ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ଆନୁକୂଲ୍ୟରେ ପୁରୁଷ ହକି ବିଶ୍ୱକପ୍ ୧୯୭୧ରୁ ଆରମ୍ଭ ହୋଇଥିଲା। ଇତିହାସ ଅବଲୋକନ କଲେ ଜଣାଯାଏ ଯେ, ପ୍ରଥମ ୩ ବିଶ୍ୱକପ୍ ପ୍ରତି ୨ ବର୍ଷ ବ୍ୟବଧାନରେ ଅନୁଷ୍ଠିତ ହୋଇଥିଲା। ପ୍ରଥମ ବିଶ୍ୱକପ୍ର ଆୟୋଜନ ଭାର ପାଇଥିଲା ସ୍ପେନ୍। ବାର୍ସେଲୋନାରେ ଅନୁଷ୍ଠିତ ପ୍ରଥମ ସଂସ୍କରଣରେ ପାକିସ୍ତାନ ଚାମ୍ପିୟନ ହୋଇଥିବାବେଳେ ଆୟୋଜକ ସ୍ପେନ୍ ରନରଅପ୍ ଏବଂ ଭାରତକୁ ତୃତୀୟ ସ୍ଥାନ ମିଳିଥିଲା। ପରବର୍ତ୍ତୀ ସଂସ୍କରଣ ୧୯୭୩ରେ ନେଦରଲାଣ୍ଡ୍ସର ଅମଷ୍ଟେଲଭିନ୍ରେ ଆୟୋଜିତ ହୋଇଥିଲା। ଏଥିରେ ଆୟୋଜକ ଦଳ ଟାଇଟଲ ହାସଲ କରିଥିବାବେଳେ ଭାରତ ରନରଅପ୍ ହୋଇଥିଲା। ତୃତୀୟ ବିଶ୍ୱକପ୍ ୧୯୭୫ରେ ମାଲେସିଆର କୁଆଲାଲମ୍ପୁରରେ ଅନୁଷ୍ଠିତ ହୋଇଥିଲା। ଫାଇନାଲରେ ପାକିସ୍ତାନକୁ ହରାଇ ଭାରତ ପିନ୍ଧିଥିଲା ବିଜୟ ମୁକୁଟ। ପରବର୍ତ୍ତୀ ବିଶ୍ୱକପ୍ ୩ ବର୍ଷ ବ୍ୟବଧାନରେ ଅର୍ଥାତ୍ ୧୯୭୮ରେ ହୋଇଥିଲା। ଏଥର ଆୟୋଜନ ଅଧିକାର ପାଇଥିଲା ଆର୍ଜେଣ୍ଟିନା ଏବଂ ବୁଏନ୍ସ ଏୟାର୍ସରେ ଏହା ଆୟୋଜିତ ହୋଇଥିଲା। ଏଥିରେ ପାକିସ୍ତାନ ଚାମ୍ପିୟନ ଓ ନେଦରଲାଣ୍ଡ୍ସ ରନରଅପ୍ ହୋଇଥିଲା। ଏହା ପରଠାରୁ ଅର୍ଥାତ୍ ୧୯୮୨ଠାରୁ ପ୍ରତି ବିଶ୍ୱକପ୍ ୪ ବର୍ଷ ବ୍ୟବଧାନରେ ଆୟୋଜିତ ହୋଇ ଆସୁଛି। ୧୯୮୨ରେ ଭାରତ ପ୍ରଥମଥର ପାଇଁ ଆୟୋଜନ ଅଧିକାର ହାସଲ କରିଥିଲା। ବମ୍ବେ (ଏବେ ମୁମ୍ବାଇ)ରେ ଅନୁଷ୍ଠିତ ଟୁର୍ନାମେଣ୍ଟରେ ପାକିସ୍ତାନ ଓ ପଶ୍ଚିମ ଜର୍ମାନୀ ଯଥାକ୍ରମେ ପ୍ରଥମ ଓ ଦ୍ୱିତୀୟ ସ୍ଥାନରେ ରହିଥିଲେ। ଏହାପରେ ୧୯୮୬ରେ ଇଂଲଣ୍ଡର ଲଣ୍ଡନ, ୧୯୯୦ରେ ପାକିସ୍ତାନର ଲାହୋର, ୧୯୯୪ରେ ଅଷ୍ଟ୍ରେଲିଆର ସିଡ୍ନୀ, ୧୯୯୮ରେ ନେଦରଲାଣ୍ଡ୍ସର ଉଟ୍ରେଚ୍, ୨୦୦୨ରେ ମାଲେସିଆର କୁଆଲାଲମ୍ପୁର, ୨୦୦୬ରେ ଜର୍ମାନୀର ମନଚେନ୍ଗ୍ଲାଡବ୍ୟାକ୍, ୨୦୧୦ରେ ଭାରତର ନୂଆଦିଲ୍ଲୀ, ୨୦୧୪ରେ ନେଦରଲାଣ୍ଡ୍ସର ହଗ୍ ଏବଂ ୨୦୧୮ରେ ଭାରତର ଭୁବନେଶ୍ୱରର ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହି ସବୁ ସଂସ୍କରଣଗୁଡ଼ିକରେ ଯଥାକ୍ରମେ ଅଷ୍ଟ୍ରେଲିଆ-ଇଂଲଣ୍ଡ, ନେଦରଲାଣ୍ଡ୍ସ-ପାକିସ୍ତାନ, ପାକିସ୍ତାନ-ନେଦରଲାଣ୍ଡ୍ସ, ନେଦରଲାଣ୍ଡ୍ସ-ସ୍ପେନ୍, ଜର୍ମାନୀ-ଅଷ୍ଟ୍ରେଲିଆ, ଜର୍ମାନୀ -ଅଷ୍ଟ୍ରେଲିଆ, ଅଷ୍ଟ୍ରେଲିଆ-ଜର୍ମାନୀ, ଅଷ୍ଟ୍ରେଲିଆ-ନେଦରଲାଣ୍ଡ୍ସ ଏବଂ ବେଲଜିୟମ-ନେଦରଲାଣ୍ଡ୍ସ ଚାମ୍ପିୟନ-ରନରଅପ୍ ହୋଇଥିଲେ।
