ବଣାଇଁ,୧୨ା୬(ପ୍ରଦୀପ ତ୍ରିପାଠୀ): ରାଜାମୁଣ୍ଡା କୋଇଡା ୫୨୦ ନମ୍ବର ଜାତୀୟ ରାଜପଥର କେ. ବଲାଙ୍ଗ ଥାନା ନିକଟରେ ଗୁରୁବାର ରାତିରେ ହାଇଓ୍ବା ପଛରେ ଏକ ବୋଲେରୋ ପିଟି ହୋଇ ଦୁର୍ଘଟଣାଗ୍ରସ୍ତ ହେବାରୁ ଚାଳକ ଗୁରୁତର ହୋଇଥିବା ଜଣାପଡ଼ିଛି। ଚାଳକ ଜଣକ ବଣାଇଁ ଅଞ୍ଚଳର ବିଶାଲ ନାଏକ ( ରାଜା)ଓ ସେ ବଣାଇଁ ବନଖଣ୍ଡ କୋଇଡ଼ା ବନାଞ୍ଚଳରେ ଅସ୍ଥାୟୀ ସ୍କ୍ବାଡ୍ କର୍ମଚାରୀ ବୋଲି ଜଣାପଡ଼ିଛି।
କୋଇଡ଼ା ବନାଞ୍ଚଳରେ ସରକାରୀ କାର୍ଯ୍ୟ ନିମନ୍ତେ ନିୟୋଜିତ ଥିବା ଏକ ବୋଲେରୋ ନିଓ( ଓଡି ୧୪ ଏଏଫ ୭୬୨୭)କୁ ନେଇ ରେଞ୍ଜର ସ୍କ୍ବାଡ୍ କର୍ମଚାରୀ ବିଶାଳ ନାଏକ କୋଇଡ଼ା ରେଞ୍ଜ ରେ ଅସ୍ଥାୟୀ ଚାଳକ ଭାବେ କାର୍ଯ୍ୟ କରୁଥିବା ଯୁଗଳ କିଶୋର ବେହେରା ଓ ତାଙ୍କ ପତ୍ନୀଙ୍କୁ ଛାଡ଼ିବାକୁ ଦେବଗଡ଼ ଜିଲା ଗର୍ଣ୍ଣମ ଅଞ୍ଚଳକୁ ଯାଇଥିଲା। ଉଭୟଙ୍କୁ ସେଠାରେ ଛାଡ଼ି ବିଳମ୍ବିତ ରାତିରେ ଫେରୁଥିବା ସମୟରେ, ୫୨୦ ନମ୍ବର ଜାତୀୟ ରାଜପଥର କେ.ବଲାଙ୍ଗ ଥାନା ନିକଟରେ ରାସ୍ତାକଡ଼ରେ ଛିଡ଼ା ହୋଇଥିବା ଏକ ହାଇଓ୍ବା ପଛରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିଲା।
ତେବେ ପ୍ରଶ୍ନ ଉଠୁଛି ଯେ ଅସ୍ଥାୟୀ ଚାଳକଙ୍କ ପରିବାରକୁ ସରକାରୀ ଗାଡ଼ିରେ ଛାଡ଼ିବା କାହା ନିର୍ଦ୍ଦେଶ ଥିଲା। ଶୁଣାଶୁଣି କଥାରେ କୋଇଡ଼ା ବନାଞ୍ଚଳ ଅଧିକାରୀ କୁଆଡେ ଓଡ଼ିଶା ବିଧାନ ସଭାର ଉପବାଚସ୍ପତିଙ୍କ ନାଁରେ ଇନ୍ଦ୍ରଚନ୍ଦ୍ର ମାନୁନାହାନ୍ତି। ବେଆଇନ ଖଣି ଖନନ, ମାଫିଆଙ୍କୁ ସମର୍ଥନ ଇତ୍ୟାଦି ଅଭିଯୋଗ ସମ୍ପୃକ୍ତ ବନାଞ୍ଚଳ ଅଧିକାରୀଙ୍କ ବିରୋଧରେ ଥିବା ଓ ଏହା ଉପରେ ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ଆଞ୍ଚଳିକ ବନ ସଂରକ୍ଷକଙ୍କ ସୁପାରିସ ସତ୍ତ୍ୱେ ତାଙ୍କ ପଲିଟିକାଲ ସମର୍ଥନ ତାଙ୍କୁ ଛାୟା ପ୍ରଦାନ କରୁଛି ବୋଲି ସାଧାରଣରେ ଖୁଲମଖୁଲା ଅଭିଯୋଗ ହୋଇଛି। ଗତକାଲିର ଏହି ଦୁର୍ଘଟଣା ଖବର ପାଇ କେ. ବଲାଙ୍ଗ ପୋଲିସ ଘଟଣାସ୍ଥଳରେ ପହଞ୍ଚି ଗୁରୁତର ବେଆଇନ ଚାଳକ ଜଣକୁ ଉଦ୍ଧାର କରି ଚିକିତ୍ସା ନିମନ୍ତେ ଲହୁଣୀପଡ଼ା ଡାକ୍ତରଖାନାକୁ ପଠାଇଥିଲେ କିନ୍ତୁ ପ୍ରାଥମିକ ଚିକିତ୍ସା ପରେ ତାଙ୍କୁ ରାଉରକେଲା ସ୍ଥାନାନ୍ତରିତ କରାଯାଇଥିବା ଜଣାପଡ଼ିଛି। ଦୁର୍ଘଟଣାଗ୍ରସ୍ତ ବୋଲେରୋ ଜବତ କରି ପୋଲିସ ଅଧିକ ତଦନ୍ତ ଚଳାଇଛି। ବନ ବିଭାଗରେ ନିୟୋଜିତ ଥିବା ଅଧିକାଂଶ ଗାଡ଼ି ବିଭାଗୀୟ କର୍ମଚାରୀମାନେ ନିଜସ୍ବ କାମରେ ନିୟୋଜିତ କରୁଥିବା ନେଇ ବିଭିନ୍ନ ସମୟରେ ଉଠୁଥିବା ପ୍ରଶ୍ନର ଉତ୍ତର ଏହି ଦୁର୍ଘଟଣାରୁ ସ୍ପଷ୍ଟ ହୋଇଛି। ଏହି ଘଟଣାର ତଦନ୍ତ ପରେ ସତ୍ୟ ସାମ୍ନାକୁ ଆସିବ ବୋଲି ବୁଦ୍ଧିଜୀବୀମାନେ ଦାବି କରିଛନ୍ତି।
