ଲକ୍ଷ୍ନୌ, ୯।୧୦: ଉତ୍ତର ପ୍ରଦେଶରେ ରାଜ୍ୟ ସଭା ନିର୍ବାଚନ ପାଇଁ ଟିକେଟ ନ ମିଳିବାରୁ ଅସନ୍ତୁଷ୍ଟ ହୋଇ ଭାରତୀୟ ଜନତା ପାର୍ଟିର ପୂର୍ବତନ MP ଧର୍ମେନ୍ଦ୍ର କଶ୍ୟପ ଦଳର ପ୍ରାଥମିକ ଓ ସକ୍ରିୟ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ଏହି ନିଷ୍ପତ୍ତି ହଠାତ୍ ନୁହେଁ, ବରଂ ରାଜ୍ୟ ସଭା ପ୍ରାର୍ଥୀ ତାଲିକା ପ୍ରକାଶ ପାଇବା ପରଠାରୁ ସେ ଦଳ ଉପରେ କ୍ଷୁବ୍ଧ ଥିଲେ। ସୋସିଆଲ ମିଡିଆରେ “ଟାଟା ବାଏ-ବାଏ” ଲେଖି ସେ ଆଗୁଆ ରାଜନୈତିକ ସଙ୍କେତ ଦେଇସାରିଥିଲେ। ବରେଲୀ ଜିଲାର ଆଁଓଲା ଲୋକ ସଭା ଆସନରୁ ଦୁଇଥରର MP ରହିସାରିଥିବା ଧର୍ମେନ୍ଦ୍ର ଅକ୍ଟୋବର ୭ରେ ଫେସବୁକରେ ଏକ ପୋଷ୍ଟ କରି ନିଜର ଅସନ୍ତୋଷ ପ୍ରକାଶ କରିଥିଲେ। ପୋଷ୍ଟରେ କୌଣସି ଦଳର ନାମ ନ ଲେଖିଥିଲେ ମଧ୍ୟ ତାଙ୍କର ମନୋଭାବ ସ୍ପଷ୍ଟ ହୋଇଯାଇଥିଲା। ରାଜ୍ୟରେ ଆଗାମୀ ବିଧାନସଭା ନିର୍ବାଚନ ପୂର୍ବରୁ ତାଙ୍କର ଏହି ଇସ୍ତଫା ଭାଜପା ପାଇଁ ଏକ ବଡ଼ ଝଟକା ଭାବେ ଦେଖାଯାଉଛି।
ଫେସବୁକ ମାଧ୍ୟମରେ ଇସ୍ତଫା ଘୋଷଣା କରି ଧର୍ମେନ୍ଦ୍ର କହିଛନ୍ତି ଯେ ଭାଜପାରେ ଦଳ ସହ ଭିତରଘାତ କରୁଥିବା ଏବଂ ଲୋକସଭା ନିର୍ବାଚନରେ ଦଳ ବିରୋଧରେ ଭୋଟ୍ ଦେଇ ଦଳକୁ ଦୁର୍ବଳ କରିଥିବା ନେତାଙ୍କୁ ଆଗଧାଡ଼ିରେ ସ୍ଥାନ ମିଳୁଛି। ଅପରପକ୍ଷରେ ପଛୁଆ ଓ ଅତି-ପଛୁଆ ସମାଜକୁ ଦଳରେ ଉଚିତ ସ୍ଥାନ ଓ ସମ୍ମାନ ମିଳୁନାହିଁ, ଯେଉଁଥିରେ ଆହାତ ହୋଇ ସେ ବିଜେପିରୁ ଇସ୍ତଫା ଦେଉଛନ୍ତି। ଧର୍ମେନ୍ଦ୍ର କଶ୍ୟପ ୨୦୧୪ ଲୋକସଭା ନିର୍ବାଚନରେ ପ୍ରଥମ ଥର ପାଇଁ ଆଁଓଲା ଆସନରୁ ବିଜୟୀ ହୋଇଥିଲେ ଏବଂ ୨୦୧୯ ନିର୍ବାଚନରେ ସେ କ୍ରମାଗତ ଦ୍ୱିତୀୟ ଥର ପାଇଁ ଜିତି ନିଜ ଆସନ ବଜାୟ ରଖିବାରେ ସଫଳ ହୋଇଥିଲେ। ତେବେ ୨୦୨୪ ଲୋକସଭା ନିର୍ବାଚନରେ ତାଙ୍କୁ ପରାଜୟର ସାମ୍ନା କରିବାକୁ ପଡ଼ିଥିଲା।
