ଉମରକୋଟ, ୩।୮(ସନ୍ତୋଷ ଶତପଥୀ): ନବରଙ୍ଗପୁର ଜିଲା ଉମରକୋଟ ବ୍ଲକ ଅଧୀନ କୋପେନା ଗ୍ରାମର ସାର ବ୍ୟବସାୟୀ ସୁଦେଇ ମାଳି ସ୍ଥାନୀୟ ଅଞ୍ଚଳ ଚାଷୀଙ୍କୁ ଡିଏପି ସାର ନାମରେ ଖାଲି ମାଟି ଓ ପଥର ଗୁଣ୍ଡ ବିକ୍ରି କରି ଠକିଥିବା ଚାଷୀ ଅଭିଯୋଗ କରିଛନ୍ତି। ନକଲି ସାରକୁ ଅସଲି ଦାମରେ ବିକ୍ରି କରାଯାଇଛି। କୁଇଣ୍ଟାଲ ପିଛା ୩୨୦୦ ଟଙ୍କାରେ ଚାଷୀଙ୍କ ଠାରୁ ହଜାର ହଜାର ଟଙ୍କା ଠକି ନେଇଛନ୍ତି। ସାର ବିକ୍ରି ପାଇଁ କୌଣସି ଲାଇସେନ୍ସ ନ ଥାଇ ସେ ଏହି ସାର ବିକ୍ରି କରୁଛନ୍ତି।
ମାସରେ ଧାନ,ମକା ବିହନ ଲଗାଇବା ଚାଷୀମାନେ ସୁଦେଇ ମାଳିଙ୍କଠାରୁ ଡିଏପି ସାର କିଣିଥିଲେ। ମକା ଗଛ ବଢ଼ିବାର ୧୫ରୁ ୨୦ ଦିନ ପରେ ଚାଷୀ ଉକ୍ତ ସାର ପକାଇବା ପରେ ସେଗୁଡ଼ିକ ଜମିରେ କେବଳ ପଡ଼ି ରହିଲା। ମାଟିରେ ମିଳେଇଲା ନାହିଁ। ନକଲି ସାର ବ୍ୟବହାର କରିଥିବାରୁ ଗଛ ନବଢ଼ି ମକା ଗଛ ହଳଦିଆ ହୋଇଯାଇଛି। ଯେଉଁ ଚାଷୀ ଅନ୍ୟ ଦୋକାନରୁ ଡିଏପି ଆଣି ବ୍ୟବହାର କରିଥିଲେ ସେମାନଙ୍କର ଧାନ ଓ ମକା ଭଲ ହୋଇଥିବା ଜାଣିବା ପରେ ଚାଷୀ ନକଲି ସାର କିଣି ଠକାମୀ ରେ ଶିକାର ହେଇଥିବା ଜାଣିଥିଲେ। ବୁଧବାର କପେନା, ବେହେଡା ଓ ଛତିଶଗଡ଼ର ତମରାଅଣ୍ଡ ଗ୍ରାମର ଶହଶହ ଚାଷୀ କୋପେନା ପଞ୍ଚାୟତ କାର୍ଯ୍ୟାଳୟକୁ ସାର ପ୍ୟାକେଟ ଧରି ସରପଞ୍ଚ କିଆବତି ଗଣ୍ଡ ଓ ପୁର୍ବତନ ସରପଞ୍ଚ ପର୍ଶୁରାମ ଗଣ୍ଡଙ୍କ ନିକଟରେ ଅଭିଯୋଗ କରିଛନ୍ତି। ପୂର୍ବରୁ ମଙ୍ଗଳବାର ବ୍ଲକ କୃଷି ଅଧିକାରୀ ନୀଳକଣ୍ଠ ପରିଡ଼ାଙ୍କୁ ମଧ୍ୟ ଅଭିଯୋଗ ସମ୍ପର୍କରେ ଜଣାଇଥିଲେ।
ଅଧିକାରୀ ଦୁଇ ଜଣ କର୍ମଚାରୀଙ୍କୁ ଘଟଣାସ୍ଥଳକୁ ପଠେଇ ଥିଲେ। ସେମାନେ ଗ୍ରାମବାସୀଙ୍କୁ ଲିଖିତ ଅଭିଯୋଗ ଦେବାକୁ କହିଥିଲେ। ଉକ୍ତ ସାର ଉମରକୋଟ ଜଣେ ବ୍ୟବସାୟୀଙ୍କଠାରୁ କିଣିଥିବା ନେଇ କୋପେନାର ବ୍ୟବସାୟୀ କହିଛନ୍ତି। ବଳକା ସାରକୁ କାହରିକୁ ବିକ୍ରୀ ନ କରିବାକୁ ଚାଷୀମାନେ ବ୍ୟବସାୟୀଙ୍କୁ ତାଗିଦ କରିଛନ୍ତି। ଦୀର୍ଘ ବର୍ଷ ହେଲା ବ୍ୟବସାୟୀ ଜଣଙ୍କ ବିନା ଲାଇସେନ୍ସରେ ସାର ବିକ୍ରୀ କରି ଆସୁଛନ୍ତି, କୃଷି ବିଭାଗ ଅଧିକାରୀମାନେ ଏହା କିପରି ଜାଣି ପାରଲେ ନାହିଁ ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ଘଟଣାକୁ ନେଇ ଅତିରିକ୍ତ କୃଷି ଜିଲା ଅଧିକାରୀ ଅଜୟ କୁମାର କରଙ୍କୁ ପଚାରିବାରୁ ଏ ବିଷୟରେ ଅବଗତ ନାହିଁ। ଅଳ୍ପ ଦିନ ହେଲା ଆସିଛି। ଗୁରୁବାର ଘଟଣା ସ୍ଥଳକୁ ଯାଇ ତଦନ୍ତ କରିବି ବୋଲି କହିଛନ୍ତି।
