ଭଞ୍ଜନଗର,୫।୧(ବାବୁଲା ପ୍ରଧାନ): ରାଜ୍ୟ ସରକାର ୨୦୦୨ରେ ପାଣି ପଞ୍ଚାୟତ ଗଠନ କରିଥିଲେ। ୨୦୦୩ରେ ଏହା କାର୍ଯ୍ୟକାରୀ ହୋଇଥିଲା। ପାଣି ପଞ୍ଚାୟତ ଗଠନର ମୂଳ ଲକ୍ଷ୍ୟ ଥିଲା କେନାଲ ଏବଂ ନଦୀରେ ଉପର ମୁଣ୍ଡରୁ ତଳ ମୁଣ୍ଡକୁ କିଭଳି ପାଣି ପହଞ୍ଚିବ, ଚାଷୀମାନଙ୍କ ବିକାଶ ହେବ। ଏଥିସହ ଭୂତଳ ଜଳସ୍ତର ବୃଦ୍ଧି, ପ୍ରତ୍ୟେକ ସଦସ୍ୟଙ୍କର ଅଧିକାର ଓ କର୍ତ୍ତବ୍ୟ ପ୍ରତି ସମ୍ମାନ ଦେଇ ଗଣତାନ୍ତ୍ରିକ ପଦ୍ଧତିରେ କାର୍ଯ୍ୟକରିବା। ସେମାନଙ୍କର ସଂଗଠନ ଗୁଡ଼ିକୁ କାର୍ଯ୍ୟକ୍ଷମ, ସବଳ ଓ ସୁଦୃଢ଼ କରିବା । ଦେୟ ଅସୁଲ କରିବା ଓ ସେମାନଙ୍କର ସମ୍ବଳକୁ ସମ୍ବନିତ ଉପାୟରେ ପୁଞ୍ଜିଲଗାଣ କରିବା ସହ ଦରକାରୀ, ଉତ୍ପାଦନକ୍ଷମ ଓ ଲାଭଜନକ ହେଲାଭଳି କାର୍ଯ୍ୟ କରିବା। ସରକାରଙ୍କ ବିଭିନ୍ନ ବିଭାଗ ତାହାର ଏଜେନ୍ସିଗୁଡ଼ିକ ସହିତ ଘନିଷ୍ଠ ସମନ୍ବୟ ରକ୍ଷାକରି କାର୍ଯ୍ୟ କରିବା ଉତ୍ପାଦନକ୍ଷମ ଭୂମି ଉପଯୋଗ ପଦ୍ଧତିକୁ ଅନୁସରଣ କରିବା। ମୃତ୍ତିକା କ୍ଷୟ ହେଉଥିବା ଅଞ୍ଚଳରେ ବୃକ୍ଷରୋପଣ ବ୍ୟବସ୍ଥା କାର୍ଯ୍ୟକାରୀ କରିବା ପ୍ରମୁଖ ଲକ୍ଷ୍ୟ ନେଇ ପାଣି ପଞ୍ଚାୟତ ଗଠନ ହୋଇଥିଲା । କିନ୍ତୁ ଅନେକ ଲକ୍ଷ୍ୟ ଆଜି ଯାଏ କାର୍ଯ୍ୟକାରୀ ହୋଇପାରିନାହିଁ । ଚାଷୀଙ୍କଠାରୁ ବିଭାଗୀୟ ଅଧିକାରୀମାନେ ଦୂରେଇ ଯାଉଛନ୍ତି। ପାଣି ପଞ୍ଚାୟତ ସଂଗଠନକୁ ଯେତିକି ସୁବିଧା ସୁଯୋଗ ଦିଆଯିବା କଥା ଦିଆଯାଉନାହିଁ। ତେଣୁ ପାଣି ପଞ୍ଚାୟତ ଗଠନ ହେବାର ଆଜକୁ ୨୩ ବର୍ଷ ବିତିଯାଇଥିଲେ ମଧ୍ୟ ଲକ୍ଷ୍ୟ ଠାରୁ ବହୁ ଦୂରରେ ରହିଯାଇଛି