କେସିଙ୍ଗା,୨୧।୨(ତୁମେଶ୍ୱେର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର କୁର୍ଲୁପଡାଗ୍ରାମସ୍ଥିତ ଅଣୁ କ୍ଷୁଦ୍ର ଓ ମଧ୍ୟମ ଶିଳ୍ପ ଉଦ୍ୟାନ (ଏମଏସଏମଇ) ନିର୍ମାଣ କରିବା ପାଇଁ ୧୨ କୋଟି ଟଙ୍କା ଖର୍ଚ୍ଚ କରାଯାଇଛି। ଆଜିକୁ ୫ବର୍ଷ ବିତିଯାଇଥିଲେ ସୁଦ୍ଧା ରାଜ୍ୟ ସରକାରଙ୍କ ଦୃଷ୍ଟି ପଡୁ ନ ଥିବାରୁ ଜମି ହରାଇଥିବା ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି। ଜମି ହରାଇଥିବା ଚାଷୀଙ୍କୁ ଚାକିରି ଖଣ୍ଡେ ଦିଆ ଯିବ କହି କମ ମୂଲ୍ୟରେ ଜମି ଅଧିଗ୍ରହଣ କରାଯାଇଥିଲା।
ଗତ ୧୯୮୩ ମସିହାରେ ୧୫୦ଜଣ ଚାଷୀଙ୍କଠାରୁ ଜେକେ ପେପର ମିଲ ୧୮୦ଏକର ଜମି କମ ମୂଲ୍ୟରେ ଜମି ଅଧିଗ୍ରହଣ କରିଥିଲା। ଗତ ୧୯୮୪ରେ ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ଦ୍ୱାରା ପେପର ମିଲ ହେବା ପାଇ ଉଦଘାଟନ କରା ଯାଇଥିଲା। କିନ୍ତୁ ଜେକେ ପେପର ମିଲ ମାଲିକ ପେପେର ମିଲ ନ କରି ଗୁପ୍ତ ଭାବେ ୧୯୯୪-୯ ୫ମସିହାରେ ଇଡକୋ ଓଡ଼ିଶାକୁ ୧୮୦ଏକର ଜମି ବିକ୍ରି କରିଦେଲା। ଗତ ୨୦୦୭-୦୮ମସିହାରେ ଇଡକୋ ଓଡ଼ିଶା କେସିଙ୍ଗା ବିଜ୍ଞାପିତ ଅଞ୍ଚଳ ପରିଷଦକୁ ବସ ଷ୍ଟାଣ୍ଡ ନିର୍ମାଣ କରିବା ପାଇଁ ୧୨ଏକର ଜମି ବିକ୍ରି କରିଦେଲା। ଜମି ହରାଇଥିବା ଚାଷୀମାନେ ତତ୍କାଳୀନ ବିଜେଡି ସରକାରଙ୍କୁ ଚାକିରି ଖଣ୍ଡେ ଦେବା ପାଇ ଅଭିଯୋଗ କରିଥିଲେ। ଚାଷୀଙ୍କ ସମସ୍ୟାକୁ ଦୂର କରିବା ପାଇଁ ବିଜେଡି ସରକାର ଗତ ୨୦୦୦ମସିହାରେ ଏମଏସଏମଇ ପାର୍କ ନିର୍ମାଣ ପାଇଁ ଯୋଜନା କରିଥିଲେ।
ପ୍ରଥମେ କୁର୍ଲୁପଡ଼ା ଗ୍ରାମରେ ଥିବା ଅଧିଗ୍ରହଣ କରିଥିବା ଜମିରେ ଇଡକୋ ଓଡ଼ିଶା ବଲାଙ୍ଗିର ଶାଖା ପକ୍ଷରୁ ପ୍ରଥମେ ଟେଣ୍ଡର ଦ୍ୱାରା ୨ କୋଟି ବ୍ୟୟ ଅଟକରେ ୧୮୦ଏକର ଜମିରେ ଚତୁଃପାର୍ଶ୍ୱରେ ବାଡ଼ା ନିର୍ମାଣ କରାଗଲା। ପାର୍କ ନିର୍ମାଣ ପାଇଁ ୧୦କୋଟି ବ୍ୟାୟ ଅଟକଳରେ ଉକ୍ତ ଜମିରେ ୩ ଲାଇନ ବିଶିଷ୍ଟରେ ପିଚୁ ଓ ଡ୍ରେନ ନିର୍ମାଣ କରାଗଲା। କିନ୍ତୁ ଆଜକୁ ୫ ବର୍ଷ ବିତିଗଲା ସେହି ପାର୍କ ଅକାମୀ ହୋଇ ପଡ଼ିରହିଛି। ଜମି ଉପରେ କଣ୍ଟା ବୁଦା ଅନାବନା ଗଛ ହୋଇପଡ଼ିରହିଛି। ଜମି ହରାଇଥିବା ଚାଷୀମାନେ କେତେ ଆଶା ରଖିଥିଲେ ଯେ ଜମି ତ ଗଲା କିନ୍ତୁ ପେପର ମିଲ ହୋଇଥିଲେ ଚାକିରି ଖଣ୍ଡେ ମିଳିଥାନ୍ତା। ସେହି କାମ ବି ହେଲା ନାହିଁ। ଯଦି ପାର୍କ ନିର୍ମାଣ କରା ନ ଗଲେ ଚାଷୀଙ୍କ ଜମି ଫେରାଇ ଦିଆ ଯାଉ ବୋଲି ଚାଷୀ ଦାବି କରୁଛନ୍ତି। ଯଦି କାର୍ଯ୍ୟ କାରି କରା ନ ଗଲେ ଜାତୀୟ ରାଜପଥ ୨୬ରେ ରାସ୍ତାରୋକୋ କରାଯିବ ବୋଲି ଚାଷୀମାନେ ଚେତାବନୀ ଦେଇଛନ୍ତି । ରାଜ୍ୟରେ ବର୍ତ୍ତମାନ ଭାଜପା ସରକାର ଅଛି। ଏହି ପାର୍କ ନିର୍ମାଣ ରାଜ୍ୟ ସରକାର ଦୃଷ୍ଟି ଦେଲେ ଅଞ୍ଚଳବାସୀ ଉପକୃତ ହୁଅନ୍ତେ। ପାର୍କ ନିର୍ମାଣ କରିବା କେସିଙ୍ଗା ଅଞ୍ଚଳର ଶିଳ୍ପ ଉଦ୍ୟୋଗୀମାନେ ରାଜ୍ୟ ସରକାରଙ୍କୁ ଦୃଷ୍ଟି ଦେଇ ପାର୍କ ନିର୍ମାଣ କରିବା ପାଇଁ ଗଣମାଧ୍ୟମ ଜରିଆରେ ଦାବି କରିଛନ୍ତି। ଏ ସଂକ୍ରାନ୍ତରେ ଇଡକୋ ଓଡ଼ିଶା ବଲାଙ୍ଗିର ଶାଖାର ଯନ୍ତ୍ରୀ ଆଲୋକ ରଞ୍ଜନ ବାଇଙ୍କୁ ପଚାରିବାରୁ ସରକାର ବଦଳିଛି। ଏପର୍ଯ୍ୟନ୍ତ କିଛି ଆଦେଶ ଆସିନାହିଁ ବୋଲି କହିଥିଲେ।
Dharitri – Odisha’s No.1 Odia Daily
