ପ୍ୟୋଙ୍ଗୟାଙ୍ଗ,୫।୩ : ମାର୍ଚ୍ଚ ୧୩ ରୁ ୨୩ ପର୍ଯ୍ୟନ୍ତ ଆମେରିକା ଏବଂ ଦକ୍ଷିଣ କୋରିଆ ମଧ୍ୟରେ ହୋଇଥିବା ସାମରିକ ଅଭ୍ୟାସକୁ ନେଇ ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ୍ ଚିନ୍ତିତ ଅଛନ୍ତି। ଏହି କାରଣରୁ କିମ ଜୋଙ୍ଗ ସରକାର ମିଳିତ ଜାତିସଂଘକୁ ଏହି ପ୍ରସଙ୍ଗରେ ସାମରିକ ଅଭ୍ୟାସ ବନ୍ଦ କରିବାକୁ ଦାବି କରିବା ଆରମ୍ଭ କରିଛନ୍ତି।
ରବିବାର ଦିନ ଉପ ବୈଦେଶିକ ମନ୍ତ୍ରୀ କିମ ସୋନ ଗିଆଙ୍ଗ ଉତ୍ତର କୋରିଆ ଗଣମାଧ୍ୟମରେ ଏକ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ ଏହି ଅଭ୍ୟାସ ଏବଂ ସହଯୋଗୀଙ୍କ ଉତ୍ତେଜନାମୂଳକ ମନ୍ତବ୍ୟ ଉତ୍ତର କୋରିଆ ଏବଂ ଦକ୍ଷିଣ କୋରିଆ ମଧ୍ୟରେ ତିକ୍ତତାକୁ ଅତ୍ୟନ୍ତ ବିପଜ୍ଜନକ ସ୍ତରକୁ ଠେଲି ଦେଇଛି। ସେଥିପାଇଁ ଏହାକୁ ତୁରନ୍ତ ବନ୍ଦ କରିବା ଉଚିତ।
ସେ କହିଛନ୍ତି ଯେ ମିଳିତ ଜାତିସଂଘ ଏବଂ ଅନ୍ତର୍ଜାତୀୟ ସମୁଦାୟ ଆମେରିକା ଏବଂ ଦକ୍ଷିଣ କୋରିଆକୁ ସେମାନଙ୍କ ଉତ୍ତେଜନାମୂଳକ ମନ୍ତବ୍ୟ ଏବଂ ମିଳିତ ସାମରିକ ଅଭ୍ୟାସକୁ ତୁରନ୍ତ ବନ୍ଦ କରିବାକୁ ଅନୁରୋଧ କରିବା ଆବଶ୍ୟକ।
ସିଓଲ ଏବଂ ୱାଶିଂଟନର ଅଧିକାରୀମାନେ ବଡ଼ ଧରଣର ୧୦ ଦିନିଆ ସାମରିକ ଅଭ୍ୟାସ ସମ୍ପର୍କରେ ଘୋଷଣା କରିବା ପରେ ଏହି ବିବୃତ୍ତି ଦିଆଯାଇଛି। ଜାତିସଂଘ ସୁରକ୍ଷା ପରିଷଦର ନିଷ୍ପତ୍ତି ଦ୍ୱାରା ନିଷିଦ୍ଧ ହୋଇଥିବା ଉତ୍ତର କୋରିଆର ବାଲିଷ୍ଟିକ କ୍ଷେପଣାସ୍ତ୍ର ଏବଂ ଆଣବିକ ଅସ୍ତ୍ର କାର୍ଯ୍ୟକ୍ରମ ଯୋଗୁ ବଢୁଥିବା ବିପଦକୁ ପ୍ରତିହତ କରିବା ପାଇଁ ଏହି ଅଭ୍ୟାସ ଆବଶ୍ୟକ ବୋଲି ଅଧିକାରୀମାନେ କହିଥିଲେ।
ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗଙ୍କ ମନ୍ତ୍ରୀ କିମ ସୋନ ମଧ୍ୟ ଆମେରିକା ଏବଂ ଦକ୍ଷିଣ କୋରିଆ ମଧ୍ୟରେ ସାମରିକ ଅଭ୍ୟାସକୁ ଧମକ ଦେଇଛନ୍ତି। ସେ କହିଛନ୍ତି ଯେ ଏହିପରି ଦାୟିତ୍ୱହୀନ କାର୍ଯ୍ୟ ଆଞ୍ଚଳିକ ସ୍ଥିତିକୁ ଏକ ଅତ୍ୟନ୍ତ ଗୁରୁତର ତଥା ଅନିୟନ୍ତ୍ରିତ ପର୍ଯ୍ୟାୟକୁ ନେଇଯିବ। ଏହା ଅତ୍ୟନ୍ତ ଦୁଃଖର ବିଷୟ ଯେ ଏହି ସାମରିକ ଅଭ୍ୟାସ ନେଇ ଜାତିସଂଘ କ୍ରମାଗତ ଭାବରେ ନୀରବ ରହିଆସିଛି।
