ରାଉରକେଲା,୨୯।୯(ଦିନେଶ ମିଶ୍ର): ରାଉରକେଲା ମହାନଗର ନିଗମ (ଆର୍ଏମ୍ସି) ପକ୍ଷରୁ ସହରରେ ବିଭିନ୍ନ ସ୍ଥାନରେ ସର୍ବସାଧାରଣଙ୍କ ବ୍ୟବହାର ପାଇଁ ଶୌଚାଳୟ ନିର୍ମାଣ କରାଯାଇଛି। ଏହି ଶୌଚାଳୟଗୁଡିକୁ ପରିଚାଳନା କରିବା ପାଇଁ ସହରର ବିଭିନ୍ନ ସ୍ବୟଂ ସହାୟକ ଗୋଷ୍ଠୀ ଓ ଠିକା ସଂସ୍ଥାକୁ ଦାୟିତ୍ୱ ପ୍ରଦାନ କରାଯାଇଛି। ସହରରେ ଏଭଳି ଅନେକ ଶୌଚାଳୟ ରହିଛି ଯେଉଁଠି ଅବ୍ୟବସ୍ଥା ଦେଖିବାକୁ ମିଳିଛି। ଶୌଚାଳୟ ପରିସରରେ ଫୁଲଚାରା, ବିଡି ଓ ଗୁଟଖା ବ୍ୟବସାୟ ମଧ୍ୟ ଚାଲିଛି। ରାଉରକେଲା ଉଦିତନଗର ସ୍ଥିତ ପାନପୋଷ ଉପଜିଲାପାଳଙ୍କ କାର୍ଯ୍ୟାଳୟ ନିକଟ ଶୌଚାଳୟ, ଡିଏଭି ଛକ ଓ ଏସ୍ଟିଆଇରେ ଥିବା ସର୍ବସାଧାରଣ ଶୌଚାଳୟରେ ଏଭଳି ଦେଖିବାକୁ ମିଳିଛି।
ଉଦିତନଗରସ୍ଥିତ ପାନପୋଷ ଉପଜିଲାପାଳଙ୍କ କାର୍ଯ୍ୟାଳୟ ନିକଟରେ ଥିବା ଶୌଚାଳୟ ପରିସରକୁ ଜଣେ ବ୍ୟବସାୟୀ କବ୍ଜା କରି ଫୁଲଚାରା ବ୍ୟବସାୟ କରୁଛନ୍ତି। ଶୌଚାଳୟରେ ସ୍ନାନ ଓ ଶୌଚ ପାଇଁ କେତେ ଟଙ୍କା ଦେବାକୁ ପଡିବ ସେ ନେଇ କୌଣସି ସୂଚନା ଫଳକ ଲଗାଯାଇନାହିଁ। ଫଳରେ କୌଣସି ଲୋକେ ଏହି ଶୌଚାଳୟକୁ ଆସିଲେ ସେମାନଙ୍କଠାରୁ ୧୦ରୁ ୩୦ ଟଙ୍କା ପର୍ଯ୍ୟନ୍ତ ନିଆଯାଉଥିବା ଅଭିଯୋଗ ହୋଇଛି। ସେହିପରି ଶୌଚାଳୟ ଭିତରେ ସାବୁନ କି ଫିନାଲଇ ବ୍ୟବସ୍ଥା କରାଯାଇନାହିଁ। ସେହିପରି ବାଲ୍ଟି କି ମଗ୍ ନ ଥିବାରୁ ଏକ ପ୍ଲାଟିକ ରଙ୍ଗଡବା କାଟି ବ୍ୟବହାର କରାଯାଉଛି। ଶୌଚାଳୟ ଭିତରେ ଏକ କମମୋଡ୍ ଭଗ୍ନ ଅବସ୍ଥାରେ ପଡିରହିଛି। ଶୌଚାଳୟ ଭିତରେ କିଛି ସ୍ଥାନୀୟ ବ୍ୟବସାୟୀଙ୍କ ଖଟିଆ, ସାଇକେଲ ଓ ଅନ୍ୟାନ୍ୟ ସାମଗ୍ରୀ ପଡି ରହିଛି। ଫଳରେ ଏଠାକୁ ଶୌଚ ହେବାକୁ ଆସୁଥିବା ଲୋକେ ହଇରାଣ ହେଉଛନ୍ତି।
