ବଲାଙ୍ଗୀର ଅଫିସ, ୨୭।୩: ବଲାଙ୍ଗୀର ଡାକମଣ୍ଡଳର ବିଭିନ୍ନ ପଦବୀ ପାଇଁ ଆବେଦନ କରିଥିବା କିଛି ପ୍ରାର୍ଥୀଙ୍କ ଜାଲ ସାର୍ଟିଫିକେଟ ଧରାପଡିବା ପରେ ବଲାଙ୍ଗୀର ପୋଲିସ ସ୍ଥାନୀୟ ମିଶନ ପଡ଼ିଆ ସମ୍ମୁଖ ରିଲାଏନ୍ସ ଏଜୁକେଶନ କମ୍ପ୍ଳେକ୍ସରେ ଚଢାଉ କରିଥିଲା। ଚଢାଉ ବେଳେ ଅଧିକାରୀମାନେ କମ୍ପ୍ଳେକ୍ସରୁ ଶତାଧିକ ଜାଲ ସାର୍ଟିଫିକେଟ, ବିଭିନ୍ନ ଶିକ୍ଷାନୁଷ୍ଠାନର ୨୭ ଅଧିକାରୀଙ୍କ ଜାଲ ସିଲ ଓ ଷ୍ଟାମ୍ପ, ବିଭିନ୍ନ ରଙ୍ଗର ପ୍ରିଣ୍ଟର କଲର, ପ୍ରିଣ୍ଟର୍ସ ଓ ଜେରକ୍ସ ମେଶିନ, କମ୍ପ୍ୟୁଟର, ହାର୍ଡଡିକ୍ସ, ଡାଇରୀ ସହ ୩.୬୭ ଲକ୍ଷରୁ ଊର୍ଦ୍ଧ୍ୱ ଟଙ୍କା ଜବତ ହୋଇଛି। ଏପରିକି ବିଭିନ୍ନ ବିଶ୍ୱବିଦ୍ୟାଳୟ ଏବଂ ଶିକ୍ଷା ଅଧିକାରୀଙ୍କ ଅଫିସକୁ ଲେଖାଯାଇଥିବା ଚିଠି ଓ ଅନ୍ୟାନ୍ୟ ଡକ୍ୟୁମେଣ୍ଟ, ଲୋକଙ୍କ ଫଟୋ ଓ କାଗଜପତ୍ର ଜବତ କରାଯାଇଛି। ଏହି ଘଟଣାରେ ସମ୍ପୃକ୍ତ ବଲାଙ୍ଗୀର ପୋଲିସ ରିଲାଏନ୍ସ ଏଜୁକେଶନ କମ୍ପ୍ଳେକ୍ସର ମାଲିକ ମନୋଜ ମିଶ୍ର ଏବଂ ତାଙ୍କ ସହଯୋଗୀ ଆଲୋକ ଉଦ୍ଗତାଙ୍କ ସହ ୧୯ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ଗିରଫ ଅଭିଯୁକ୍ତଙ୍କୁ ପଚରାଉଚରା ପରେ ଅନେକ ସାଂଘାତିକ ତଥ୍ୟ ପୋଲିସ ହାତରେ ଲାଗିଛି । ବଲାଙ୍ଗୀର ଏସ୍ପି ନିତିନ କୁଶଲକର ଜାଲ ସାର୍ଟିଫିକେଟ କାରବାରାକୁ ଏକ ଜାତୀୟସ୍ତରର ସ୍କାମ୍ ବୋଲି ଉଲ୍ଲେଖ କରିଛନ୍ତି । ଏନେଇ ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିବା ସେ ସୋମବାର ଟାଉନ ଥାନାଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ରବିବାର ଅପରାହ୍ନରେ ସ୍ଥାନୀୟ ଭାରତୀୟ ଜୀବନ ବୀମା ନିଗମ ଅଫିସ ସମ୍ମୁଖ ଗଳି ରାସ୍ତାର ଥିବା କମ୍ପଭାଇ ଭୋକେଶନାଲ ଟ୍ରେନିଂ ଇଷ୍ଟିଚ୍ୟୁଟ୍(କେବିଭିଟିଆଇ)ରେ ପୋଲିସ ଟିମ ଚଢାଉ କରିଥିଲା।
