କଟକ,୧୩।୧: ଝିଅମାନଙ୍କୁ ସେମାନଙ୍କ ଇଚ୍ଛା ବିରୋଧରେ ବିବାହ କରିବାକୁ ବାଧ୍ୟ କରୁଥିବା ମାତାପିତାଙ୍କୁ ସମାଲୋଚନା କରିଛନ୍ତି ଓଡ଼ିଶା ହାଇକୋର୍ଟ। କୋର୍ଟ କହିଛନ୍ତି,ଏପରି ମାମଲାରେ ସମ୍ମତି ସର୍ବୋପରି ଏବଂ ମାତାପିତା ଝିଅଙ୍କ ଇଚ୍ଛା ବିରୋଧରେ ନ ଯିବାକୁ ଆହ୍ବାନ ଦେଇଛନ୍ତି। ଜଣେ ୨୧ ବର୍ଷୀୟା ଯୁବତୀଙ୍କ ସ୍ବାଧୀନ ଭାବରେ ବଞ୍ଚିବାର ଅଧିକାରକୁ ସମର୍ଥନ କରି ଏହି ରାୟ ଆସିଛି। ମହିଳାଙ୍କ ପସନ୍ଦ ପିତାମାତା କିମ୍ବା ସାମାଜିକ ଚାପ ଉପରେ ପ୍ରାଧାନ୍ୟ ପାଇବା ଆବଶ୍ୟକ ବୋଲି ରାୟ ଦେଇଛନ୍ତି।
୬ ଅଗଷ୍ଟ, ୨୦୨୫ରେ ଝିଅ ନିଖୋଜ ଥିବା ଅଭିଯୋଗ ନେଇ ବାପାଙ୍କ ତରଫରୁ ଦାୟର ଏକ ହେବିୟସ କର୍ପସ ପିଟିସନ୍ର ଶୁଣାଣି କରି ହାଇକୋର୍ଟ ଏଭଳି ଉଲ୍ଲେଖ କରିଛନ୍ତି। ହାଇକୋର୍ଟ କହିଛନ୍ତି, ଯେତେବେଳେ ଜଣେ ଝିଅ ବିବାହ ପାଇଁ ପ୍ରସ୍ତୁତ ନଥାଏ, ବାହ୍ୟ ବଳ ପ୍ରୟୋଗ କରି ତାଙ୍କୁ ବାହାଦେବା ସୁସ୍ଥ ସମାଜ ପାଇଁ ଅନୁକୂଳ ନୁହେଁ। ଅଭିଭାବକମାନେ ନିଜ ନିଷ୍ପତ୍ତ ପିଲାମାନଙ୍କ ଉପରେ ଲଦି ଦେବାର ଭାବନା ବିରୋଧରେ ପ୍ରଶାସନ ସଚେତନ କରିବା ଆବଶ୍ୟକ। ପ୍ରାପ୍ତ ବୟସ୍କ ଝିଅର ନିଷ୍ପତ୍ତିକୁ ସମ୍ମାନ ଦେବା ଉପରେ ହାଇକୋର୍ଟ ଗୁରୁତ୍ୱାରୋପ କରିଛନ୍ତି।
ସମ୍ପୃକ୍ତ ଝିଅଙ୍କୁ ଜୋରଜବରଦସ୍ତ ବିବାହ ପରେ ସେ ସ୍ବେଚ୍ଛାକୃତ ଭାବରେ ଘର ଛାଡି ଦେଇଥିଲେ ଏବଂ ତାଙ୍କ ସ୍ବାମୀ କିମ୍ବା ମାତାପିତାଙ୍କ ସହିତ ରହିବାକୁ ଚାହୁଁ ନ ଥିଲେ। ୯ ଡିସେମ୍ବର, ୨୦୨୫ ରେ, କୋର୍ଟକୁ ଅବଗତ କରାଯାଇଥିଲା ଯେ, ପୋଲିସ ସମ୍ପୃକ୍ତ ଝିଅ ସହିତ ଯୋଗାଯୋଗ କରିଛି ଏବଂ ସେ କହିଛନ୍ତି, ସେ ଅନ୍ୟ ରାଜ୍ୟରେ ରହୁଛନ୍ତି ଏବଂ ଏକ ଘରୋଇ କମ୍ପାନୀରେ କାମ କରୁଛନ୍ତି। ତା’ପରେ କୋର୍ଟ ନିର୍ଦ୍ଦେଶ ଦେଇଥିଲେ ଯେ, ତାଙ୍କୁ ପୂର୍ଣ୍ଣ ସୁରକ୍ଷାରେ କୋର୍ଟରେ ହାଜର କରାଯିବ। ଜାନୁଆରୀ ୬ରେ ତାଙ୍କୁ କୋର୍ଟକୁ ଅଣାଯାଇଥିଲା। ମୁଖ୍ୟ ବିଚାରପତି ହରିଶ ଟଣ୍ଡନ ଏବଂ ବିଚାରପତି ଏମ ଏସ ରମଣଙ୍କ ଖଣ୍ଡପୀଠ ତାଙ୍କ ସହ ଆଲୋଚନା କରିଥିଲେ। ମାମଲାର ଶୁଣାଣି ସମୟରେ ସେ କହିଥିଲେ, ମୋତେ ବାଧ୍ୟତାମୂଳକ ଭାବେ ବିବାହ କରାଇଦିଆଯାଇଛି। ଫଳରେ ସେ ଘର ଛାଡି ପଳାଇଥିଲେ।
Dharitri – Odisha’s No.1 Odia Daily
