ଛତ୍ରପୁର, ୨୩।୧୨(ଦିଲ୍ଲୀପ ସାମଲ): ଲଗାଣ ବର୍ଷା ହେତୁ ଖରିଫ ଧାନ ଫସଲ କ୍ଷୟକ୍ଷତିର ଭରଣା, ଧାନର ଏଫଏକ୍ୟୁ ମାନ କୋହଳ, ଟୋକେନ ଅବଧି ବର୍ଦ୍ଧିତ ଦାବି ନେଇ ସୋମବାର ଛତ୍ରପୁର ବ୍ଲକ ଅନ୍ତର୍ଗତ ପୋଟଲାମପୁର ଗ୍ରାମ ପଂଚାୟତର ବହୁ ଚାଷୀ ଏବଂ ଜନ ପ୍ରତିନିଧିମାନେ ଗଞ୍ଜାମ ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି।
ଏନେଇ ଏକ ସମ୍ବଳିତ ଦାବୀ ପତ୍ର ଗଞ୍ଜାମ ଜିଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳ (ରାଜସ୍ବ)ସୁଧାଂଶୁ କୁମାର ଭୋଇଙ୍କୁ ଭେଟି ପ୍ରଦାନ କରିଛନ୍ତି, ଏହା ସହିତ ଚାଷୀ ମାନଙ୍କର ବିଭିନ୍ନ ସମସ୍ୟା ସମ୍ପର୍କ ରେ ଅତିରିକ୍ତ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ, ଧାନ କ୍ଷୟକ୍ଷତିର ଆକଳନ କରି ତୁରନ୍ତ ଚାଷୀଙ୍କୁ ସହାୟତା ପ୍ରଦାନ କରାଯାଉ, ରବି ଫସଲ ଯଥା-ମୁଗ, ବିରି ଇତ୍ୟାଦି ନଷ୍ଟ ହେତୁ ପର୍ଯ୍ୟାପ୍ତ ବିହନ ଯୋଗାଇବା, ଧାନ କ୍ଷେତରେ ପାଣି ଜମିଥିବା ହେତୁ ଅମଳ ବିଳମ୍ବ ସକାଶେ ଟୋକେନ ଅବଧି ବୃଦ୍ଧି କରିବା, ଫସଲ ନଷ୍ଟ ହେତୁ ଧାନର ଏଫଏକ୍ୟୁ ମାନ କୋହଳ କରିବା ଏବଂ ଚଳିତବର୍ଷ ଧାନ ମଣ୍ଡିର ସୁବ୍ୟବସ୍ଥା ନ ଥିବା ଯୋଗୁ ପୂର୍ବ ବର୍ଷ ଭଳି ଧାନ କ୍ରୟ କରିବା ନେଇ ଉକ୍ତ ଦାବି ପତ୍ରରେ ଦର୍ଶାଇଛନ୍ତି। ଏହି ଦାବି ପତ୍ର ପ୍ରଦାନବେଳେ ପୋଟଲାମପୁର ସରପଞ୍ଚ ନିରଞ୍ଜନ ପ୍ରଧାନ, ସମିତି ସଭ୍ୟ ଶମ୍ଭୁନାଥ ସ୍ବାଇଁ, ଚାଷୀ ନେତା ସୀମାଞ୍ଚଳ ନାହାକ, ରାଜେନ୍ଦ୍ର ନାହାକ, କେ. ରାମାୟା, ଶତ୍ରୁଘ୍ନ ବିଶ୍ୱାଳ, ଗୋପାଳ ନାହାକ ଓ ଭାସ୍କର ସ୍ବାଇଁଙ୍କ ସମେତ ବହୁ ଚାଷୀମାନେ ଉପସ୍ଥିତ ଥିଲେ।
