ପାରଳାଖେମୁଣ୍ଡି,୨୦ା୯(ଗିରିଧାରୀ ପରିଚ୍ଛା): ଅକ୍ଟୋବର ମାସ ଆସିଲେ ଗଜପତି ଜିଲାବାସୀଙ୍କ ମନରେ ଭୟ ପଶୁଛି। ଗତ ୧୦ ବର୍ଷ ହେଲା ଜିଲାବାସୀ ଏହି ମାସରେ କୌଣସି ନା କୌଣସି ପ୍ରାକୃତିକ ବିପର୍ଯ୍ୟୟର ସାମ୍ନା କରିଆସୁଛି। ଏଭଳି ସ୍ଥଳେ ପାଣିପାଗ ବିଭାଗ ଆଗକୁ ଏଲଲିନୋ ପ୍ରଭାବରୁ ବାତ୍ୟା ସମ୍ଭାବନା ଥିବା ସୂଚନା ଗଣମାଧ୍ୟମରେ ପ୍ରକାଶ ପରେ ଗଜପତିରେ ଭୂସ୍ଖଳନ ପ୍ରଭାବିତ ଅଞ୍ଚଳ ଚିହ୍ନଟ ହୋଇଥିବା ଅଞ୍ଚଳରେ ବସବାସ କରୁଥିବା ଲୋକଙ୍କ ମନରେ ଭୟ ଲାଗି ରହିଛି।
ପୂର୍ବରୁ ଗଜପତି ଜିଲା ହୁଡ୍ହୁଡ୍, ଫାଇଲିନ ଭଳି ବାତ୍ୟାକୁ ସାମ୍ନା କରି ଆଂଶିକ ପ୍ରଭାବିତ ହୋଇଥିଲା। ୨୦୧୮ ଅକ୍ଟୋବର ୧୦ରେ ତିତ୍ଲି ବାତ୍ୟାର କରାଳ ରୂପ ଲୋକଙ୍କ ମନରୁ ଏଯାଏ ଲିଭିନି। ବାତ୍ୟା ପ୍ରଭାବରେ ଜିଲାରେ ୪୩ଜଣ ପ୍ରାଣ ହରାଇଥିଲେ । ଏହି ମୃତକଙ୍କ ମଧ୍ୟରେ ରାୟଗଡ଼ ବ୍ଲକର ୩୯ଜଣ ଥିବାବେଳେ ୪ ଜଣ ଆର. ଉଦୟଗିରି ବ୍ଲକର ଥିଲେ।
ଏଥିସହ ୪୦ଟି ଗ୍ରାମ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା। ଉଚ୍ଚ ସ୍ଥାନରେ ରହିଆସୁଥିବା ଲୋକେ ଥଇଥାନ ପାଇଁ ଅନେକ ସମୟରେ ଜିଲା ପ୍ରଶାସନର ଦ୍ୱାରସ୍ଥ ହେଉଛନ୍ତି। ମାତ୍ର ପ୍ରଶାସନ କୌଣସି ପଦକ୍ଷେପ ନେଉ ନ ଥିବା ସଲିମ ଗମାଙ୍ଗ, ବୁରେନ ଭୂୟାଁ, ଅରେଶ ଚନ୍ଦ୍ର ଭୋମାଲ ପ୍ରମୁଖ ଗ୍ରାମବାସୀ ଅଭିଯୋଗ କରିଛନ୍ତି।
ତେବେ ଜିଲାର ୭ଟି ବ୍ଲକରେ ୧୩୬ଟି ସମ୍ବେଦନଶୀଳ ଅଞ୍ଚଳ ଚିହ୍ନଟ ହୋଇଛି। ଗୁମ୍ମା ବ୍ଲକରେ ୨୯ଟି ଅଞ୍ଚଳ, ରାୟଗଡ ବ୍ଲକରେ ୨୫ଟି, ଆର. ଉଦୟଗିରି ବ୍ଲକରେ ୭ଟି, ନୂଆଗଡ଼ ବ୍ଲକରେ ୧୨ଟି, ମୋହନା ବ୍ଲକରେ ୪୧ଟି, ଗୋସାଣି ବ୍ଲକରେ ୧୩ଟି ଓ କାଶୀନଗର ବ୍ଲକରେ ୯ଟି ଅଞ୍ଚଳକୁ ସମ୍ବେଦନଶୀଳ ଅଞ୍ଚଳ ଭାବେ ଚିହ୍ନଟ କରାଯାଇଛି।
ଅନ୍ୟପକ୍ଷରେ ଗଜପତି ଜିଲାକୁ କୌଣସି ପ୍ରାକୃତିକ ବିପର୍ଯ୍ୟୟ ଆସିବା ସୂଚନା ମିଳିଲେ, ମୁକାବିଲା ପାଇଁ ପଦକ୍ଷେପ ଗ୍ରହଣ କରାଯାଉଛି। ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରିବା, ନିରାପଦ ସ୍ଥାନରେ ଖାଇବା ବ୍ୟବସ୍ଥା କରାଯାଉଥିବା ଜିଲାପାଳ ମଧୁମିତା କହିଛନ୍ତି। ଉଚ୍ଚ ସ୍ଥାନରେ ରହୁଥିବା ଲୋକଙ୍କ ସମସ୍ୟାର ସ୍ଥାୟୀ ସମାଧାନ ଲାଗି ଚେଷ୍ଟା ଜାରି ରହିଥିବା ଜିଲାପାଳ କହିଛନ୍ତି।
