ବାପ ମା’ ଛେଉଣ୍ଡ ଛାତ୍ରଙ୍କୁ ଗ୍ରହଣ ସହ ଶିକ୍ଷା ପାଇଁ ପ୍ରତିଶ୍ରୁତି
11:23 amSeptember 27, 2023September 27, 2023 / 09

ମାଲକାନଗିରି, ୨୭।୯(ଦୁର୍ଯ୍ୟୋଧନ ପାତ୍ର):ମାଲକାନଗିରି ଜିଲା ରୋଟାରି କ୍ଲବ ତରଫରୁ ମଙ୍ଗଳବାର ଏକ ବାପ ମା ଚେଉଣ୍ଡ ଛାତ୍ରଙ୍କୁ ପୋଷ୍ୟ ଭାବେ ଗ୍ରହଣ କରି ଉଚ୍ଚ ଶିକ୍ଷା ପାଇଁ ସମସ୍ତ ଦାୟିତ୍ୱ ନେବା ସହ ଭୁବନେଶ୍ୱର ସ୍ଥିତ କିସ୍‌ରେ ପାଠ ପଢାଇବା ପାଇଁ ମାଲକାନଗିରି ବସ୍‌ ଷ୍ଟାଣ୍ଡରୁ ବିଦାୟ ଦେଇଥିଲେ।
ପ୍ରକାଶ ଯେ, କାଲିମେଳା ବ୍ଲକ ଲଛିପେଟା ଗ୍ରାମର କମଳୁ ପାଙ୍ଗୀଙ୍କ ପୁତ୍ର ହରିଚନ୍ଦ୍ର ବାଲ୍ୟକାଳରୁ ନିଜ ପିତାଙ୍କୁ ହରାଇଥିଲେ। କିଛିବର୍ଷ ପୂର୍ବେ ତାଙ୍କ ମାଙ୍କର ମଧ୍ୟ ସର୍ପାଘାତରେ ମୃତ୍ୟୁ ହୋଇଥିଲା। ହରିଚନ୍ଦ୍ର ୧୦ମ ଶ୍ରେଣୀରେ ପାଠ ପଢୁଥିବା ସମୟରେ ମାତାଙ୍କ ମୃତ୍ୟୁ ଯୋଗୁ ପାଠ ପଢୁ ନ ଥିଲେ। ଅନାଥ ହୋଇ ଯିବା ଯୋଗୁ ସେ ମାଲକାନଗିରି ଆସି କୌଣସି ଏକ ଦୋକାନରେ କାମ କରିବା ପାଇଁ ବୁଲୁଥିଲେ। ଏହି ଖବର ଜିଲା ରୋଟାରି କ୍ଲବ ସଭାପତି ଜି. ଶ୍ୟାମବାବୁ ଦୋରା ଓ ସମ୍ପାଦକ ଈଶ୍ୱର ରାଓ ଜାଣିଲା ପରେ ରାଜ୍ୟ ରୋଟାରି କ୍ଲବ ସହ ଯୋଗାଯୋଗ କରି କିସ୍‌ରେ ଶିକ୍ଷା ଗ୍ରହଣ କରିବା ଲାଗି ତାଙ୍କ ପାଇଁ ଏକ ସିଟ୍‌ ବ୍ୟବସ୍ଥା କରିଥିଲେ। ମଙ୍ଗଳବାର ହରିଚନ୍ଦ୍ରଙ୍କୁ ରୋଟାରି କ୍ଲବ ତରଫରୁ ପୋଷ୍ୟ ଭାବେ ଗ୍ରହଣ କରାଯାଇ ସେ ଯେତେ ପର୍ଯ୍ୟନ୍ତ ଶିକ୍ଷା ଗ୍ରହଣ କରିବେ ସେହି ପର୍ଯ୍ୟନ୍ତ ରୋଟାରି କ୍ଲବ ସମସ୍ତ ଖର୍ଚ୍ଚ କରିବେ ବୋଲି ବସ୍‌ଷ୍ଟାଣ୍ଡରେ ପାଙ୍ଗୀଙ୍କୁ ଭୁବନେଶ୍ୱର ପଠାଇଛନ୍ତି।