ମୁମ୍ବାଇ : କରୋନା ଭାଇରସ୍ ଯୋଗୁ ନ୍ୟୁଜିଲାଣ୍ଡ୍ରେ ଫିଲ୍ମ ହଲ୍ ବନ୍ଦ ରହିଥିଲା। ଏବେ ଏହି ଦେଶ ଧୀରେ ଧୀରେ କରୋନା ମୁକ୍ତ ହେବାରେ ଲାଗିଛି। ଏହି ସମୟରେ ନ୍ୟୁଜିଲାଣ୍ଡ୍ରୁ ଭାରତୀୟ ଫିଲ୍ମ ପାଇଁ ଖୁସି ଖବର ଆସିଛି। ଫିଲ୍ମ ନିର୍ମାତା ତଥା ନିର୍ଦ୍ଦେଶକ ରୋହିତ ସେଟ୍ଟୀଙ୍କ ଫିଲ୍ମ ‘ଗୋଲ୍ମାଲ ଏଗେନ୍’ ଲକ୍ଡାଉନ୍ ପରେ ନ୍ୟୁଜିଲାଣ୍ଡ୍ର ହଲ୍ରେ ରିଲିଜ ହେବ। ଯାହା ପ୍ରଥମ ଫିଲ୍ମ ଭାବେ ରିଲିଜ ହେବାକୁ ଯାଉଛି। ଫିଲ୍ମଟି ଦର୍ଶକଙ୍କୁ ମନୋରଞ୍ଜନର ଖୋରାକ ଯୋଗାଇବ। ଏ ସମ୍ପର୍କରେ ଫିଲ୍ମ ପ୍ରସ୍ତୁତକର୍ତ୍ତା କମ୍ପାନୀ ରିଲାଏନ୍ସ ଏଣ୍ଟରଟେନ୍ମେଣ୍ଟ୍ ନିଜର ସୋସିଆଲ ମିଡିଆ ଆକାଉଣ୍ଟରେ ପୋଷ୍ଟ କରି ଜଣାଇଛି। ଫିଲ୍ମ ‘ଗୋଲ୍ମାଲ ଏଗେନ୍’ ରୋହିତ୍ ସେଟ୍ଟୀଙ୍କ ଫ୍ରାଞ୍ଚାଇଜ୍ର ୪ର୍ଥ ଫିଲ୍ମ ଅଟେ। ଯାହାକି ୨୦୧୭ରେ ରିଲିଜ୍ ହୋଇଥିଲା। ଏହି ଫିଲ୍ମରେ ଅଜୟ ଦେବଗନ, ଅରଶଦ ଓ୍ବାର୍ସୀ, ଶ୍ରେୟସ୍ ତଲପଡେ, କୁଣାଳ ଖେମୁ, ତୁଷାର କପୁର, ପରିଣୀତି ଚୋପ୍ରା ଏବଂ ତବୁଙ୍କ ପରି ନାମୀଦାମୀ କଳାକାର ଅଭିନୟ କରିଥିଲେ। ରିଲିଜ୍ ହେବା ପରଠାରୁ ଆଜିପର୍ଯ୍ୟନ୍ତ ଏହି ଫିଲ୍ମ ସମଗ୍ର ବିଶ୍ୱରେ ୩ ଶହ କୋଟି ଟଙ୍କାରୁ ଅଧିକ ବ୍ୟବସାୟ କରିଛି। କରୋନା ଭାଇରସ୍ରୁ ଟିକେ ନିସ୍ତାର ମିଳିବା ପରେ ନ୍ୟୁଜିଲାଣ୍ଡ୍ ଫିଲ୍ମ ହଲ୍ରେ ଏହା ପ୍ରଥମ ଫିଲ୍ମ ଭାବେ ରିଲିଜ୍ ହେବାକୁ ଯାଉଛି।
