ବରଗଡ଼,୨୨।୧୧(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ଖରିଫ ଧାନ ଅମଳ ଚଳିତ ମାସ ପହିଲାରୁ ଜୋର୍ ଧରିଛି। ଅଥଚ ଏପର୍ଯ୍ୟନ୍ତ ଜିଲାରେ ଧାନ ସଂଗ୍ରହ ପ୍ରକ୍ରିୟା ହୋଇନାହିଁ। ପୂର୍ବରୁ ନଭେମ୍ବର ମାସ ପ୍ରଥମ କିମ୍ବା ଦ୍ୱିତୀୟ ସପ୍ତାହ ସୁଦ୍ଧା ଜିଲାରେ ଧାନ କିଣାବିକା ଆରମ୍ଭ ହେଉଥିଲା। ମାତ୍ର ଏଥର ପ୍ରଥମଥର ପାଇଁ ଚଳିତମାସ ଶେଷ ସପ୍ତାହ ଅର୍ଥାତ୍ ଆସନ୍ତା ୨୮ତାରିଖରୁ ଜିଲାରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ କରିବା ପାଇଁ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ନିଷ୍ପତ୍ତି ହୋଇଛି। ସେହିପରି ବିଭିନ୍ନ ରାଇସ୍ ମିଲ୍ର ଗୋଦାମଗୁଡ଼ିକ ବିଗତ ଖରିଫ ଏବଂ ରବି ଧାନ ସଂଗ୍ରହ ପ୍ରକ୍ରିୟାର ଧାନ, ଚାଉଳରେ ପୂରି ରହିଛି। ଏଭଳି ସ୍ଥଳେ ରାଇସ୍ ମିଲ୍ରେ ଗଚ୍ଛିତ ଚାଉଳ ଉଠା ନ ଗଲେ ଏବଂ ଅନ୍ୟ ଦାବି ସମୂହ ପୂରଣ ନ ହେଲେ ଆଗାମୀ ଧାନ ସଂଗ୍ରହ ପ୍ରକ୍ରିୟାରେ ଅସହଯୋଗ କରିବେ ବୋଲି ଅଲ୍ ଓଡ଼ିଶା ମିଲର୍ସ ଆସୋସିଏଶନ ମଧ୍ୟ ପୂର୍ବରୁ ଚେତାବନୀ ଦେଇ ସାରିଛି। ଗୋଟିଏ ପଟେ ବିଳମ୍ବିତ ଧାନ ସଂଗ୍ରହ ପ୍ରକ୍ରିୟା ଏବଂ ଅନ୍ୟପଟେ ମିଲର୍ସଙ୍କ ଅସହଯୋଗ ଯୋଗୁ ଏଥର ଆରମ୍ଭରୁ ଧାନବିକ୍ରିରେ ଅଚଳାବସ୍ଥା ପରିସ୍ଥିତି ଉପୁଜିବା ଆଶଙ୍କା ଦେଖାଯାଇଛି। କେବଳ ସେତିକି ନୁହେଁ, ପାଣିପାଗ ବିଭାଗ ମଧ୍ୟ ଲଘୁଚାପ ଜନିତ ବର୍ଷା ତଥା ବାତ୍ୟା ସୂଚନା ଦେଉଛି। ଏହାହେଲେ ଏଥର ଜିଲାର ଅନ୍ୟବର୍ଷ ତୁଳନାରେ ଅଧିକ କ୍ଷତି ସହିବାକୁ ପଡ଼ିବ ବୋଲି ଚାଷୀମାନେ ଚିନ୍ତିତ ହୋଇ ପଡ଼ିଛନ୍ତି।
ସୂଚନା ଅନୁଯାୟୀ, ସାଧାରଣତଃ ଅକ୍ଟୋବର ମାସ ଶେଷ ସପ୍ତାହ ସୁଦ୍ଧା ଜିଲାରେ ଖରିଫ୍ ଧାନ ସଂଗ୍ରହ ପାଇଁ ଜିଲାସ୍ତରୀୟ ଧାନ ସଂଗ୍ରହ ପ୍ରସ୍ତୁତି ବୈଠକ ସରିଯାଇଥାଏ। ଉକ୍ତ ବୈଠକରେ ଜିଲାରେ ଧାନ ସଂଗ୍ରହ ପାଇଁ ନୀତି ନିର୍ଦ୍ଧାରଣ କରାଯାଏ। ବୈଠକ ପୂର୍ବରୁ ଧାନ ବିକ୍ରି ପାଇଁ ଯୋଗ୍ୟ ଚାଷୀଙ୍କ ପଞ୍ଜୀକରଣ ପ୍ରକ୍ରିୟା ଶେଷ ହେଉଥିଲା। ମାତ୍ର ଏଥର ତାହା ହୋଇ ନ ଥିଲା। ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମ ଅନୁଯାୟୀ, ଗତ ୧୦ତାରିଖରେ ଜିଲା ପ୍ରଶାସନ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକ ଡାକିଥିଲା। ମାତ୍ର ଶେଷ ମୁହୂର୍ତ୍ତରେ ନୂଆପଡ଼ା ଉପନିର୍ବାଚନ ଆଳ ଦେଖାଇ ଏହି ବୈଠକକୁ ବାତିଲ୍ କରି ଦିଆଗଲା। ଅନ୍ୟପଟେ ସେହିଦିନଠାରୁ ଧାନବିକ୍ରି ପଞ୍ଜୀକରଣ ଦାବିରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ୧୧ଦିନ ଧରି ଅହୋରାତ୍ର ଚାଷୀଙ୍କ ଧାରଣା ଚାଲିଥଲା। ତେବେ ଇତିମଧ୍ୟରେ ଗତ ୧୫ତାରିଖରେ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକ ବସିଥିବାବେଳେ ୨୦ତାରିଖରେ ଅତାବିରା ବିଧାୟକ ନିହାର ରଞ୍ଜନ ମହାନନ୍ଦଙ୍କ ପ୍ରତିଶ୍ରୁତି ପରେ ଜିଲାପାଳଙ୍କ କାର୍ଯ୍ୟାଳୟ ଆଗରେ ଚାଲିଥିବା ଚାଷୀଙ୍କ ଧାରଣା ଉଠିଛି। ଏହାସତ୍ତ୍ୱେ ଜିଲାରେ ଧାନ ସଂଗ୍ରହ ପ୍ରକ୍ରିୟା ନେଇ ଦ୍ୱନ୍ଦ୍ୱ ଦୂର ହୋଇନାହିଁ। ୨୮ତାରିଖ ସୁଦ୍ଧା ପଞ୍ଜୀକରଣରୁ ବଞ୍ଚତ୍ତ ଚାଷୀଙ୍କୁ ଧାନ ବିକ୍ରି ପାଇଁ ପଞ୍ଜୀକରଣ କରା ନ ଗଲେ ଚାଷୀମାନେ ପୁଣି ଆନ୍ଦୋଳନକୁ ଓହ୍ଲାଇବା ପାଇଁ ଚେତାବନୀ ଦେଇଛନ୍ତି।
ସେହିପରି ଜିଲାର ରାଇସ୍ ମିଲ୍ ଗୋଦାମଗୁଡ଼ିକ ଗତବର୍ଷ ଖରିଫ ଏବଂ ରବି ଋତୁର ଚାଉଳ ଓ ଧାନରେ ପୂରି ରହିଛି। ଏଭଳି ସ୍ଥିତିରେ ଜିଲାରେ ଆସନ୍ତା ୨୮ତାରିଖରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେଲେ ମଣ୍ଡିକୁ ବିକ୍ରି ପାଇଁ ଧାନ ଆସିବ କିନ୍ତୁ ମିଲର୍ସମାନେ ଧାନ ଉଠାଣରେ ତପତ୍ରତା ଦେଖାଇବା ଭଳି ମନେ ହେଉନାହିଁ। ଜିଲାର ଜଣେ ମିଲର୍ସ କହିଛନ୍ତି, ଗତବର୍ଷ ଖରିଫ୍ରେ ମିଲର୍ସଙ୍କୁ କଷ୍ଟମ ମିଲିଂ ପାଇଁ ଯୋଗାଣ ବିଭାଗ ଦେଇଥିବା ଧାନ ଅନୁପାତରେ ଚାଉଳ ଉଠାଯାଇନାହିଁ। ସେହିପରି ରବି ଧାନ ସଂଗ୍ରହ ପ୍ରକ୍ରିୟାରେ ମିଳିଥିବା ଧାନ ଶତ ପ୍ରତିଶତ ରାଇସ୍ ମିଲ ଗୋଦାମଗୁଡ଼ିକରେ ପୂରି ରହିଛି। ଏଭଳି ସ୍ଥଳେ ରାଇସ୍ ମିଲ୍ ଗୋଦାମରେ ପୁଣି ଧାନ ଗଚ୍ଛିତ ରଖିବା ପାଇଁ ଜାଗା ନାହିଁ। ସରକାର ଧାନ କିଣନ୍ତୁ ଏବଂ ନିଜ ଗୋଦାମରେ ଗଚ୍ଛିତ ରଖନ୍ତୁ । ମିଲର୍ସମାନଙ୍କ ଆବଶ୍ୟକତା ଅନୁସାରେ କଷ୍ଟମ ମିଲିଂରେ ମିଲର୍ସଙ୍କୁ ଧାନ ଦିଆଯାଉ। ଜିଲାରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ନ ହେଉଣୁ ଏଭଳି ସ୍ଥିତିରୁ ଆଗାମୀ ଦିନରେ ଏଠାରେ ଧାନ ସଂଗ୍ରହ ପ୍ରକ୍ରିୟା କେତେ ଜଟିଳ ହୋଇପଡ଼ିବ ତାହା ବାରି ହୋଇପଡୁଛି।
Dharitri – Odisha’s No.1 Odia Daily
