ଫୁଲବାଣୀ ଅଫିସ,/ବାଲିଗୁଡ଼ା(ଡି.ଏନ୍.ଏ.)୧୭।୯: କନ୍ଧମାଳ ଜିଲା ବାଲିଗୁଡ଼ା ଥାନା ଅଞ୍ଚଳରେ ୨ଟି ହତ୍ୟାକାଣ୍ଡ ଘଟିଛି। ଗୁରୁବାର ରେବିଙ୍ଗିଆ ଗ୍ରାମର ବ୍ୟବସାୟୀ ନବଘନ ସାହୁଙ୍କୁ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାରେ ଅଭିଯୁକ୍ତ ତାଙ୍କ ପଡ଼ୋଶୀ ଭୀମ ବେହେରାଙ୍କୁ ଶୁକ୍ରବାର ଗିରଫ କରାଯାଇଛି। ସେହିପରି ଅନ୍ୟ ଏକ ହତ୍ୟାକାଣ୍ଡ ପରମପାଙ୍ଗା ପାଖ ପାଙ୍ଗୁରମିଲା ଗ୍ରାମରେ ଘଟିଛି ା ବାପା ନିଜ ପୁଅଙ୍କୁ ହତ୍ୟା କରି ମାଟି ତଳେ ପୋତି ଦେଇଛନ୍ତି। ହତ୍ୟାକାଣ୍ଡରେ ଅନ୍ୟ ଦୁଇ ପୁଅ ମଧ୍ୟ ସାମିଲ ଅଛନ୍ତି। ଘଟଣାର ୪ ଦିନ ପରେ ଏହା ପଦାକୁ ଆସିଛି । ପରମପାଙ୍ଗା ସରପଞ୍ଚ ରମେଶ ମଲ୍ଲିକଙ୍କ ଅଭିଯୋଗ କ୍ରମେ ପୋଲିସ ଅଭିଯୁକ୍ତ ବାପା ଏବଂ ଦୁଇ ପୁଅଙ୍କୁ ଅଟକ ରଖି ଅଧିକ ତଦନ୍ତ ଚଳାଇଛି।
ପାଙ୍ଗୁରମିଲା ଗ୍ରାମର ଭାସ୍କର ପୂଜାରୀ ଓ ପୁଅ ଚୈତନ୍ୟ (୨୧)ଙ୍କ ମଧ୍ୟରେ କୌଣସି କାରଣରୁ ଅଧିକାଂଶ ସମୟରେ ଝଗଡ଼ା ଲାଗି ରହୁଥିଲା। ଏଥିରେ ପ୍ରତିଶୋଧ ପରାୟଣ ହୋଇ ଗତ ମଙ୍ଗଳବାର ଭାସ୍କର, ଅନ୍ୟ ଦୁଇ ପୁଅ ପ୍ରଫୁଲ୍ଲ ଏବଂ ଜାମ୍ବେବନଙ୍କ ସହ ମିଶି ଚୈତନ୍ୟଙ୍କୁ ହତ୍ୟା କରିଥିଲେ। କେହି ଜାଣିବା ପୂର୍ବରୁ ସେମାନେ ମୃତଦେହକୁ ନେଇ ଗ୍ରାମ ନିକଟ ଜଙ୍ଗଲରେ ପୋତି ଦେଇଥିଲେ। ଚୈତନ୍ୟଙ୍କୁ ଗ୍ରାମବାସୀ ଦେଖୁ ନ ଥିବାରୁ ତାଙ୍କ ପରିବାର ଲୋକଙ୍କୁ ପଚାରିଥିଲେ। ହେଲେ ସେମାନେ କୌଣସି ଉତ୍ତର ଦେଉ ନ ଥିଲେ। ସନ୍ଦେହ ହେବାରୁ ଗ୍ରାମବାସୀ ଏ ସମ୍ପର୍କରେ ସରପଞ୍ଚଙ୍କୁ ଜଣାଇଥିଲେ। ସରପଞ୍ଚ ବାଲିଗୁଡ଼ା ଥାନାରେ ଏତଲା ଦେଇଥିଲେ। ସରପଞ୍ଚଙ୍କ ଏତଲାକୁ ଭତ୍ତି କରି ପୋଲିସ ଗୁରୁବାର ଭାସ୍କର, ପ୍ରଫୁଲ୍ଲ, ଜାମ୍ବେବନଙ୍କୁ ଅଟକ ରଖି ପଚରାଉଚୁରା କରିଥିଲା। ଶୁକ୍ରବାର ପୋଲିସ ସାଇଟିଫକ୍ ଟିମ୍ ସହ ଘଟଣାସ୍ଥଳକୁ ଯାଇ ମାଜିଷ୍ଟ୍ରେଟ ଶଶାଙ୍କ ଶେଖର ପାତ୍ରଙ୍କ ଉପସ୍ଥିତିରେ ମାଟି ଖୋଳି ମୃତଦେହକୁ ବାହାର କରି ବ୍ୟବଚ୍ଛେଦ ପାଇଁ ପଠାଇଥିଲା। ଏ ନେଇ ଭାସ୍କର କହିଛନ୍ତି ପୁଅ ସବୁବେଳେ ନିଶା ଖାଇ ହଇରାଣ କରୁଥିଲେ। ସେ ନିଜେ ରଶି ଲାଗାଇ ଆତ୍ମହତ୍ୟା କରିଛି, ମଁୁ ତାକୁ ମାରି ନାହିଁ। କିନ୍ତୁ କାହିଁକି ମାଟି ତଳେ ପୋତିଲ ବୋଲି ପଚାରିବାରୁ ସେ କିଛି କହି ନାହାନ୍ତି। ତେବେବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ଥାନା ଅଧିକାରୀ ବାବାଶଙ୍କର ସରାଫ କହିଛନ୍ତି।
