ଶ୍ରୀନଗର,୨୨ ।୮: ଜମ୍ମୁ-କଶ୍ମୀରରେ ନ୍ୟାଶନାଲ କଫରେନ୍ସର ଅଧ୍ୟକ୍ଷ ଫାରୁକ ଅବଦୁଲ୍ଲାଙ୍କ ଘରେ ଶ୍ରୀନଗରରେ ସର୍ବଦଳୀୟ ବୈଠକ ଆୟୋଜିତ ହୋଇଛି । ରାଜ୍ୟରେ ରହୁଥିବା ରାଜ୍ୟ ବାହାରର ଲୋକଙ୍କୁ ନିର୍ବାଚନ କମିଶନ ଦେଇଥିବା ମତଦାନ ଅଧିକାରକୁ ନେଇ ଅବଦୁଲ୍ଲା ଜମ୍ମୁ-କଶ୍ମୀରର ସମସ୍ତ ରାଜନୈତିକ ଦଳଙ୍କର ଏକ ବୈଠକ ଡାକିଥିଲେ । ଏହି ବୈଠକରେ ପିଡିପି ମୁଖ୍ୟ ମେହେବୁବା ମୁଫତି ବି ଯୋଗ ଦେଇଥିଲେ । ତେବେ ବୈଠକରେ ଯୋଗ ଦେଇଥିବା ସମସ୍ତ ନେତା ରାଜ୍ୟରେ ହେବାକୁ ଯାଉଥିବା ନୂଆ ଭୋଟର ତାଲିକା ବା ରାଜ୍ୟ ବାହାରର ଭୋଟରଙ୍କୁ ନେଇ ଆପତ୍ତି ଉଠାଇଥିଲେ ।
ନ୍ୟାଶନାଲ କନଫରେନ୍ସର ନେତା ତଥା ଜମ୍ମୁ-କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା କହିଛନ୍ତି ବୈଠକରେ ଏହା ସ୍ଥିର ହେଲା କି ଆମେ ଜମ୍ମୁ-କଶ୍ମୀର ବାହାରର ଲୋକଙ୍କୁ ଏଠାରେ ଦିଆଯାଇଥିବା ମତଦାନ ଅଧିକାରକୁ ବିରୋଧ କରୁଛୁ । ସେ କହିଛନ୍ତି ଏମିତି କରି କେନ୍ଦ୍ର ସରକାର ଜମ୍ମୁ-କଶ୍ମୀରର ରାଜନୈକ ଦିଶାକୁ ବଦଳାଇବାକୁ ଚେଷ୍ଟା କରୁଛନ୍ତି । ଫାରୁକ ଅବଦୁଲ୍ଲା କହିଛନ୍ତି ଯେଉଁମାନେ ଏଠିକାର ବାସିନ୍ଦା ନୁହେଁ ସେମାନଙ୍କୁ କିପରି ମତଦାନର ଅଧିକାର ଦିଆଯିବ ।
ସୂଚନାଯୋଗ୍ୟ, ଗତ ବୁଧବାର ରାଜ୍ୟ ନିର୍ବାଚନ କମିଶନ କହିଥିଲେ କି ରାଜ୍ୟ ବାହାରର ଯେଉଁ ଲୋକେ ଜମ୍ମୁ-କଶ୍ମୀରରେ ରହୁଛନ୍ତି, ସେମାନେ ବିନା ଆବାସ ପ୍ରମାଣ ପତ୍ରରେ ଭୋଟର ତାଲିକାରେ ନାମ ପଞ୍ଜିକରଣ କରିପାରିବେ ଓ ଆସନ୍ତା ବିଧାନସଭା ନିର୍ବାଚନରେ ଭୋଟ ଦେଇ ପାରିବେ । ଏବେ ଏହାକୁ ନେଇ ଘାଟିରେ ରାଜନୀତି ହୋଇଛି ସରଗରମ ।
