ଛତ୍ରପୁର,୧୮ା୯(ସନ୍ତୋଷ ପାଢ଼ୀ): ଗଞ୍ଜାମ ଜିଲା ଆର୍ଯ୍ୟପଲ୍ଲୀ ମାଛଧରା ଜେଟି ମୁହାଣ ଖନନ କାର୍ଯ୍ୟ ଆରମ୍ଭ ହୋଇଛି। ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ ଓ ଗଞ୍ଜାମ ଜିଲାପାଳ ଭି. କୀର୍ତ୍ତିଭାସନ ଏହାର ଶୁଭାରମ୍ଭ କରିଥିଲେ। ଏହା ଫଳରେ ମତ୍ସ୍ୟଜୀବୀମାନଙ୍କ ୧୦ ବର୍ଷର ସଂଘର୍ଷ ବାସ୍ତବରେ ପରିଣତ ହେବାକୁ ଯାଉଛି। ଜେଟିର ମୁହାଣ ପୋତି ହୋଇଯାଇଥିବାରୁ ଡଙ୍ଗା ସମୁଦ୍ରକୁ ଯିବା ଆସିବାରେ ଅସୁବିଧା ହୋଇଆସୁଛି। ଫଳରେ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ମାଛ ମାରିବାକୁ ଯିବା ପାଇଁ ଅସୁବିଧା ହେଉଛି। ଗଞ୍ଜାମ ଜିଲା ପ୍ରଶାସନ ଓ ଛତ୍ରପୁର ବିଧାୟକପଙ୍କ ହସ୍ତକ୍ଷେପ ପରେ ମତ୍ସ୍ୟଜୀବୀମାନଙ୍କ ଡଙ୍ଗାର ଯାତାୟାତ ପାଇଁ ଆଦାନୀ ଗୋପାଳପୁର ବନ୍ଦର ପକ୍ଷରୁ ଅତ୍ୟାଧୁନିକ ଡ୍ରେଜିଂ ମେଶିନ ସ୍ଥାପନ ସହ ମୁହାଣ ଖନନ କାର୍ଯ୍ୟ ବିଧିବଦ୍ଧ ଭାବେ ଆରମ୍ଭ ହୋଇଛି। ଏହି ନେଦରଲାଣ୍ଡର ଆଧୁନିକ ଡ୍ରେଜିଂ ମେଶିନ ସାହା୍ୟରେ ମୁହାଣକୁ ଗଭୀର ସହ ପ୍ରଶସ୍ତ କରାଯିବ। ଏହା ଧାମରା ପୋର୍ଟରୁ ଅଣାଯାଇଛି ୨ ମାସ ମଧ୍ୟରେ ଏହି କାର୍ଯ୍ୟ ସରିବ ବୋଲି କୁହାଯାଇଛି। ଏହି ଡ୍ରେଜିଂ ବାଲିକୁ ଆର୍ଯ୍ୟପଲି ମେରାଇନ ଥାନା ନିକଟ ସମୁଦ୍ର କୂଳ ଲଂଘିଥିବା ସ୍ଥାନରେ ବ୍ୟବହାର କରାଯିବ। ଫଳରେ ସମୁଦ୍ର କୂଳ ସୁରକ୍ଷିତ ରହିବ ଏହି ପଦକ୍ଷେପ ଫଳରେ ମତ୍ସ୍ୟଜୀବୀମାନଙ୍କ ସମୁଦ୍ର ପଥ ସୁଗମ ହେବା ସହ ତାଙ୍କର ଜୀବନଜୀବିକାକୁ ଏକ ନୂଆ ଶକ୍ତି ମିଳିବ। ଏହି ମୁହାଣ ବାଲି ଦ୍ବାରା ପୋତି ହୋଇଯାଉଥିବାରୁ ୨୭ ଗାଁର ହଜାର ହଜାର ମତ୍ସ୍ୟଜୀବୀ ମାଛ ମାରିବାକୁ ଯିବା ଆସିବାରେ ବହୁ ଅସୁବିଧାର ସମ୍ମୁଖୀନ ହେଉଥିଲେ।
