ବରଗଡ଼,୧୮ା୩(ପ୍ରେମାନନ୍ଦ ଖମାରୀ):ବରଗଡ଼ ଜିଲାକୁ ରାଜ୍ୟର ଭାତହାଣ୍ଡି କୁହାଯାଏ, ମାତ୍ର ଏହି ଜିଲାରେ ଚାଷ ଏବଂ ଚାଷୀ ସମସ୍ୟା ଅସମାହିତ ରହିଛି। ଏହି କ୍ରମରେ ମଙ୍ଗଳବାର ବରଗଡ଼ ଜିଲା ଚାଷୀ ସଙ୍ଗଠନ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ବିଭିନ୍ନ ସମସ୍ୟା ସମାଧାନ ଦାବିରେ ଜିଲାପାଳ ଆଦିତ୍ୟ ଗୋୟଲଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଦାବିପତ୍ରରେ ୭ଦଫା ଦାବି କରାଯାଇଛି ଏବଂ ଦାବିପତ୍ରରେ ଉଲ୍ଲେଖିତ ସମସ୍ୟାର ସମାଧାନ ପାଇଁ ବିହିତ ପଦକ୍ଷେପ ନେବାକୁ ମୁଖ୍ୟମନ୍ତ୍ରୀଙ୍କୁ ନିବେଦନ କରାଯାଇଛି।
ଦାବିପତ୍ରରେ ଉଲ୍ଲେଖ ରହିଛି, ଏଥର ରବିଧାନ ସଂଗ୍ରହ ପ୍ରକ୍ରିୟା ପାଇଁ ପଞ୍ଜୀକରଣ ଅବଧି କମ୍ ରହିଛି। ଏହାକୁ ଅତିକମ୍ରେ ଆହୁରି ଅଧିକ ଏକ ସପ୍ତାହ ବୃଦ୍ଧି କରିବାକୁ ଦାବି ହୋଇଛି। ସେହିପରି ସମବାୟ ସଂସ୍ଥାରୁ କୃଷିଋଣ ଉଠାଇବା ପାଇଁ ଜମିକୁ ବନ୍ଧକନାମା ଦେବା ସକାଶେ ଦିଆଯାଇଥିବା ନୂତନ ନିର୍ଦ୍ଦେଶକୁ ପ୍ରତ୍ୟାହାର, ଆବଶ୍ୟକତା ଥିବା ଚାଷ ପାଇଁ ଚାଷୀଙ୍କୁ ପ୍ରୋତ୍ସାହନ ରାଶି ଦେବା ସହିତ ଉପଯୁକ୍ତ ବଜାର ବ୍ୟବସ୍ଥା କରାଯିବା, କ୍ରୟକାରୀ ସଂସ୍ଥା ଧାନକ୍ରୟର ସମ୍ପୂର୍ଣ୍ଣ ଦାୟିତ୍ୱ ବହନ କରିବା, ବରଗଡ଼ ଜିଲାରେ ଆଖୁଚାଷକୁ ଗୁରୁତ୍ୱ ଦେଇ ଚିନିକଳଠାରେ ଏକ ଇଥାନଲ ପ୍ରସ୍ତୁତକାରୀ ଆଖୁ ମିଲ୍ କାର୍ଯ୍ୟକ୍ଷମ କରାଯିବାକୁ ଦାବିପତ୍ରରେ ଉଲ୍ଲେଖ କରାଯାଇଛି।
ତେବେ ସମବାୟ କ୍ଷେତ୍ର ବ୍ୟତୀତ ଅନ୍ୟାନ୍ୟ ବ୍ୟାଙ୍କରୁ ଋଣ ନେଇ ଖିଲାପୀ ଚାଷୀମାନଙ୍କ ପାଇଁ ଓଟିଏସ୍ (ୱାନ ଟାଇମ୍ ସେଟଲ୍ମେଣ୍ଟ ଟାଇମ୍) ସୁବିଧାରେ ଋଣମୁକ୍ତର ସୁଯୋଗ ଦିଆଯାଇଛି। ସମବାୟ କ୍ଷେତ୍ର ପ୍ରତି ସେଥିରେ ଅଣଦେଖା କରାଯାଇଥିବା ଯୋଗୁ ଚାଷୀ ଅସନ୍ତୋଷ ଦେଖାଯାଇଛି ଏବଂ ସମବାୟ କ୍ଷେତ୍ରର ଖିଲାପୀ ଚାଷୀଙ୍କ ପାଇଁ ମଧ୍ୟ ତୁରନ୍ତ ଓଟିଏସ୍ ବ୍ୟବସ୍ଥା କରିବାକୁ ଚାଷୀ ସଂଗଠନ ଦାବି କରିଛି। ସେହିପରି ପ୍ରତ୍ୟେକ ଗ୍ରାମରେ ମେଶିନ ମାଧ୍ୟମରେ ପୋଖରୀଗୁଡ଼ିକୁ ଗଭୀର କରିବାକୁ ଦାବି ହୋଇଛି। ଦାବିପତ୍ର ପ୍ରଦାନ ସମୟରେ ଚାଷୀ ସଂଗଠନ ସଭାପତି ଜୟକୃଷ୍ଣ ସାହୁ, ସମ୍ପାଦକ କିଶୋର ଦେବତା ପ୍ରମୁଖ ଉପସ୍ଥିତ ଥିଲେ।
Dharitri – Odisha’s No.1 Odia Daily
