ଜଟଣୀ,୧୮।୮(ଡି.ଏନ୍.ଏ.): ଜଟଣୀ ବ୍ଲକ ଅଧୀନ ରଥିପୁର ପଞ୍ଚାୟତ ଅଧୀନ ବୁଢାପଡା ଗ୍ରାମରେ ଥିବା ଶୈବପୀଠ ବଡ଼ ସୋମନାଥଙ୍କ ମନ୍ଦିରରେ ବନ୍ୟା ପାଣି ପଶିଯାଇଛି। ଲଘୁଚାପଜନିତ ପ୍ରବଳ ବର୍ଷା ଯୋଗୁ ହୀରାକୁଦ ବନ୍ଧର କିଛି ଗେଟ ଖୋଲାଯାଇଛି। ଫଳରେ ବିଭିନ୍ନ ତଳିଆ ଅଞ୍ଚଳରେ ବନ୍ୟା ପରିସ୍ଥିତି ଦେଖାଦେଇଛି। ଖୋର୍ଦ୍ଧା ଜିଲାର ଜଟଣୀ ବ୍ଲକ ଅଧୀନ ତିରିମଲ ପଞ୍ଚାୟତରେ ଥିବା ଦୟା ନଦୀର ଶାଖା ନଦୀ ରାଜୁଆ ନଦୀରେ ଗତ ମଙ୍ଗଳବାର ରାତିରେ ବନ୍ୟା ଜଳ ପ୍ରଖର ବେଗରେ ପ୍ରବାହିତ ହେବା ଫଳରେ ୧୦୦ଫୁଟର ଘାଇ ସୃଷ୍ଟି ହୋଇଥିଲା। ବୁଧବାର ଉକ୍ତ ଘାଇ ବଢ଼ି ଯାଇଥିବାରୁ ପାଖଆଖ ଗ୍ରାମର ଲୋକ ଆତଙ୍କିତ ହୋଇ ରହିଛନ୍ତି। ଜିଲା ପ୍ରଶାସନ ଏବଂ ସ୍ଥାନୀୟ ପ୍ରଶାସନ ପରିସ୍ଥିତି ଉପରେ ନଜର ରଖିବା ସହିତ ସମସ୍ତ ପରିସ୍ଥିତିର ମୁକାବିଲା ପାଇଁ ସଜାଗ ରହିଛନ୍ତି। ଏଭଳି ସ୍ଥିତିରେ ଉକ୍ତ କନ୍ତିଆ ପଞ୍ଚାୟତର ବୁଢାପଡାର ପ୍ରସିଦ୍ଧ ଶୈବ ପୀଠରେ ବନ୍ୟା ଜଳ ରୋଷ ଘର, ମନ୍ଦିର ଗର୍ଭ ଗୃହ, ବେଢା, ଗୁହାରିଆ ଗୁମ୍ଫା ସହିତ ସମଗ୍ର ମନ୍ଦିର ପରିସରରେ ୫ଫୁଟ ଉଚ୍ଚାର ବନ୍ୟା ଜଳ ଭର୍ତ୍ତି ହୋଇ ରହିଛି। ବୁଧବାର ସିଂହ ସଂକ୍ରାନ୍ତି ପଡିଥିବାରୁ ବିଭିନ୍ନ ଜିଲାରୁ ଆସିଥିବା ଶ୍ରଦ୍ଧାଳୁ ଠିକ୍ ଭାବେ ପୂଜାର୍ଚ୍ଚନା କରି ନ ପାରି ମନ୍ଦିର ବାହାରୁ ଦର୍ଶନ କରି ଫେରି ଥିବା ମନ୍ଦିର ପୂଜକ ହିମାଂଶୁ ଶେଖର ପଣ୍ଡା କହିଛନ୍ତି। ପିପିଲି ଅଞ୍ଚଳ ଖୁରୁକି ମୁଣ୍ଡିଆ ନିକଟରେ ଥିବା ଦୟା ନଦୀର କେତକୀ ବନ୍ଧରୁ ଘାଇ ହୋଇ ବନ୍ୟା ଜଳ ଆସିବାରୁ ଦୀର୍ଘ ୧୦ବର୍ଷ ପରେ ପୁଣି ମନ୍ଦିର ଜଳାର୍ଣ୍ଣବ ହୋଇଛି ବୋଲି ମନ୍ଦିର ପୂଜକ ସନ୍ତୋଷ କୁମାର ଦାଶ କହିଛନ୍ତି।
