ନୂଆଦିଲ୍ଲୀ,୨୯।୬: କେନ୍ଦ୍ର ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ରବି ଶଙ୍କର ପ୍ରସାଦ ଓ ବିରୋଧୀ ଏମ୍ପି ଶଶି ଥରୁରଙ୍କ ଆକାଉଣ୍ଟକୁ କାହିଁକି ଲକ୍ କରାଯାଇଥିଲା? ମାଇକ୍ରୋବ୍ଲଗିଂ ପ୍ଲାଟଫର୍ମ ଟୁଇଟରକୁ ଉପରୋକ୍ତ ପ୍ରଶ୍ନ କରିଛି କଂଗ୍ରେସ ନେତା ଥରୁରଙ୍କ ନେତୃତ୍ୱାଧୀନ ସୂଚନା ଓ ପ୍ରଯୁକ୍ତିବିଦ୍ୟା ସମ୍ପର୍କୀତ ସଂସଦୀୟ କମିଟି। ଏହାର ଉତ୍ତର ରଖିବା ପାଇଁ ଟୁଇଟରକୁ ଦୁଇ ଦିନ ସମୟ ଦିଆଯାଇଛି। ଏଥି ସହ ସୋସିଆଲ ମିଡିଆ ପ୍ଲାଟଫର୍ମ ଫେସବୁକ ଓ ଗୁଗୁଲକୁ ଦେଶର ନୂଆ ଆଇଟି ଆଇନ ପାଳନ କରିବାକୁ ଦିଆଯାଇଛି ନିର୍ଦ୍ଦେଶ।
ଗତ ଶୁକ୍ରବାର ଆଇନ ମନ୍ତ୍ରୀଙ୍କ ଟୁଇଟର ଆକାଉଣ୍ଟକୁ ଏକ ଘଣ୍ଟା ପାଇଁ ଲକ୍ କରି ଦିଆଯାଇଥିଲା। ଆମେରିକାର ଡିଜିଟାଲ ମିଲେନିୟମ କପିରାଇଟ୍ ଆଇନ (ଡିଏମ୍ସିଏ) ଅଧୀନରେ କାର୍ଯ୍ୟାନୁଷ୍ଠାନ ନିଆଯାଇଥିବା ଦର୍ଶାଇଥିଲା ଟୁଇଟର। କଂଗ୍ରେସ ଏମ୍ପି ଥରୁରଙ୍କ ଭଳି ଅନ୍ୟ ନେତା ସମାନ ଅସୁବିଧାର ସମ୍ମୁଖୀନ ହୋଇଥିବା ଦାବି କରିଥିଲେ। କେଉଁ ନିୟମ ଆଧାରରେ ଉକ୍ତ ଦୁଇ ଆକାଉଣ୍ଟକୁ ଲକ୍ କରାଯାଇଥିଲା, ତାହାର ସମ୍ପୂର୍ଣ୍ଣ ତଥ୍ୟ ଟୁଇଟରଠାରୁ ମଗାଯାଇଛି।