ସେହିପରି ବାସନ୍ତୀ କଲୋନୀ ଡିଏଭି ଛକ ଶୌଚାଳୟରେ ବିଡି ଓ ସିଗାରେଟ୍ ବିକ୍ରି କରାଯାଉଛି। ଯଦି ଉକ୍ତ ଶୌଚାଳୟକୁ କେହି ଶୌଚ ହେବାକୁ ଆସନ୍ତି ସେମାନଙ୍କୁ ଏହି ସାମଗ୍ରୀ ଯୋଗାଇ ଦିଆଯାଉଛି। ଏଠାରେ ସାମନ୍ୟ ଟଏଲଟ୍ ପାଇଁ ଜଣଙ୍କ ପିଛା ୫ ଟଙ୍କା ଦେବାକୁ ପଡୁଛି। ଏସ୍ଟିଆଇ ଛକରେ ଥିବା ସର୍ବସାଧାରଣ ଶୌଚାଳୟରେ ମଧ୍ୟ ଅନୁରୂପ ଅବସ୍ଥା ଦେଖିବାକୁ ମିଳିଛି। ଏହି ଶୌଚାଳୟରେ ଲାଗିଥିବା ପାଣିଟ୍ୟାପ୍ ଗୁଡିକ ଚୋରି ହୋଇଯାଇଛି। ଏଠାରେ ଶୌଚ ହେବା ପାଇଁ କୌଣସି ଆନୁଷଙ୍ଗିକ ଜିନିଷ ନାହିଁ କି କୌଣସି ସୂଚନା ଫଳକ ମଧ୍ୟ ନାହିଁ। ଏହି ଅଞ୍ଚଳରେ ଏକ ଗୋଦାମ ପାର୍କିଂ ସ୍ଥଳ ଥିବାବେଳେ ଗାଡ଼ିଚାଳକମାନେ ଏଠାରେ ଶୌଚ ହେବା ପାଇଁ ଶୋଷଣର ଶିକାର ହେଉଛନ୍ତି। ରାତି ହେଲେ ସର୍ବସାଧାରଣ ଶୌଚାଳୟ ଅଧିକାଂଶ ସମୟ ବନ୍ଦ ରହୁଥିବା ଦେଖିବାକୁ ମିଳୁଛି। ଆରଏମସି ପକ୍ଷରୁ ଖୋଲାଯାଇଥିବା ଶୌଚାଳୟ ଗୁଡିକର ରକ୍ଷଣାବେକ୍ଷଣ ଦାୟିତ୍ୱ ମହାନଗର ନିଗମ କର୍ତ୍ତୃପକ୍ଷ ନେଲେ ଏଭଳି ଅସୁବିଧା ହୁଅନ୍ତା ନାହିଁ ବୋଲି ସାଧାରଣରେ ମତପ୍ରକାଶ ପାଇଛି। ଏ ନେଇ ଆର୍ଏମ୍ସି ଉପଆୟୁକ୍ତ ସୁଧାଂଶୁ ଶେଖର ଭୋଇଙ୍କୁ ପଚାରିବାରୁ ସେ କହିଥିଲେ, ଏ ନେଇ ଆମ ପାଖରେ କୌଣସି ଅଭିଯୋଗ ହୋଇନାହିଁ। ଯଦି କୌଣସି ଶୌଚାଳୟରେ ଏଭଳି ବ୍ୟବସାୟୀକରଣ ଓ ଅବ୍ୟବସ୍ଥା ଦେଖିବାକୁ ମିଳିବ ତେବେ ଆମେ ଏ ନେଇ ତୁରନ୍ତ ଉଚିତ ପଦକ୍ଷେପ ନେବୁ। ସର୍ବସାଧାରଣ ବ୍ୟବହାର ପାଇଁ ହୋଇଥିବା ଶୌଚାଳୟରେ ଅନିୟମିତତା କରୁଥିବା ଠିକା ସଂସ୍ଥା ଓ ଏସ୍ଏଚ୍ଜିକୁ ଏ ନେଇ ଅବଗତ କରାଇବୁ ବୋଲି ଭୋଇ କହିଥିଲେ।
