ରାଜନଗର,୨୦।୧୧(ଡି.ଏନ.ଏ.): ସରକାର ମହିଳା ସଶକ୍ତିକରଣ ପାଇଁ ପଞ୍ଚାୟତରେ ୫୦ ପ୍ରତିଶତ ମହିଳାଙ୍କ ପାଇଁ ସ୍ଥାନ ସଂରକ୍ଷଣ କରିଛନ୍ତି। ମାତ୍ର ପଞ୍ଚାୟତରେ ମହିଳା ସରପଞ୍ଚଙ୍କ ବଦଳରେ ଅଧିକାଂଶ ସ୍ଥାନରେ ତାଙ୍କ ସ୍ବାମୀମାନେ ରାଜ୍ କରୁଛନ୍ତି। ଦାୟିତ୍ୱରେ ଥିବା ନିର୍ବାହୀ ଅଧିକାରୀ ଓ ଅନ୍ୟ ସରକାରୀ କର୍ମଚାରୀ ସରପଞ୍ଚ ସ୍ବାମୀଙ୍କ ବୋଲ ନ ମାନିଲେ ଧମକଚମକ ଦେବା ସହ ଜୋର ଜବରଦସ୍ତ ଫାଇଲ ଛଡାଉଛନ୍ତି ଓ ମାଡ ମାରୁଛନ୍ତି। ରାଜନଗର ବ୍ଲକ ରାଜପୁର ପଞ୍ଚାୟତରୁ ଏପରି ଗୁରୁତର ଅଭିଯୋଗ ଆସିଛି ା
ସୂଚନା ଅନୁଯାୟୀ, ଶୁକ୍ରବାର ରାଜପୁର ପଞ୍ଚାୟତ କାର୍ଯ୍ୟାଳୟରେ ସରପଞ୍ଚ ରାଣୀ ମଞ୍ଜରୀ ସେଠୀଙ୍କ ପୌରୋହିତ୍ୟରେ ସମସ୍ତ ୱାର୍ଡସଭ୍ୟ, ସଭ୍ୟାଙ୍କୁ ନେଇ ବୈଠକ ଚାଲିଥିଲା। ଏହି ବୈଠକରେ ପଞ୍ଚାୟତ ନିର୍ବାହୀ ଅଧିକାରୀ ଗୁଣସିନ୍ଧୁ ମଣ୍ଡଳ ଥିଲେ। ହଠାତ୍ ସରପଞ୍ଚଙ୍କ ସ୍ବାମୀ ବସନ୍ତ ସେଠୀ ବୈଠକକୁ ଆସି ପଞ୍ଚାୟତର କେତେକ ଫାଇଲ ମାଗିଥିଲେ। ପଞ୍ଚାୟତ ନିର୍ବାହୀ ଅଧିକାରୀ ସରପଞ୍ଚଙ୍କ ଛଡା ଅନ୍ୟ କାହାରିକୁ ସେ ସରକାରୀ ଫାଇଲ ଦେଇ ପାରିବେ ନାହିଁ ବୋଲି କହିଥିଲେ। ସମସ୍ତ ୱାର୍ଡ ସଭ୍ୟାସଭ୍ୟଙ୍କ ଉପସ୍ଥିତିରେ ପଞ୍ଚାୟତ ନିର୍ବାହୀ ଅଧିକାରୀ ଫାଇଲ ଦେବା ପାଇଁ ମନା କରିଦେବାରୁ ସରପଞ୍ଚଙ୍କ ସ୍ବାମୀ ଉତ୍ତ୍ୟକ୍ତ ହୋଇ ପଞ୍ଚାୟତ ନିର୍ବାହୀ ଅଧିକାରୀଙ୍କୁ ଗାଳି ଗୁଲଜ କରିଥିଲେ। ଏହାପରେ ପଞ୍ଚାୟତ ନିର୍ବାହୀ ଅଧିକାରୀଙ୍କ ଠାରୁ ସମସ୍ତ ଫାଇଲ ସେ ଜୋର ଜବରଦସ୍ତ ଛଡାଇ ନେବା ସହ ତାଙ୍କୁ ଧକ୍କା ମାରିଥିଲେ। ଏପରି କି ତଣ୍ଟି ଚିପି ମାରି ଦେବାକୁ ଉଦ୍ୟମ କରିଥିଲେ। ଉପସ୍ଥିତ ଥିବା ୱାର୍ଡ ସଭ୍ୟାସଭ୍ୟମାନେ ନିର୍ବାହୀ ଅଧିକାରୀ ମଣ୍ଡଳଙ୍କୁ ଉଦ୍ଧାର କରିଥିବା ନେଇ ସେ ରାଜନଗର ଥାନାରେ ଲିଖିତ ଅଭିଯୋଗ କରିଛନ୍ତି। ଏ ନେଇ ରାଜନଗର ଥାନାରେ ଏକ ମାମଲା(ନଂ.୩୮୯/୨୨) ରୁଜୁ ହୋଇଛି। ଅପରପକ୍ଷେ ଶନିବାର ସରପଞ୍ଚ ରାଣୀ ମଞ୍ଜରୀ ସେଠୀ ତାଙ୍କୁ ନିର୍ବାହୀ ଅଧିକାରୀ କାର୍ଯ୍ୟ କରାଇ ଦେଉ ନ ଥିବା ଏବଂ ଜାତିଆଣ ଆକ୍ଷେପ କରିଥିବା ନେଇ ରାଜନଗର ଥାନାରେ ପାଲଟା ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ଥାନାରେ ଏକ ମାମଲା(ନଂ.୩୯୧/୨୨)ରେ ଏକ ମାମଲା ରୁଜୁ ହୋଇଛି ା