ମାଜିଷ୍ଟ୍ରେଟ ତହସିଲଦାର ପୁଷ୍ପାଞ୍ଜଳି ପଣ୍ଡାଙ୍କ ଉପସ୍ଥିିତରେ ଏସ୍ଡିପିଓ ତୋଫାନ ବାଗ, ଟାଉନ ଥାନା ଆଇଆଇସି ବିଶ୍ୱଜିତ ମନବୋଧ, ସଦର ଥାନା ଆଇଆଇସି ଶ୍ରୀକାନ୍ତ ସାହୁ ଓ ଅନ୍ୟ ପୋଲିସ ଟିମ ସଂସ୍ଥା ଅଫିସରେ ଚଢାଉ କରି ବିଭିନ୍ନ କାଗଜପତ୍ର, ବ୍ୟାଙ୍କ ପାଶବୁକ, ପାସ୍ପୋର୍ଟ, ଷ୍ଟାମ୍ପ ଓ ସିଲ ଯାଞ୍ଚ କରିଥିଲେ । ଏହି ଚଢାଉ ସମୟରେ ଏହି ସଂସ୍ଥାର ମାଲିକ ଅନୁପସ୍ଥିତ ଥିଲେ ଓ କର୍ମଚାରୀମାନେ ଅଫିସ ଖୋଲିଥିଲେ। ରିଲାଏନ୍ସ କୋଚିଂ ସେଣ୍ଟରରୁ ବ୍ୟାପକ ସାର୍ଟିଫିକେଟ ଧରାପଡିବା ବେଳେ କମ୍ପଭାଇ ଭୋକେଶନାଲ ଟ୍ରେନିଂ ଇଷ୍ଟିଚ୍ୟୁଟ (କେବିଭିଟିଆଇ)ର ମଧ୍ୟ କିଛି ସାର୍ଟିଫିକେଟ ସେଠାରେ ଦେଖିବାକୁ ମିଳିଥିଲା । ଏହାପରେ ପୋଲିସ ପକ୍ଷରୁ ଚଢାଉ କରିଥିଲା। ଏଠାରୁ କ’ଣ ସବୁ ମିଳିଛି ପୋଲିସ କିଛି ବି କହିନାହିଁ । ସହରର ଅନ୍ୟ କିଛି ଶିକ୍ଷାନୁଷ୍ଠାନ, ସରକାରୀ ଅଫିସ ମଧ୍ୟ ଏହି ଜାଲ ସାର୍ଟିଫିକେଟ ସ୍କାମ ସ୍କେନରରେ ରହିଛନ୍ତି।
୩ଦିନ ଧରି ପୋଲିସ ପକ୍ଷରୁ କରାଯାଇଥିବା ଖୋଲତାଡରୁ ଏହା ଏକ ଜାତୀୟ ୟସ୍ତର ଜାଲ ସାର୍ଟିଫିକେଟ ସ୍କାମ ବୋଲି ସ୍ପଷ୍ଟ ହୋଇଛି । ବିଭିନ୍ନ ରାଜ୍ୟର ଅନେକ ଶିକ୍ଷାନୁଷ୍ଠାନରେ କିଛି କୋର୍ଡିନେଟର, ଦଲାଲ ସଙ୍ଗଠିତ ଭାବେ ଏହି ସ୍କାମ ଚଲାଉଥିବା ପ୍ରାରମ୍ଭିକ ତଦନ୍ତରୁ ସ୍ପଷ୍ଟ ହୋଇଛି । ବଲାଙ୍ଗୀର ଏସ୍ପି ନିତିନ କୁଶଲକରଙ୍କୁ ଏହି ସମ୍ପର୍କରେ ପଚରାଯିବାରୁ ଏଭଳି ସୂଚନା ଦେଇଛନ୍ତି । ଏସ୍ପି କୁଶଲକରଙ୍କ ନିର୍ଦ୍ଦେଶରେ ଗଠିତ ସ୍ବତନ୍ତ୍ର ଟିମ୍ ଜାଲ ସାର୍ଟିଫିକେଟ ଗୁମର ଖୋଲିବାକୁ ତନାଘନା ଚଲାଇଛନ୍ତି । ବଲାଙ୍ଗୀର ଡାକମଣ୍ଡଳ ଜାଲ ସାର୍ଟିଫିକେଟ ମାମଲାରେ ପୋଲିସ ଏଯାବତ ୨୧ ଜଣଙ୍କୁ ଅଟକ ରଖି ପଚରାଉଚରା କରୁଛି । ରିଲାଏନ୍ସ ଏଜୁକେଶନ କମ୍ପ୍ଳେକ୍ସର ମାଲିକ ମନୋଜ ମିଶ୍ର ଏବଂ ସହଯୋଗୀ ଆଲୋକ ଉଦ୍ଗାତାଙ୍କୁ ପଚରାଉଚରା କରୁଛି । ଅନ୍ୟ ଅଟକ ଯୁବତୀ, ଯୁବକଙ୍କଠାରୁ ମିଳିଥିବା ତଥ୍ୟରୁ ବିଭିନ୍ନ ପ୍ରଦେଶରେ ଥିବା ୪୧ଟି ସ୍କୁଲ, କଲେଜ ଏବଂ ବିଶ୍ୱବିଦ୍ୟାଳୟର ଜାଲ ସାର୍ଟିଫିକେଟ ଗୁମର ଧରାପଡିଛି।