ପାଣି ପଞ୍ଚାୟତ ସଂଗଠନ। ଏହିଭଳି ପରିସ୍ଥିତିରେ ମଙ୍ଗଳବାର ଠାରୁ ଆସନ୍ତା ୨୦ ତାରିଖ ପର୍ଯ୍ୟନ୍ତ ରାଜ୍ୟରେ ପାଣି ପଞ୍ଚାୟତପକ୍ଷ ପାଳନ ହେବ। ଏଥିପାଇଁ ଜଳସମ୍ପଦ, କ୍ଷୁଦ୍ର ଜଳସେଚନ, କାଡ଼ା ପ୍ରମୁଖ ବିଭାଗ ପକ୍ଷରୁ ପାଣି ପଞ୍ଚାୟତପକ୍ଷ ପାଳନ ହେବ। ଏଥିପାଇଁ ସମସ୍ତ ବିଭାଗ ପକ୍ଷରୁ ପ୍ରସ୍ତୁତି ଚାଲିଛି। ରାଜ୍ୟରେ ହଜାର ହଜାର ପାଣି ପଞ୍ଚାୟତ ଗଠନ ହୋଇଛି। ପ୍ରତି ୩ ବର୍ଷକୁ ଥରେ ସେମାନଙ୍କ ନିର୍ବାଚନ ହୋଇଥାଏ। କିନ୍ତୁ ବିଭାଗୀୟ ଅବହେଳା, ଆଇନଗତ ପ୍ରମୁଖ କାରଣ ଯୋଗୁ ରାଜ୍ୟର ଅନେକ ପାଣି ପଞ୍ଚାୟତ ନିର୍ବାଚନ ବର୍ତ୍ତମାନ ସୁଧା ହୋଇନାହିଁ। ନିର୍ବାଚନ ନ ହେବା ଦ୍ବାରା ଉକ୍ତ ପାଣି ପଞ୍ଚାୟତ ଗୁଡ଼ିକ ଅଚଳ ହୋଇଅଛି । ପାଣି ପଞ୍ଚାୟତଗୁଡ଼ିକୁ ବିଗତ ସରକାର ଅନେକ ସୁବିଧା ସୁଯୋଗ ଦେବେ ବୋଲି ଅନେକ ଥର ପ୍ରତିଶ୍ରୁତି ଦେଇଥିଲେ। କିନ୍ତୁ ବିଗତ ସରକାର ତାହା ସଠିକ ଭାବେ କାର୍ଯ୍ୟକାରୀ କରିପାରିନଥିଲା। ଇତିମଧ୍ୟରେ ନୂଆଁ ସରକାର ଆସିଛି। ଚାଷୀମାନେ ନୂଆ ସରକାରଙ୍କ ଠାରୁ ଅନେକ ଆଶା ରଖିଛନ୍ତି। ତାହା ଆଗାମୀ ଦିନରେ କେତେଦୂର ସଫଳ ହେଉଛି ତାହାକୁ ନେଇ ଚାଷୀମାନେ ଅପେକ୍ଷା କରି ରହିଛନ୍ତି। ଏହିଭଳି ପରିସ୍ଥିତିରେ ଗଞ୍ଜାମ ଜିଲା ଭଞ୍ଜନଗର ଜଳସେଚନ ବିଭାଜନ କାର୍ଯ୍ୟାଳୟ ପକ୍ଷରୁ ମଧ୍ୟ ମଙ୍ଗଳବାର ବେଲଗୁଣ୍ଠା ବ୍ଲକ ମାଧବରିଡ଼ାଠାରେ ପାଣି ପଞ୍ଚାୟତ ପକ୍ଷ ଉଦ୍ଘାଟନ ଉତ୍ସବ ପାଳନ ହେବ। ଏଥିରେ ୫୫ ଟି ପାଣି ପଞ୍ଚାୟତର କର୍ମକର୍ତ୍ତା ଯୋଗ ଦେବାର କାର୍ଯ୍ୟକ୍ରମ ରହିଛି।
