ରାଇକିଆ,୧୨ା୧୧(ପ୍ରଦୀପ ବେହେରା): ଲୋକଙ୍କୁ ରୋଜଗାର ଯୋଗାଇବା ଏବଂ ବିଭିନ୍ନ ପ୍ରକାର ଚାଷ କାର୍ଯ୍ୟ ପାଇଁ ଯୋଜନା କରି ଚାଷୀଙ୍କୁ ସ୍ବାବଲମ୍ବୀ କରିବା ପାଇଁ ସରକାର ବିଭିନ୍ନ ଯୋଜନା ପ୍ରଣୟନ କରୁଛନ୍ତି। ଚାଷୀ ମଧ୍ୟ ସରକାରଙ୍କ ଯୋଜନା ଉପରେ ଭରସା କରି ଅର୍ଥ ବିନିଯୋଗ କରି ଚାଷ କାର୍ଯ୍ୟ ଆରମ୍ଭ କରୁଛନ୍ତି। କିନ୍ତୁ ପରବର୍ତ୍ତୀ ସମୟରେ ବିଭାଗ ତରଫରୁ କୌଣସି ଖର୍ଚ୍ଚ ଅର୍ଥ ଦିଆଯାଉନାହିଁ। ଫଳରେ ବ୍ୟାପକ କ୍ଷତି ସହୁଛନ୍ତି ହିତାଧିକାରୀ। ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ରାଇକିଆ ମୃତ୍ତିକା ସଂରକ୍ଷଣ ବିଭାଗ ଅଧୀନରେ ସିପିଏସ୍ଏଲ୍ ଯୋଜନାରେ କାମ କରିଥିବା ହିତାଧିକାରୀଙ୍କ କ୍ଷେତ୍ରରେ। ୨୦୨୫/୨୬ବର୍ଷ ଜୁଲାଇ ମାସରେ ୮୭ ଜଣ ହିତାଧିକାରୀ କଫି ଚାଷକୁ ପ୍ରୋତ୍ସାହନ ପାଇଁ କାର୍ଯ୍ୟକାରୀ ହେଉଥିବା ମିଶ୍ରିତ ଛାୟା ବଗିଚା ଯୋଜନାରେ ନିଜ ଜମିରେ ପ୍ରତ୍ୟେକ ଏକର ପିଛା ପାଖା ପାଖି ୫୫୦୦୦ରୁ ୬୦ ହଜାର ଟଙ୍କା ଖର୍ଚ୍ଚ କରି ୨୨୦୦ ଗଛ ଲଗାଇଥିଲେ। ସମସ୍ତ ଖର୍ଚ୍ଚ ଟଙ୍କା ହିତାଧିକାରୀଙ୍କ ବ୍ୟାଙ୍କ ଖାତାରେ ସିଧାସଳଖ ଜମା କରାଯିବା ବୋଲି ବିଭାଗ ତରଫରୁ କୁହାଯାଇଥିଲା। ଇତିମଧ୍ୟରେ ଚାରି ମାସ ବିତି ଯାଇଥିଲେ ମଧ୍ୟ ହିତାଧିକାରୀଙ୍କ ଖାତାକୁ ଟଙ୍କାଟିଏ ମଧ୍ୟ ଯାଇନାହିଁ।
ଅପରପକ୍ଷେ ଧାର ଉଧାର କରି କାମ ସମ୍ପୂର୍ଣ୍ଣ କରିଥିବା ହିତାଧିକାରୀ ଏବେ ଟଙ୍କା ନ ପାଇ ମୁଣ୍ଡରେ ହାତ ଦେଇ ବସିଛନ୍ତି। ପ୍ରତ୍ୟେକଦିନ ରାଇକିଆସ୍ଥିତ ବିଭାଗୀୟ କାର୍ଯ୍ୟାଳୟକୁ ଯାଇ ନିରାଶ ହୋଇ ଫେରୁଛନ୍ତି। ଏହି ଟଙ୍କା ମୃତ୍ତିକା ସଂରକ୍ଷଣ ବିଭାଗର ଜିଲା କାର୍ଯ୍ୟାଳୟରୁ ହିଁ ମିଳିପାରିବ ବୋଲି କହିବା ସହ ଜିଲା କାର୍ଯ୍ୟାଳୟକୁ ଯୋଗାଯୋଗ କରିବା ପାଇଁ ସ୍ଥାନୀୟ ଅଧିକାରୀ କହୁଥିବା ନେଇ ଅଭିଯୋଗ ପାଇଁ ଆସିଥିବା ହିତାଧିକାରୀମାନେ କହିଛନ୍ତ। ଏ ନେଇ ସେମାନେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିବା ସହ ଲିଖିତ ଅଭିଯୋଗ କରିବେ ବୋଲି କହିଛନ୍ତି।
