ନୂଆଦିଲ୍ଲୀ,୨୧।୬ : ଉତ୍ତର ଭାରତରେ ପ୍ରଥମ ଥର ପାଇଁ ଦିଲ୍ଲୀର ସଫଦରଜଙ୍ଗ ହସ୍ପିଟାଲରେ ଚର୍ମ ବ୍ୟାଙ୍କ(ସ୍କିନ ବ୍ୟାଙ୍କ) ଉଦଘାଟନ କରାଯାଇଛି। ଚର୍ମ ବ୍ୟାଙ୍କରେ ଦାନ କରାଯାଇଥିବା ଚର୍ମ ନିଆଁରେ ପୋଡି ଯାଇଥିବା ଲୋକଙ୍କୁ ଚିକିତ୍ସା କରିବା ପାଇଁ ବ୍ୟବହୃତ ହେବ। ସଫଦରଜଙ୍ଗ ହେଉଛି ଉତ୍ତର ଭାରତର ପ୍ରଥମ ଡାକ୍ତରଖାନା ଯେଉଁଠାରେ ଚର୍ମ ଦାନ କାର୍ଯ୍ୟ ଆରମ୍ଭ ହୋଇଛି ।
ଚର୍ମ ସମ୍ବନ୍ଧୀୟ ମାମଲାଗୁଡ଼ିକ ଯେପରି ଗୁରୁତର ପୋଡା ଜଳା କିମ୍ବା ଏସିଡ ପୋଡା କ୍ଷେତ୍ରରେ ଚର୍ମ ଗ୍ରାଫ୍ଟିଂରେ ସାହାଯ୍ୟ କରିବ। ଜଣେ ବ୍ୟକ୍ତିଙ୍କ ମୃତ୍ୟୁର ୬ ଘଣ୍ଟା ମଧ୍ୟରେ ଚର୍ମ ଦାନ କରାଯାଇପାରିବ। ଦେଶରେ ୧୬ ଟି ସ୍କିନ ବ୍ୟାଙ୍କ ଅଛି। ଏଠାରେ ମୃତ ବ୍ୟକ୍ତିଙ୍କ ଚର୍ମ ଦାନ କରାଯାଇପାରିବ। ସେଥ ମଧ୍ୟରୁ ମହାରାଷ୍ଟ୍ରରେ ସାତୋଟି ଚର୍ମ ବ୍ୟାଙ୍କ, ଚେନ୍ନାଇରେ ଚାରିଟି, କର୍ନାଟକରେ ତିନୋଟି ଏବଂ ମଧ୍ୟପ୍ରଦେଶ ଏବଂ ଓଡିଶାରେ ଗୋଟିଏ ଲେଖାଏଁ ଅଛି।
ପୋଡା ଜଳା ଏବଂ ପ୍ଲାଷ୍ଟିକ ବିଭାଗର ମୁଖ୍ୟ ଡାକ୍ତର ଶାଲକ୍ଭ କୁମାର କହିଛନ୍ତି, ବର୍ତ୍ତମାନ ପର୍ଯ୍ୟନ୍ତ ଦିଲ୍ଲୀ କିମ୍ବା ଉତ୍ତର ଭାରତରେ ଆମର ସ୍କିନ ବ୍ୟାଙ୍କ ନ ଥିଲା। ଲୋକମାନେ ଆମକୁ ଫୋନ କରି ଚର୍ମ ଦାନ ପାଇଁ ଅନୁରୋଧ କରୁଥିଲେ, କିନ୍ତୁ ଆମେ ସେମାନଙ୍କ ଉପରେ କାର୍ଯ୍ୟ କରି ପାରୁ ନ ଥିଲୁ।
ଚର୍ମ ପ୍ରତିରୋପଣ ବିଷୟରେ ସର୍ବୋତ୍ତମ କଥା ହେଉଛି ସମାନ ବ୍ଲଡଗ୍ରୁପର ଆବଶ୍ୟକତା ନାହିଁ କିମ୍ବା ପରେ ଇମ୍ୟୁନୋସପ୍ରେଶନ ଔଷଧ ସେବନ କରିବାର ଆବଶ୍ୟକତା ନାହିଁ । ଯେକୌଣସି ବ୍ୟକ୍ତି ଚର୍ମ ଦାନ କରିପାରିବେ। ଏସବୁ ଚର୍ମ ଯେକୌଣସି ବ୍ୟକ୍ତିଙ୍କ ପାଇଁ ପ୍ରୟୋଗ ହୋଇପାରିବ ।
