳେ ପୋତି ହୋଇ ରହିଛି। ନିଆଁ ସଂସ୍ପର୍ଶରେ ଆସି ଏହି ବୋମାଗୁଡ଼ିକ ବିସ୍ଫୋରଣ ହେଉଥିବାରୁ ଅଗ୍ନିଶମ ବାହିନୀ ପାଇଁ କାର୍ଯ୍ୟ କରିବା ଅତ୍ୟନ୍ତ ବିପଜ୍ଜନକ ହୋଇପଡ଼ିଛି। ସ୍ଥିତିକୁ ସମୀକ୍ଷା କରିବା ପାଇଁ ସେନା ଓ ବୋମା ନିଷ୍କ୍ରିୟକାରୀ ଦଳର ସହାୟତା ନିଆଯାଇଛି।
ଅତ୍ୟଧିକ ଉତ୍ତାପ ଯୋଗୁ ଜର୍ମାନୀର ଅନେକ ଜାତୀୟ ରାଜପଥରେ କଂକ୍ରିଟ ପୃଷ୍ଠ ଫାଟି ନଷ୍ଟ ହୋଇଯାଇଛି। ଲାଇପଜିଗ୍ ସହରରେ ପ୍ରବଳ ଗରମ ଯୋଗୁ ପିଚୁ ଓ କଂକ୍ରିଟ ତରଳି ରେଳ ଧାରଣା ଏବଂ ସୁଇଚ୍ଗୁଡ଼ିକ ଜାମ ହୋଇଯାଇଛି, ଯାହା ଫଳରେ ସହରରେ ଟ୍ରାମ ଚଳାଚଳ ସମ୍ପୂର୍ଣ୍ଣ ବନ୍ଦ ରହିଛି। ଜାତୀୟ ରେଳ ଅପରେଟର ‘ଡଏଚ୍ ବାନ୍’ ପକ୍ଷରୁ ନାଗରିକମାନଙ୍କୁ ଜରୁରୀ ନ ଥିଲେ ଯାତ୍ରା ନ କରିବାକୁ ପରାମର୍ଶ ଦିଆଯାଇଛି। ସେହିଭଳି ଜର୍ମାନୀର ମୋକର୍ନ-ଡ୍ରେୱିଜ୍ରେ ଦିନର ତାପମାତ୍ରା ୪୧.୫ ଡିଗ୍ରୀ ସେଲସିୟସ ଏବଂ ରାତିର ସର୍ବନିମ୍ନ ତାପମାତ୍ରା ୨୯.୪ ଡିଗ୍ରୀ ସେଲସିୟସ ରେକର୍ଡ କରାଯାଇଛି, ଯାହା ଏକ ନୂଆ ମାଇଲଖୁଣ୍ଟ।
ୟୁରୋପର ବୈଜ୍ଞାନିକମାନଙ୍କ ସଂଗଠନ ‘ୱାଲର୍ଡ ୱେଦର ଆଟ୍ରିବ୍ୟୁଶନ’ ପକ୍ଷରୁ ପ୍ରକାଶିତ ଏକ ନୂତନ ଅଧ୍ୟୟନ ଅନୁଯାୟୀ, ମାନବକୃତ ଜଳବାୟୁ ପରିବର୍ତ୍ତନ ବିନା ଏଭଳି ଭୟଙ୍କର ଗ୍ରୀଷ୍ମ ପ୍ରବାହ ସମ୍ଭବ ନୁହେଁ। ଆଜକୁ ୫୦ ବର୍ଷ ପୂର୍ବେ ଏଭଳି ଗରମ ଅକଳ୍ପନୀୟ ଥିବାବେଳେ ବର୍ତ୍ତମାନ ଏହାର ଆଶଙ୍କା ୨୦୦ ଗୁଣ ଅଧିକ ବୃଦ୍ଧି ପାଇଛି। ଏହି ସମୟରେ ଦକ୍ଷିଣ-ପୂର୍ବ ୟୁରୋପର ଗ୍ରୀସ୍ରେ ସରକାରୀ ସ୍ତରରେ ‘ଜଙ୍ଗଲ ନିଆଁ ସତର୍କତା’ ଜାରି କରାଯାଇ ମହାକାଶ ପ୍ରଯୁକ୍ତିବିଦ୍ୟାର ସହାୟତା ନିଆଯାଉଥିବା ବେଳେ, ଉତ୍ତର ୟୁରୋପର ଡେନମାର୍କରେ ଗ୍ରୀଷ୍ମ ପ୍ରବାହ ପରେ ପ୍ରବଳ କାଳବୈଶାଖୀ ସହ ୧,୧୦୦ରୁ ଅଧିକ ବଜ୍ରପାତ ରେକର୍ଡ କରାଯାଇଛି।