କଟକ ଅଫିସ,୪ା୮:କଟକ ସେକେଣ୍ଡାରି ବୋର୍ଡ ହାଇସ୍କୁଲରେ ମାଟ୍ରିକ୍ ଅଫ୍ଲାଇନ ପରୀକ୍ଷା ପ୍ରଶ୍ନପତ୍ରକୁ ନେଇ ମଙ୍ଗଳବାର ବିଭ୍ରାଟ ଦେଖିବାକୁ ମିଳିଥିଲା। ଏହି ପରୀକ୍ଷା କେନ୍ଦ୍ରରେ ରେଗୁଲାର ପରୀକ୍ଷାର୍ଥୀଙ୍କୁ ଏକ୍ସ-ରେଗୁଲାର ପ୍ରଶ୍ନପତ୍ର ଓ ଏକ୍ସ-ରେଗୁଲାର ପରୀକ୍ଷାର୍ଥୀଙ୍କୁ ରେଗୁଲାର ପ୍ରଶ୍ନପତ୍ର ଦିଆଯାଇଥିଲା। ଫଳରେ ଏହାକୁ ନେଇ ସେଠାରେ ଉତ୍ତେଜନା ସୃଷ୍ଟି ହୋଇଥିଲା ।
ମିଳିଥିବା ସୂଚନାନୁଯାୟୀ, ପୂର୍ବାହ୍ନ ୧୦ଟାରେ ଏହି ପରୀକ୍ଷାକେନ୍ଦ୍ରରେ ରେଗୁଲାର ଓ ଏକ୍ସ-ରେଗୁଲାର ଛାତ୍ରୀଛାତ୍ରଙ୍କୁ ପ୍ରଶ୍ନପତ୍ର ଦିଆଯାଇଥିଲା। ଏହାର ୧୦ ମିନିଟ ପରେ ପ୍ରଶ୍ନପତ୍ର ଓଲଟପାଲଟ ହୋଇଥିବା ଛାତ୍ରୀଛାତ୍ର ଜାଣିବାକୁ ପାଇଥିଲେ। ଏ ନେଇ ସେମାନେ ପରୀକ୍ଷା ପରିଚାଳନା ଦାୟିତ୍ୱରେ ଥିବା ଶିକ୍ଷୟିତ୍ରୀଶିକ୍ଷକଙ୍କୁ ଜଣାଇଥିଲେ। ହେଲେ ସେମାନେ ଏହାକୁ କର୍ଣ୍ଣପାତ କରି ନ ଥିଲେ। ପରବର୍ତ୍ତୀ ସମୟରେ ଏହି ତ୍ରୁଟି ସମ୍ପର୍କରେ ଜାଣିବା ପରେ ପରୀକ୍ଷାକେନ୍ଦ୍ର ପରିଚାଳକ ସାଢେ ୧୧ଟାରେ ରେଗୁଲାର ଛାତ୍ରୀଛାତ୍ରଙ୍କଠାରୁ ଏକ୍ସ-ରେଗୁଲାର ପ୍ରଶ୍ନପତ୍ର ନେଇଯାଇଥିଲେ। ଫଳରେ ପ୍ରାୟ ଅଧଘଣ୍ଟା ଧରି ପରୀକ୍ଷାର୍ଥୀମାନେ ବସି ରହିଥିଲେ। ମଧ୍ୟାହ୍ନ ୧୨ଟାରେ ସେମାନଙ୍କୁ ଠିକ୍ ପ୍ରଶ୍ନପତ୍ର ଦିଆଯିବା ସହ ପରୀକ୍ଷା ପାଇଁ ଅଧିକ ୧ ଘଣ୍ଟା ସମୟ ଦିଆଯାଇଥିଲା। ପରେ ସେମାନେ ପରୀକ୍ଷା ଦେଇ ୧ଟାରେ ବାହାରକୁ ବାହାରିଥିଲେ। ଅନ୍ୟପକ୍ଷରେ ଏକ୍ସ-ରେଗୁଲାର ପରୀକ୍ଷାର୍ଥୀମାନେ ରେଗୁଲାର ପ୍ରଶ୍ନପତ୍ରରେ ଉତ୍ତର ଲେଖିଥିଲେ। ସେମାନଙ୍କୁ ପରୀକ୍ଷା ପାଇଁ ଅଧିକ ସମୟ ଦିଆଯାଇ ନ ଥିଲା। ଏ ସମ୍ପର୍କରେ ଜଣାପଡିବା ପରେ ଅଭିଭାବକମାନେ ସ୍କୁଲ ସମ୍ମୁଖରେ ହୋହଲ୍ଲା କରିଥିଲେ। ମଙ୍ଗଳାବାଗ ଥାନାଧିକାରୀ ଅମିତାଭ ମହାପାତ୍ର ଘଟଣାସ୍ଥଳରେ ପହଞ୍ଚି ଅଭିଭାବକଙ୍କୁ ବୁଝାଶୁଝା କରିଥିଲେ। ପରେ ଅଭିଭାବକମାନେ ଏଭଳି ବିଭ୍ରାଟକୁ ନେଇ ବୋର୍ଡ କର୍ତ୍ତୃପକ୍ଷଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି।
ଏ ସମ୍ପର୍କରେ ରେଗୁଲାର ପରୀକ୍ଷା ଦେଇଥିବା ଛାତ୍ରୀ ସୋନାଲି ପାତ୍ର କହିଛନ୍ତି, ପ୍ରଥମେ ମୋତେ ଏକ୍ସ-ରେଗୁଲାର ପ୍ରଶ୍ନପତ୍ର ଦିଆଯାଇଥିଲା। ପରୀକ୍ଷା ଆରମ୍ଭ ହେବାର ପ୍ରାୟ ଦେଢ ଘଣ୍ଟା ପରେ ମୋ ଠାରୁ ଏକ୍ସ-ରେଗୁଲାର ପ୍ରଶ୍ନପତ୍ର ନିଆଯାଇ ରେଗୁଲାର ପ୍ରଶ୍ନପତ୍ର ଦିଆଗଲା। ସେହିପରି ରେଗୁଲାର ଛାତ୍ର ମିହିର ପତ୍ରୀ କହିଛନ୍ତି, ମୁଁ ପ୍ରଥମେ ଏକ୍ସ-ରେଗୁଲାର ପ୍ରଶ୍ନପତ୍ର ପାଇ ଉତ୍ତର ଲେଖିଥିଲି। ଏହାପରେ ପ୍ରଶ୍ନପତ୍ର ବଦଳାଇ ଦିଆଯାଇଥିଲା। ପରେ ମୁଁ ରେଗୁଲାର ପ୍ରଶ୍ନପତ୍ର ଅନୁଯାୟୀ ଉତ୍ତର ଲେଖିଥିଲି। ଅନ୍ୟପକ୍ଷରେ ଏକ୍ସ-ରେଗୁଲାର ଛାତ୍ର ରଣଦ୍ୱୀପ ରାୟ କହିଛନ୍ତି, ପରୀକ୍ଷା ଆରମ୍ଭ ହେବାର ୧୫ ମିନିଟ ପରେ ମୁଁ ସାର୍ଙ୍କୁ ରେଗୁଲାର ପ୍ରଶ୍ନପତ୍ର ମିଳିଥିବା ସମ୍ପର୍କରେ ଜଣାଇଥିଲି। ହେଲେ ସାର୍ ମୋ କଥା ନ ଶୁଣି ଚୁପ୍ ବସି ପରୀକ୍ଷା ଦେବାକୁ କହିଥିଲେ। ଅବ୍ଜେକ୍ଟିଭ ଏବଂ ସବ୍ଜେକ୍ଟିଭ ଉଭୟ ପେପର ମୁଁ ରେଗୁଲାର ପ୍ରଶ୍ନ ପତ୍ରରୁ ଉତ୍ତର ଲେଖିଆସିଲି। ମୋତେ ଏକ୍ସ-ରେଗୁଲାର ପ୍ରଶ୍ନପତ୍ର ମିଳିନାହିଁ କି ମୁଁ ଦ୍ୱିତୀୟ ଥର ପରୀକ୍ଷା ଦେଇନାହିଁ। ତେବେ ଏନେଇ ସେକେଣ୍ଡାରୀ ବୋର୍ଡ ହାଇସ୍କୁଲ ପ୍ରିନ୍ସିପାଲ ଦିଲୀପ କୁମାର ବେହେରାଙ୍କୁ ପଚାରିବାରୁ ସେ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିଲେ।
