ବରଗଡ଼,୧୬।୯(ପ୍ରେମାନନ୍ଦ ଖମାରୀ): ବାର୍ଷିକ କ୍ରୀଡ଼ା, ବାର୍ଷିକ ଉତ୍ସବ ପାଇଁ ଛାତ୍ରୀଛାତ୍ରଙ୍କଠାରୁ ଆଡ଼ମିଶନ, ରି-ଆଡ଼ମିଶନ ପାଇଁ ପ୍ରତିବର୍ଷ ଫି ଆଦାୟ କରାଯାଉଛି। କିନ୍ତୁ କଲେଜରେ ପ୍ରବେଶ ଦିବସଠାରୁ ଏପର୍ଯ୍ୟନ୍ତ ଛାତ୍ରୀଛାତ୍ର ବାର୍ଷିକ କ୍ରୀଡ଼ା କିମ୍ବା କଲେଜର ବାର୍ଷିକ ଉତ୍ସବ ପାଳନ ଦେଖିନାହାନ୍ତି। ଏଭଳି ଏକ ଗୁରୁତର ଅଭିଯୋଗ ନେଇ ସୋମବାର ବରଗଡ଼ ଟ୍ରଷ୍ଟ ଫଣ୍ଡ୍ କଲେଜର ଛାତ୍ରୀଛାତ୍ର କଲେଜ ପରିଚାଳନା କମିଟିର ସଭାପତି ତଥା ଅତିରିକ୍ତ ଜିଲାପାଳ ମଧୁଛନ୍ଦା ସାହୁଙ୍କୁ ଫେରାଦ ହୋଇଛନ୍ତି। ଅତିରିକ୍ତ ଜିଲାପାଳ ସାହୁଙ୍କୁ ଛାତ୍ରୀଛାତ୍ର ଏକ ସ୍ମାରକପତ୍ର ମଧ୍ୟ ପ୍ରଦାନ କରିଛନ୍ତି। କଲେଜର ବାର୍ଷିକ କ୍ରୀଡ଼ା ଏବଂ ବାର୍ଷିକ ଉତ୍ସବ ପାଳନ ଦିଗରେ ବିହିତ ପଦକ୍ଷେପ ନେବା ପାଇଁ ସେମାନେ ଅତିରିକ୍ତ ଜିଲାପାଳ ସାହୁଙ୍କୁ ନିବେଦନ କରିଛନ୍ତି।
ଛାତ୍ରୀଛାତ୍ର ଅଭିଯୋଗ କରିଛନ୍ତି, ଦୀର୍ଘ ୨୮ବର୍ଷ ହେଲା ଉକ୍ତ କଲେଜରେ ବାର୍ଷିକ କ୍ରୀଡ଼ା ପ୍ରତିଯୋଗିତା କିମ୍ବା କଲେଜର ବାର୍ଷିକ ଉତ୍ସବ ପାଳନ କରାଯାଉ ନାହିଁ। ଅନ୍ୟପଟେ ପ୍ରତିବର୍ଷ କଲେଜର ଛାତ୍ରୀଛାତ୍ରଙ୍କଠାରୁ ଆଡ଼ମିଶନ ଏବଂ ରି-ଆଡ଼ମିଶନ ନାଁରେ ସ୍ପୋର୍ଟସ୍ ଓ କଲଚରାଲ ଫି ନିଆଯାଉଛି। କେବଳ ଗତ ସାଧାରଣ ନିର୍ବାଚନ ପୂର୍ବରୁ ମୋ ଓଡ଼ିଶା କାର୍ଯ୍ୟକ୍ରମ କଲେଜରେ ହୋଇଥିବା ଛାତ୍ରୀଛାତ୍ର କହିଛନ୍ତି। ଅପରପକ୍ଷେ କଲେଜର ବାର୍ଷିକ କ୍ରୀଡ଼ା ପ୍ରତିଯୋଗିତା ଏବଂ ବାର୍ଷିକ ଉତ୍ସବ କରିବା ପାଇଁ ଛାତ୍ରୀଛାତ୍ର ବାରମ୍ବାର କଲେଜ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରି ଆସୁଛନ୍ତି। ମାତ୍ର କଲେଜ କର୍ତ୍ତୃପକ୍ଷ କେବଳ ନାନା ଆଳ ଦେଖାଇ କେବଳ ଦିନ ଗଡ଼ାଇ ଚାଲୁଥିବା ଛାତ୍ରୀଛାତ୍ର ଅଭିଯୋଗ କରିଛନ୍ତି।
