ଦେବଗଡ଼,୨୧।୭(ଶଶାଙ୍କଶେଖର ଝାଙ୍କର): ଆୟତନରେ ଦେବଗଡ଼ ଏକ ଛୋଟ ଜିଲା ହେଲେ ମଧ୍ୟ ଶିକ୍ଷା କ୍ଷେତ୍ରରେ ଜିଲାର ଗୁରୁତ୍ୱ ରହିଛ। ହେଲେ ଜିଲାର ନିର୍ଦ୍ଦିଷ୍ଟ କେତେକ ବିଦ୍ୟାଳୟର କେତେଜଣ ଶିକ୍ଷକଙ୍କ ପାଇଁ ଏହି ଗୁରୁତ୍ୱ କମିଯିବା ସମ୍ଭାବନା ରହିଛି। ଏହି ନିର୍ଦ୍ଦିଷ୍ଟ କେତେକ ଶିକ୍ଷକ ପାଠ ପଢାଇବା ଅପେକ୍ଷା ରାଜନୀତି ପ୍ରତି ବେଶୀ ଧ୍ୟାନ ଦେଉଛନ୍ତି। ଫଳରେ ପାଠପଢାର ମାନ କମିଯାଉଛି। ଏହି ଶିକ୍ଷକମାନେ ମନଇଛା ବିଦ୍ୟାଳୟକୁ ଯିବାଆସିବା କରୁଛନ୍ତି। ଶିକ୍ଷା ବିଭାଗର ଉଚ୍ଚ ଅଧିକାରୀ ଅଚାନକ ଯାଞ୍ଚ କଲେ ଏହି ଶିକ୍ଷକମାନେ ଧରାପଡ଼ନ୍ତେ ବୋଲି କୁହାଯାଉଛି। ସମୟ ଥିଲା ଜିଲାର ସରକାରୀ ବିଦ୍ୟାଳୟଗୁଡ଼ିକରୁ ବହୁତ ଛାତ୍ରୀଛାତ୍ର ପାଠପଢି ରାଜ୍ୟ, ଦେଶ ଏପରିକି ବିଦେଶରେ ମଧ୍ୟ ଭଲ ପଦବୀରେ ରହି ଜିଲାର ନାମ ରଖିଛନ୍ତି। ସେ ସମୟରେ ସେହିପରି ବିଶେଷ ସୁବିଧା ସୁଯୋଗ ନ ଥିଲେ ମଧ୍ୟ ଜିଲାର ନାମ ରଖିଛନ୍ତି। ହେଲେ ଆଜି ଡିଜିଟାଲ ଯୁଗରେ ସବୁ ସୁବିଧା ଥାଇ ମଧ୍ୟ ଜିଲାରେ ଭଲ ବା ଆଖିଦୃଷିୟା ରେଜଲ୍ଟ ନାହିଁ କହିଲେ କିଛି ଭୁଲ ହେବ ନାହିଁ। ବିଦ୍ୟାଳୟଗୁଡିକୁ ରୂପାନ୍ତରିକରଣ କରି ସ୍ମାର୍ଟ କ୍ଲାସ କରିଥିଲେ ସୁଦ୍ଧା ପାଠପଢା ଠିକ୍ ହେଉନାହିଁ। କେଉଁ ବିଦ୍ୟାଳୟରେ ଶିକ୍ଷକ ନାହାନ୍ତି ତ କେଉଁ ବିଦ୍ୟାଳୟରେ ଛାତ୍ରୀଛାତ୍ର କମ ଆଉ ଶିକ୍ଷୟିତ୍ରୀ ଶିକ୍ଷକ ବେଶୀ। ଶିକ୍ଷା ବିଭାଗ ନୀତିକୁ ମାନିବାକୁ ପଡିବ। ସେଥିପାଇଁ ସବୁ ସୁବିଧା ସୁଯୋଗ ଥାଇ ମଧ୍ୟ କେତେଜଣ ଶିକ୍ଷୟିତ୍ରୀ ଶିକ୍ଷକଙ୍କ ଆନ୍ତରିକତା ନ ଥିବା ଯୋଗୁ ସରକାରୀ ବିଦ୍ୟାଳୟ ପ୍ରତି ଆଗ୍ରହ କମୁଛି। ଅବିଭାବକମାନେ ନିଜ ପିଲାଙ୍କୁ ସରକାରୀ ବିଦ୍ୟାଳୟରେ ନ ଦେଇ ବେସରକାରୀରେ ନାମ ଲେଖାଉଛନ୍ତି। ସରକାରୀ ଚାକିରୀଆ ଏପରିକି ଖୁଦ ଶିକ୍ଷୟିତ୍ରୀ ଶିକ୍ଷକମାନେ ମଧ୍ୟ ନିଜ ପିଲାଙ୍କୁ ବେସରକାରୀ ବିଦ୍ୟାଳୟରେ ପାଠ ପଢାଉଛନ୍ତି। କାରଣ ଶିକ୍ଷୟିତ୍ରୀ ଶିକ୍ଷକମାନେ ନିଜେ ମଧ୍ୟ ଅନୁଭବ କରୁଛନ୍ତି, ସରକାରୀ ବିଦ୍ୟାଳୟରେ ପାଠପଢା ଠିକ୍ ହେଉନାହିଁ। ଜିଲାରେ କେତେକ ବିଦ୍ୟାଳୟରେ ଶିକ୍ଷୟିତ୍ରୀ ଶିକ୍ଷକମାନେ ଗୁଲିଗପ କରିବା, ଇଛା ଅନୁସାରେ ବିଦ୍ୟାଳୟ ଯିବାଆସିବା କରିବା, ବିଦ୍ୟାଳୟରେ ମୋବାଇଲରେ ବ୍ୟସ୍ତ ରହିବା, ରାଜନୀତି ହାଲଚାଲ ଉପରେ ଆଲୋଚନା କରିବାରେ ବ୍ୟସ୍ତ ରହୁଛନ୍ତି। କହିବାକୁ ଗଲେ ପାଠପଢାଇବାରେ କମ, ରାଜନୀତିରେ ବେଶି ଧ୍ୟାନ ଦେଉଛନ୍ତି। ବିଭିନ୍ନ ରାଜନୈତିକ ଦଳର ବୈଠକ, ସଭାରେ ଯୋଗ ଦେଉଥିବା ମଧ୍ୟ ନଜିର ରହିଛି। ଗତ ନିର୍ବାଚନ ସମୟରେ ଜଣେ ଶିକ୍ଷକ ରାଜନୈତିକ ଦଳର ରାଲିରେ ସାମିଲ ହୋଇ ଚାକିରୀରୁ ନିଲମ୍ବିତ ହୋଇଥିଲେ। ତେଣୁ ସରକାର, ଦେବଗଡ଼ ଜିଲାପାଳ, ଜିଲା ଶିକ୍ଷା ଅଧିକାରୀ ଏଥିପ୍ରତି ଦୃଷ୍ଟି ଦେବା ଜରୁରୀ ହୋଇପଡ଼ିଛି। ସମସ୍ତେ ଆନ୍ତରିକତା ସହ ଧ୍ୟାନ ଦେଲେ ଜିଲାରେ ଶିକ୍ଷାର କିଛି ମାତ୍ରାରେ ବିକାଶ ହେବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି।
