ଲେହ, ୧୪।୧୦: ପୂର୍ବ ଲଦାଖର ଏଲ୍ଏସିରେ ଗତ ୫୮ ବର୍ଷ ମଧ୍ୟରେ ପ୍ରଥମ ଥର ପାଇଁ ମାଇନସ୍ ତାପମାତ୍ରାରେ ଭାରତ ଏବଂ ଚାଇନା ମୁହାଁମୁହିଁ ସ୍ଥିତିରେ ରହିଛନ୍ତି। ଅକ୍ଟୋବର ନଭେମ୍ବରରେ ଏଠାକାର ତାପମାତ୍ରା ମାଇନସ୍ ୧୪ ଡିଗ୍ରୀ ପର୍ଯ୍ୟନ୍ତ ଖସି ଯାଇଥାଏ। ତେଣୁ ଏହି ମାସଗୁଡ଼ିକରେ ଦୁଇପକ୍ଷ ପଛକୁ ହଟି ଯାଇଥାନ୍ତି। ତେବେ ଚଳିତ ବର୍ଷ ଦୁିପକ୍ଷଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିବାରୁ ଉଭୟ ପକ୍ଷ ନିମ୍ନ ତାପମାତ୍ରାରେ ବି ପଛକୁ ହଟି ନାହାଁନ୍ତି। ୧୯୬୨ ଅକ୍ଟୋବର ୨୦ରେ ଚାଇନା ସୈନ୍ୟ ଭାରତ ଉପରେ ଆକ୍ରମଣ କରିଥିଲେ। ଏକ ମାସ ପରେ ୨୧ ନଭେମ୍ବରରେ ଚାଇନା ଏକ ତରଫା ଅସ୍ତ୍ରବିରତି ଘୋଷଣା କରିଥିଲା। ସେବେଠାରୁ ବର୍ତ୍ତମାନ ସୁଦ୍ଧା ଦୁଇ ପକ୍ଷ ଆଉ ମାଇନସ୍ ତାପମାତ୍ରାରେ ମୁହାଁମୁହି ହୋଇ ନ ଥିଲେ। ୫୮ ବର୍ଷ ତଳର ସୀମା ବିବାଦ ଏବେ ମଧ୍ୟ ଜାରି ରହିଥିବାରୁ ଉତ୍ତେଜନା ବଢ଼ିବାରେ ଲାଗିଛି। ଇତିମଧ୍ୟରେ ଦୁଇ ପକ୍ଷଙ୍କ ମଧ୍ୟରେ ୭ ଥର ଶାନ୍ତି ଆଲୋଚନା ହୋଇଥିଲେ ବି କୌଣସି ସୁଫଳ ମିଳି ପାରି ନାହିଁ।