ଏଭଳି ଅଭିଯୋଗ ନେଇ ଛାତ୍ରୀଛାତ୍ର ଝିପିଝିପି ବର୍ଷାପାଣିରେ ଭିଜି ଜିଲାପାଳଙ୍କ କାର୍ଯ୍ୟାଳୟକୁ ପଦଯାତ୍ରାରେ ଆସିଥିଲେ ଏବଂ କଲେଜ ପରିଚାଳନା କମିଟିର ସଭାପତି ତଥା ଅତିରିକ୍ତ ଜିଲାପାଳ ମଧୁଛନ୍ଦା ସାହୁଙ୍କୁ ଭେଟି ଦାବିପତ୍ର ପ୍ରଦାନ କରିଥିଲେ। ସାଧାରଣ ଘରୋଇ ସ୍କୁଲ, କଲେଜରେ ବାର୍ଷିକ କ୍ରୀଡ଼ା ପ୍ରତିଯୋଗିତା ଏବଂ ବାର୍ଷିକ ଉତ୍ସବ ପାଳନ କରାଯାଉ ଥିବାବେଳେ ଛାତ୍ରୀଛାତ୍ରମାନେ ସେଥିପାଇଁ ଉଦ୍ଦିଷ୍ଟ ବାର୍ଷିକ ଫି ପ୍ରଦାନ କରୁଥିବା ସତ୍ତ୍ୱେ ଜିଲା ହେଡ଼କ୍ୱାର୍ଟରରେ ଅବସ୍ଥିତ ଟ୍ରଷ୍ଟଫଣ୍ଡ୍ କଲେଜରେ ବାର୍ଷିକ କ୍ରୀଡ଼ା ପ୍ରତିଯୋଗିତା ଏବଂ ବାର୍ଷିକ ଉତ୍ସବ ପାଳନ କରାଯାଉ ନଥିବା ବିଡ଼ମ୍ବନାର ବିଷୟ ବୋଲି ଅତିରିକ୍ତ ଜିଲାପାଳଙ୍କଠାରେ ଅଭିଯୋଗ କରିଥିଲେ। ସେ ନେଇ କଲେଜ ଅଧ୍ୟକ୍ଷଙ୍କ ସହିତ ଆଲୋଚନା କରାଯାଇ ବିହିତ ପଦକ୍ଷେପ ନିଆଯିବ ବୋଲି ଅତିରିକ୍ତ ଜିଲାପାଳ ସାହୁ କହିଥିଲେ।
ତେବେ ଜିଲା ହେଡ଼ କ୍ୱାର୍ଟର ମଧ୍ୟରେ ରହିଥିବା କଲେଜରେ ଏଭଳି ଛାତ୍ର ଅଶାନ୍ତି ଏବେ ଚର୍ଚ୍ଚାର ବିଷୟ ହୋଇଛି। ତେବେ ଏ ସମ୍ପର୍କରେ କଲେଜ ଅଧ୍ୟକ୍ଷ ସରୋଜ କୁମାର ଦେବତାଙ୍କୁ ପଚାରିବାରୁ ସେ କହିଥିଲେ, ବିଗତ ଶନିବାର କଲେଜର ବିଭାଗୀୟ ମୁଖ୍ୟମାନଙ୍କ ବୈଠକରେ ନିଷ୍ପତ୍ତି ହୋଇଛି ଯେ, ଡିସେମ୍ବର ମାସ ୧୫ତାରିଖ ପରେ ଏବଂ ଆସନ୍ତାବର୍ଷ ଜାନୁୟାରୀ ଶେଷରେ ଉପଯୁକ୍ତ ସମୟରେ ଛାତ୍ରୀଛାତ୍ରଙ୍କ ବାର୍ଷିକ କ୍ରୀଡ଼ା ଏବଂ ସମୟ ଅନୁସାରେ ବାର୍ଷିକ ଉତ୍ସବ ମଧ୍ୟ ଅନୁଷ୍ଠିତ ହେବ। ତେବେ ଉକ୍ତ କଲେଜରେ ଦୀର୍ଘବର୍ଷ ଧରି କାହିଁକି ଛାତ୍ରୀଛାତ୍ରଙ୍କ ବାର୍ଷିକ କ୍ରୀଡ଼ା କିମ୍ବା କଲେଜର ବାର୍ଷିକ ଉତ୍ସବ ହେଉ ନଥିଲା ଏବଂ ସେଥିପାଇଁ ଛାତ୍ରୀଛାତ୍ରଙ୍କଠାରୁ ଆଦାୟ ଫି କୁଆଡ଼େ ଖର୍ଚ୍ଚ ହେଉଥିଲା, ତାହା ମଧ୍ୟ ତଦନ୍ତ ସାପେକ୍ଷ ବୋଲି କଲେଜ ଛାତ୍ରୀଛାତ୍ର କହିଛନ୍ତି।
