ଦାରିଙ୍ଗବାଡ଼ି,୧୨ା୨(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସିମନବାଡ଼ି ବଜାରରେ ଏକ ୩ ମହଲା କୋଠାରେ ନିଆଁ ଲାଗି ଲକ୍ଷାଧିକ ଟଙ୍କାର ସମ୍ପତ୍ତି କ୍ଷୟ ହୋଇଥିବା ଜଣାପଡ଼ିଛି। ନିଆଁକୁ ସ୍ଥାନୀୟ ବାସିନ୍ଦା ଆୟତ୍ତ କରିବାକୁ ପ୍ରୟାସ କରିଥିଲେ ସୁଦ୍ଧା ବିପଦ ପରିସ୍ଥିତି ଓ ଧୂଆଁମୟ ଯୋଗୁଁ ଆୟତ୍ତ ହୋଇପାରି ନ ଥିଲା। ପରେ ଦାରିଙ୍ଗବାଡ଼ି ଅଗ୍ନିଶମ ବିଭାଗକୁ ସୂଚନା ପ୍ରଦାନ କରାଯାଇଥିଲା। ଖବର ପାଇ ଅଗ୍ନିଶମ ଅଧିକାରୀ ଧବଳେଶ୍ୱର ପ୍ରଧାନଙ୍କ ନେତୃତ୍ୱରେ ସୁନୀଲ କୁମାର ସାମର୍ଥ, ବୃନ୍ଦାବନ ମାନସିଂ, ସାଜନ କୁମାର ବେହେରା, ଚିନ୍ମୟ ପରିଡ଼ା, ପ୍ରିୟବ୍ରତ ସେନାପତି,ଏକାନ୍ତ ଶବର ପ୍ରମୁଖ ପହଞ୍ଚି ପ୍ରାୟ ୧ ଘଣ୍ଟାର ଅକ୍ଲାନ୍ତ ପରିଶ୍ରମ ପରେ ନିଆଁ ଓ ଧୂଆଁକୁ ଆୟତ୍ତ କରାଯାଇଥିଲା। ଅଗ୍ନିଶମ ଅଧିକାରୀ ଧବଳେଶ୍ୱର ପ୍ରଧାନ ନିଜେ ଦିତୀୟ ମହଲାରେ ତାଙ୍କ ଅଗ୍ନିବୀରଙ୍କ ସହ ଭିତରେ ପ୍ରବେଶ କରି ନିଆଁକୁ ଆୟତ୍ତ କରିବାରେ ସକ୍ଷମ ହୋଇଥିଲେ।
ପ୍ରକାଶ ଯେ ସିମନବାଡ଼ିଠାରୁ ରାଇକିଆ ଯିବା ରାସ୍ତାର ବଜାର ଉପରେ ଜିତେନ୍ଦ୍ର ସାହୁଙ୍କ ୩ ମହଲା କୋଠା ରହିଛି ତଳ କୋଠାରେ ଲୁଗା ଦୋକାନ ରହିଥିବା ବେଳେ ଦ୍ୱିତୀୟ ମହଲାରେ ରୋଷ ଶାଳ, ଗାଧୁଆ ଘର, ବେଡ଼ ରୁମ ଆଦି ରହିଛି। ତୃତୀୟ ମହଲା ଶିଡ଼ି ଘର ଓ ଗୋଦାମ ଭାବେ ବ୍ୟବହାର ହେଉଛି। ଏହି ନିଆଁ ଦ୍ୱିତୀୟ ମହଲାରେ ଏକ ଓ୍ବାଶିଂ ମେଶିନରୁ ବାହାରିଥିବା ଅନୁମାନ କରାଯାଇଛି। ଓ୍ବାଶିଂ ମେଶିନଟି ସମ୍ପୂର୍ଣ୍ଣ ପୋଡି ଯାଇଥିବାରୁ ସେଥିରୁ ହିଁ ନିଆଁ ବାହାରିଥିବା ଆଶଙ୍କା କରାଯାଇଛି। ପ୍ରଥମେ ତଳ ମହଲା ଲୁଗା ଦୋକାନରେ ବ୍ୟବସାୟ କରୁଥିବା ବେଳେ ଜିତେନ୍ଦ୍ରଙ୍କ ସ୍ତ୍ରୀ ଏବଂ କର୍ମଚାରୀ ଦେଖିଥିଲେ। ପାଟି କରିବା ପରେ ସ୍ଥାନୀୟ ଲୋକେ ରୁଣ୍ଡ ହୋଇ ନିଆଁକୁ ଲିଭାଇବାକୁ ଉଦ୍ୟମ କରିଥିଲେ। ପରେ ଅଗ୍ନିଶମ ବିଭାଗ ପହଞ୍ଚିଥିଲେ।