ଭାଜପା ରାଜ୍ୟସଭା ପାଇଁ ଘୋଷଣା କରିଥିବା ୮ ଜଣ ପ୍ରାର୍ଥୀଙ୍କ ମଧ୍ୟରୁ ୨ ଜଣଙ୍କୁ (ଧର୍ମପାଲ ସିଂହ ଓ ଶ୍ରୁତି ଗଙ୍ଗୱାର) ଧର୍ମେନ୍ଦ୍ର କଶ୍ୟପଙ୍କ ଅଞ୍ଚଳ ବରେଲୀରୁ ହିଁ ବାଛିଥିଲା। ଧର୍ମପାଲ ସିଂହ ଯୋଗୀ ସରକାରଙ୍କ କ୍ୟାବିନେଟ ମନ୍ତ୍ରୀ ଥିବା ବେଳେ ଶ୍ରୁତି ଗଙ୍ଗୱାର ହେଉଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ସନ୍ତୋଷ ଗଙ୍ଗୱାରଙ୍କ ଝିଅ। “ଟାଟା ବାଏ-ବାଏ” ପୋଷ୍ଟ ବିଷୟରେ ପଚରାଯିବାରୁ ସେ ସିଧାସଳଖ ପରବର୍ତ୍ତୀ ପଦକ୍ଷେପ କଥା କହିନଥିଲେ, କିନ୍ତୁ ଶାୟରୀ ଆବୃତ୍ତି କରି ସସପେନ୍ସ ବଢ଼ାଇ କହିଥିଲେ ଯେ, “ଆଁଖୋଁ ମେଁ ରହା, ଦିଲ୍ ମେଁ ଉତରକର ନହିଁ ଦେଖା… କଶ୍ତୀ କେ ମୁସାଫିର ନେ କଭୀ ସମନ୍ଦର ନହିଁ ଦେଖା।”
କେବଳ ଧର୍ମେନ୍ଦ୍ର କଶ୍ୟପ ନୁହଁନ୍ତି, ରାଜ୍ୟ ସଭା ଟିକେଟ ନ ମିଳିବାରୁ ପୂର୍ବତନ କେନ୍ଦ୍ରମନ୍ତ୍ରୀ ତଥା ମୋହନଲାଲଗଞ୍ଜର ପୂର୍ବତନ MP କୌଶଲ କିଶୋରଙ୍କ ପରିବାରରେ ମଧ୍ୟ ଅସନ୍ତୋଷ ପ୍ରକାଶ ପାଇଛି। ତାଙ୍କ ପୁଅ ବିକାଶ କିଶୋର, ଯିଏ ବର୍ତ୍ତମାନ ଭାଜପା ଅନୁସୂଚିତ ଜାତି ମୋର୍ଚ୍ଚାର ରାଜ୍ୟ ଉପସଭାପତି, ସୋସିଆଲ ମିଡିଆରେ ଲେଖିଛନ୍ତି ଯେ ଯେଉଁ ପରିବାରରେ ବାପା-ମା’ଙ୍କ ମାନ-ସମ୍ମାନ ନ ଥାଏ, ସେହି ପରିବାରରେ ରହିବା ଉଚିତ ନୁହେଁ। ୨୦୨୪ ଲୋକ ସଭା ନିର୍ବାଚନରେ କୌଶଲ କିଶୋର ପରାଜିତ ହୋଇଥିଲେ ଏବଂ ତାଙ୍କୁ ରାଜ୍ୟ ସଭା ପଠାଯିବ ବୋଲି ଚର୍ଚ୍ଚା ହେଉଥିଲା। ମାତ୍ର ଭାଜପା ଅବଧ ଅଞ୍ଚଳରୁ ପାସୀ ସମାଜର ପୂର୍ବତନ MP ପ୍ରିୟଙ୍କା ସିଂହ ରାୱତଙ୍କୁ ରାଜ୍ୟସଭା ପାଇଁ ପ୍ରାର୍ଥୀ କରିଥିଲା।