ବୋଲଗଡ଼,୭ା୪(ଡି.ଏନ୍.ଏ.): ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ଅନ୍ତର୍ଗତ ଗୋପାଳପୁର ପଞ୍ଚାୟତର ଏକ ରାସ୍ତା କାମରେ ମିଥ୍ୟା ବିଲ୍ କରି ଅର୍ଥ ତୋସରପାତ କରାଯାଇଥିବା ନେଇ ନାରାୟଣୀପଡ଼ା ଗ୍ରାମବାସୀଙ୍କ ପକ୍ଷରୁ ଗତ ଫେବୃୟାରୀ ୧୨ରେ ଅଭିଯୋଗ ହୋଇଥିଲା। ତେବେ ଅଭିଯୋଗକୁ ପ୍ରାୟ ଦେଢ଼ ମାସ ବିତିଯାଇଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ। ଏନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଅଭିଯୋଗ ଅନୁଯାୟୀ, ନାରାୟଣୀପଡା ପୂର୍ତ୍ତ ବିଭାଗ ରାସ୍ତାଠାରୁ ଗୌଡ଼ପାଟଣା ପୂର୍ତ୍ତ ବିଭାଗ ସଂଯୋଗ ଆର୍ଡି ରାସ୍ତା ଉପରେ ନିର୍ମାଣ କାର୍ଯ୍ୟ ପାଇଁ ଟେଣ୍ଡର ହୋଇ କାର୍ଯ୍ୟ ଚାଲୁରହିଛି। ନିର୍ମାଣାଧୀନ ଆର୍ଡି ରାସ୍ତା ଉପରେ ଗୋପାଳପୁର ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଅନାବଶ୍ୟକ ମେଣ୍ଟାଲିଂ କରାଯାଇ ଅର୍ଥ ତୋସାରପାତ କରିବାର ଉଦ୍ୟମକୁ ଗ୍ରାମବାସୀ ପ୍ରତିବାଦ କରିଛନ୍ତି। ଏଥିସହ ପଞ୍ଚାୟତ ପକ୍ଷରୁ ବିଛାଯାଇଥିବା ମେଣ୍ଟାଲ ଗ୍ରାମବାସୀ ଜବତ କରିଛନ୍ତି। ଏହା ସତ୍ତ୍ବେ ମିଥ୍ୟା ବିଲ୍ କରି ୮ଲକ୍ଷ ଟଙ୍କା ଉଠାଇ ନେଇଥିବା ନେଇ ଗ୍ରାମବାସୀ ସ୍ଥାନୀୟ ବିଡିଓ, ଜିଲାପାଳ, ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକଙ୍କ ନିକଟରେ ଅଭିଯୋଗ କରିଥିଲେ। ତେବେ ଏହି ଅଭିଯୋଗକୁ ଦେଢ଼ ମାସ ବିତିଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ ବୋଲି ଗ୍ରାମବାସୀଙ୍କ ପକ୍ଷରୁ ପୂର୍ବତନ ସରପଞ୍ଚ ବ୍ରଜରାଜ ରାଉତ, ବିଜୟ କୁମାର ଚୌଧୁରୀ, ବାନାମ୍ବର ରାଉତ, ପ୍ରଶାନ୍ତ ବିଶ୍ବାଳ, ମାଧବ ରାଉତ, ପ୍ରଫୁଲ୍ଲ ପ୍ରମୁଖ କହିଛନ୍ତି। ନିର୍ମାଣାଧୀନ ଆର୍ଡି ରାସ୍ତା ପୂର୍ବରୁ ପଞ୍ଚାୟତ ଅଧୀନରେ ରହିଥିଲା, ତେଣୁ ଏମ୍ଜିଏନ୍ଆର୍ଇଜିଏସ୍ ଅର୍ଥ ବ୍ୟୟ ହୋଇଛି ବୋଲି ପଞ୍ଚାୟତର କେତେଜଣ କର୍ମଚାରୀ କହିଛନ୍ତି। ବୋଲଗଡ଼ ପଞ୍ଚାୟତ ସମିତି ଉକ୍ତ ରାସ୍ତାକୁ ୨୦୧୮ରୁ ଆର୍ଡି ବିଭାଗକୁ ହସ୍ତାନ୍ତର କରିସାରିଛି ବୋଲି ଗ୍ରାମବାସୀ କହିଛନ୍ତି। ଏନେଇ ଗ୍ରାମବାସୀ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ଅନ୍ୟପଟେ ଅଭିଯୋଗ ସମ୍ପର୍କରେ ଅବଗତ ଅଛି ବୋଲି ଗୋପାଳପୁରର ନୂତନ ସରପଞ୍ଚ ପ୍ରଦୀପ କୁମାର ବାରିକ କହିଛନ୍ତି। ଏନେଇ ସ୍ଥାନୀୟ ବିଡିଓ ଧୋବେଇ ନାୟକଙ୍କ ପ୍ରତିକ୍ରିୟା ମିଳିପାରି ନାହିଁ।
