ବଲାଙ୍ଗୀର,୧୯ା୯(ସୁନୀଲ କୁମାର ମହାନ୍ତି): ଜିଲାରେ ସାର କଳାବଜାର ପ୍ରସଙ୍ଗକୁ ନେଇ ବିଜେଡି ପକ୍ଷରୁ ସ୍ଥାନୀୟ କୃଷି ଭବନ ଘେରାଉ କରାଯାଇଥିଲା। କୃଷି ଭବନ ସମ୍ମୁଖରେ ପ୍ରଥମେ ବିଜେଡି ନେତା ଓ କର୍ମୀମାନେ ଚାଷୀଙ୍କ ଗହଣରେ ବିକ୍ଷୋଭ ପ୍ରଦର୍ଶନ କରିବା ସହ ପ୍ରତିବାଦ ସଭା କରିଥିଲେ। ସଦର ବ୍ଲକର ପୂର୍ବତନ ବ୍ଲକ ଅଧ୍ୟକ୍ଷ ତଥା ବରିଷ୍ଠ ନେତା ଗୋଲାପ ବାଗଙ୍କ ସଭାପତିତ୍ୱରେ ଅନୁଷ୍ଠିତ ପ୍ରତିବାଦ ସଭାରେ ଜିଲା ପରିଷଦ ସଭାପତି ଦେବକୀ ସାହୁ, ସଦର ବ୍ଲକ ଅଧ୍ୟକ୍ଷା ସରିତା ବାଗ, ଦେଓଗାଁ ବ୍ଲକ ଅଧ୍ୟକ୍ଷ ଦୟାନିଧି ଖମାରୀ, ଜିଲା ମହିଳା ବିଜେଡି ସଭାନେତ୍ରୀ ଦମୟନ୍ତୀ ବାଗ, ନଗର ସଭାପତି ଶମ୍ଭୁ ନାଗ, ଜିଲା ଯୁବ ବିଜେଡି ସଭାପତି ରାଜେନ୍ଦ୍ର ହୋତା, ଛାତ୍ର ବିଜେଡି ସଭାପତି ସୁମନ ନନ୍ଦ, ବରିଷ୍ଠ ଆଇନଜୀବୀ ଜୟରାମ ମିଶ୍ର, କୈଳାସ ମହାନ୍ତି, ବିଧୂଭୂଷଣ ତ୍ରିପାଠୀଙ୍କ ସମେତ ଚାଷୀମାନେ ଯୋଗଦେଇ ଭାଜପା ସରକାରକୁ ତୀବ୍ର ସମାଲୋଚନା କରିଥିଲେ। କଳାବଜାରୀଙ୍କ ସହ ମିଶି ସାର କଳାବଜାର କରି ଚାଷୀକୁ ଶୋଷଣ କରୁଛନ୍ତି ବୋଲି ଅଭିଯୋଗ କରିଥିଲେ। ଠିକଣା ସମୟରେ ସାର ନ ପାଇବାରୁ ଚାଷୀ ଘୋର ଅସୁବିଧାର ସମ୍ମୁଖୀନ ହୋଇ ଚଢ଼ା ଦରରେ ସାର କିଣି ହନ୍ତସନ୍ତ ହେଉଛନ୍ତି ବୋଲି କହିଥିଲେ। ବୁଧବାର କୃଷି ଭବନ ଉଦ୍ଘାଟନକୁ କଡ଼ା ଭାଷାରେ ସମାଲୋଚନା କରିଥିଲେ। ପୁରୁଣା କୋଠାରେ ରଙ୍ଗ ମାରି କୃଷି ଭବନ ନାଁରେ ଉଦ୍ଘାଟନ କରାଯାଉଛି ବୋଲି ସମାଲୋଚନା କରିଥିଲେ। ଉଦ୍ଘାଟନୀ ଫଳକରେ କେଉଁ କାରଣରୁ ସ୍ଥାନୀୟ ବିଧାୟକ କଳିକେଶ ନାରାୟଣ ସିଂଦେଓଙ୍କ ନାଁ ଲେଖାଯାଇ ନାହିଁ ବୋଲି ପ୍ରଶ୍ନ କରିଥିଲେ। ସଭା ପରେ ଦାବିପତ୍ର ଦେବାକୁ କୃଷି ଭବନ ଭିତରକୁ ଧସେଇ ପଶିଥିଲେ। ଉପସ୍ଥିତ ପୋଲିସ କର୍ମଚାରୀଙ୍କୁ ବିଜେଡି ନେତା, କର୍ମୀମାନେ ଠେଲାପେଲା କରି କୃଷି ଭବନ ପରିସରକୁ ପଶିଥିଲେ। ସେଠାରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓଙ୍କ ଦ୍ବାରା ଉଦ୍ଘାଟିତ କୃଷି ଭବନ ଫଳକରେ ଜିଲା ପରିଷଦ ସଭାପତି ଦେବକୀ ସାହୁ ବାର୍ନିସ୍ ଧଳା ରଙ୍ଗ ମାରି ଉପମୁଖ୍ୟମନ୍ତ୍ରୀ ଓ ଲୋକସଭା ଏମ୍ପିଙ୍କ ନାମକୁ ଲିଭାଇ ଦେଇଥିଲେ। ଫଳକ ନିକଟସ୍ଥ ଷ୍ଟାଣ୍ଡକୁ ବିକ୍ଷୋଭକାରୀମାନେ ଭାଙ୍ଗି ଦେଇଥିଲେ। ଅଫିସ ଭିତରକୁ ପଶି ସିଡିଏଓ ଧୀରେନ ସିଂ ବରିହାଙ୍କୁ ସାର କଳାବଜାର ଓ ଉଦ୍ଘାଟନୀ ଫଳକରେ ସ୍ଥାନୀୟ ବିଧାୟକଙ୍କ ନାଁ କାହିଁକି ଲେଖାଯାଇନାହିଁ ବୋଲି ପ୍ରଶ୍ନ କରିଥିଲେ। ଆଗକୁ ଏଭଳି ହେଲେ ଏହାର କଡ଼ା ଜବାବ ଦିଆଯିବ ବୋଲି ଧମକ ଦେଇ ଦାବିପତ୍ର ଦେଇଥିଲେ।
