ଭଦ୍ରକ ଅଫିସ, ୪ା୭: ନିଅଣ୍ଟିଆ ବର୍ଷା ଯୋଗୁ ଭଦ୍ରକ ଜିଲାର ବିଭିନ୍ନ ଅଞ୍ଚଳରେ ଚାଷଜମି ଶୁଖିଲା ପଡ଼ିଛି। ଜୁଲାଇ ବେଳକୁ ଜମିରେ ଧାନ ତଳି ପକା କାର୍ଯ୍ୟ ସରି ରୁଆ ଆରମ୍ଭ ହେବା କଥା। କିନ୍ତୁ ପାଣି ଅଭାବରୁ ଚାଷଜମି ଗୋରୁଙ୍କ ଚାରଣ ଭୂମି ପାଲଟିଛି। ଏପଟେ ଚାଷୀମାନେ ବିଳମ୍ବିତ ମୌସୁମୀ ବର୍ଷାକୁ ନେଇ ଚିନ୍ତାରେ ଅଛନ୍ତି। ବିଳମ୍ବରେ ଚାଷ ଆରମ୍ଭ ହେଲେ ଅମଳ କମିବା ଆଶଙ୍କା ସହ ରୋଗ ପୋକ ସଂକ୍ରମଣ ବଢ଼ିବାର ସମ୍ଭାବନା ରହିଛି। ଜୁନ୍ ୨ୟ ସପ୍ତାହରେ ମୌସୁମୀ ବର୍ଷା ଓଡ଼ିଶାେରେ ପହଞ୍ଚିବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ସୂଚନା ପ୍ରକାଶ ପାଇବା ପରେ ସଅଳ ତଳି ପକାଇ ରୁଆ ଆରମ୍ଭ ହୋଇଯିବ ବୋଲି ଚାଷୀମାନେ ଆଶା ବାନ୍ଧିଥିଲେ। ସାଧାରଣତଃ ରଜ ପରେ ଅର୍ଥାତ୍ ଜୁନ୍ ୩ୟ ସପ୍ତାହରେ ତଳିପକା କାମ ଆରମ୍ଭ ହୁଏ। କିନ୍ତୁ ଚଳିତବର୍ଷ ଜୁନ୍ ମାସରେ ସ୍ବାଭାବିକଠାରୁ କମ୍ ବର୍ଷା ହୋଇଥିବାରୁ ଏପର୍ଯ୍ୟନ୍ତ ତଳି ପଡ଼ି ପାରିନାହିଁ। କେବେ ବିଲରେ ପାଣି ହେବ ତଳି ପଡ଼ିବ ସେ ନେଇ ଅନିଶ୍ଚିତତା ଭିତରେ ରହିଛନ୍ତି ଚାଷୀ। ଅପରପକ୍ଷେ ସ୍ବଳ୍ପ ବୃଷ୍ଟିପାତ ଯୋଗୁ ଜମିରେ ଅନାବନା ଘାସ ବୃଦ୍ଧି ପାଉଥିବାରୁ ଘାସ ଦମନ ଚାଷୀଙ୍କ ଚିନ୍ତା ବଢ଼ାଇଛି।
ମୁଖ୍ୟ କୃଷି ଅଧିକାରୀ ଉଦିତ୍ କୁମାର ରାୟଙ୍କ ସୂଚନା ଅନୁଯାୟୀ, ଜିଲାରେ ଚଳିତବର୍ଷ ୧ ଲକ୍ଷ ୭୪ ହଜାର ୬୩ ହେକ୍ଟର ଜମିରେ ଚାଷ କରାଯିବା ପାଇଁ ଲକ୍ଷ୍ୟ ରହିଛି। ସେଥିମଧ୍ୟରୁ ୧ ଲକ୍ଷ ୬୧ ହଜାର ୫ଶହ ହେକ୍ଟର ଜମିରେ ଧାନ ଓ ୧୨ ହଜାର ୫୬୩ ହେକ୍ଟର ଜମିରେ ଅଣଧାନ ଚାଷ କରାଯିବ। ବର୍ତ୍ତମାନ ସୁଦ୍ଧା ସେଥିମଧ୍ୟରୁ ୧୭ ହଜାର ୫୮୨ ହେକ୍ଟର ଜମିରେ ଧାନ ବୁଣା ହୋଇଛି। ୧୮୨୮ ହେକ୍ଟର ଜମିରେ ତଳିପକା ହୋଇଥିବା ବେଳେ ସେଥିମଧ୍ୟରୁ ୧୩୮୩ ହେକ୍ଟର ଜମିରେ ଖରାଟିଆ ତଳି ଓ ୪୪୫ ହେକ୍ଟର ଜମିରେ ଆର୍ଦ୍ର ତଳି ପକାଯାଇଛି।