ଅଙ୍ଗ ଦାନ କ୍ଷେତ୍ରରେ ଦେଶରେ ଏମ୍ସର ବହୁ ଅଙ୍ଗଦାନ ବ୍ୟାଙ୍କ ରହିଛି। ଏମ୍ସ ଏକ୍ଷେତ୍ରରେ ଏକ ସ୍ବତନ୍ତ୍ର ସ୍ଥାନ ଅଧିକାର କରିଛି। କିନ୍ତୁ ସଫଦରଜଙ୍ଗ ହସ୍ପିଟାଲ ଚର୍ମ ଦାନ ସମ୍ବନ୍ଧରେ ଏକ ନୂତନ ଇତିହାସ ସୃଷ୍ଟି କରିଛି । ପ୍ରତିବର୍ଷ ଦୁର୍ଘଟଣା କିମ୍ବା ଏସିଡ ଆକ୍ରମଣରେ ଅନେକ ଲୋକଙ୍କ ଚର୍ମ ଜଳିଯାଇଥାଲ। ଏଭଳି ପରିସ୍ଥିତିରେ ଚର୍ମ ଦାନ ସାହାଯ୍ୟରେ ଲୋକଙ୍କୁ ସାହାଯ୍ୟ କରାଯାଇଥାଏ। ପରିସଂଖ୍ୟାନ ଅନୁଯାୟୀ ଭାରତରେ ପ୍ରତିବର୍ଷ ୮୦ ଲକ୍ଷରୁ ଅଧିକ ଲୋକ ଜଳିଯାଇ ଥାଆନ୍ତି। ସେମାନଙ୍କ ମଧ୍ୟରୁ ଅଧିକାଂଶ ମହିଳା ଏବଂ ଶିଶୁ। ଅନ୍ୟପକ୍ଷରେ,ଚର୍ମ ଜଳିବା ଯୋଗୁ ୧୦ରୁ ୧୫ ପ୍ରତିଶତ ଲୋକ ଚର୍ମ ସମ୍ବନ୍ଧୀୟ ସମସ୍ୟାରେ ଆକ୍ରାନ୍ତ ହୁଅନ୍ତି। ଏହା ସାଂଘାତିକ ମଧ୍ୟ ହୋଇପାରେ ।
ଚର୍ମ ହେଉଛି ଶରୀରର ପ୍ରାକୃତିକ ଆବରଣ। ଯାହା ଶରୀରର ସୁରକ୍ଷା ପାଇଁ କାର୍ଯ୍ୟ କରେ। କେବଳ ଏତିକି ନୁହେଁ, ଏହା ଶରୀରକୁ ସୂର୍ଯ୍ୟ, ପ୍ରଦୂଷଣ, ରାସାୟନିକ ପଦାର୍ଥ ଏବଂ ଜୀବାଣୁରୁ ସୁରକ୍ଷା କରିଥାଏ। ଏହା ମଧ୍ୟ ଶରୀରକୁ ସୁରକ୍ଷିତ ରଖେ। ସ୍ବାଭାବିକ ଭାବରେ, ସାମାନ୍ୟ ଆଘାତ କିମ୍ବା ସ୍କ୍ରାଚ ଇତ୍ୟାଦି ପାଇବା ପରେ ଚର୍ମ ନିଜେ ସୁସ୍ଥ ହୋଇଯାଇଥାଏ । ଏହା ସହିତ, ଏହି ଚିହ୍ନ ଏବଂ ଦାଗଗୁଡ଼ିକ ଧୀରେ ଧୀରେ ଲିଭି ଯାଇଥାଏ।
ଚର୍ମ ଦାନ ପାଇଁ, ପ୍ରଥମେ ରକ୍ତ ପରୀକ୍ଷା ଏବଂ ଚର୍ମ ରଙ୍ଗ ପରୀକ୍ଷା କରାଯାଏ। ଚର୍ମ ଦାନ ପାଇଁ, ଚର୍ମ ଦାନ ବ୍ୟାଙ୍କରୁ ମଧ୍ୟ ସାହାଯ୍ୟ ନିଆଯାଇପାରେ। ସାଧାରଣତଃ ଯେତେବେଳେ ଜଣେ ବ୍ୟକ୍ତଙ୍କ ମୃତ୍ୟୁ ହୁଏ ତାଙ୍କ ଚର୍ମ ୬ ଘଣ୍ଟା ମଧ୍ୟରେ ଆବଶ୍ୟକ ଲୋକଙ୍କୁ ଦାନ କରାଯାଇଥାଏ। ଚର୍ମ ଦାନ କରୁଥିବା ବ୍ୟକ୍ତିଙ୍କ ଚର୍ମ ୩-୫ ବର୍ଷ ପର୍ଯ୍ୟନ୍ତ ଫ୍ରିଜ ପ୍ରକ୍ରିୟା ମାଧ୍ୟମରେ ଗଚ୍ଛିତ ହୋଇ ରହିଥାଏ ।
