ନୂଆଦିଲ୍ଲୀ,୨୮।୧୨: ପୂର୍ବତନ କ୍ରିକେଟର ଦୀନେଶ ମୋଙ୍ଗିଆ ମଙ୍ଗଳବାର ଦିଲ୍ଲୀରେ ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି। ଏହି ସମୟରେ ଦଳର ନେତାମାନେ ତାଙ୍କୁ ସ୍ବାଗତ କରିଥିଲେ। ରାଜନୈତିକ ଇନିଂସ ବିଷୟରେ ମୋଙ୍ଗିଆ କହିଛନ୍ତି ଯେ, ମୁଁ ଭାରତୀୟ ଜନତା ପାର୍ଟିରେ ଯୋଗ ଦେଇ ପଞ୍ଜାବର ଲୋକଙ୍କ ସେବା କରିବାକୁ ଚାହୁଁଛି। ଦେଶର ବିକାଶ ପାଇଁ ଆଜି ଭାଜପାଠାରୁ ଭଲ ଦଳ ନାହିଁ।
ମୋଙ୍ଗିଆ ତାଙ୍କ କ୍ୟାରିୟରରେ ୫୭ଟି ଦିନିକିଆ ଏବଂ ଗୋଟିଏ ଟି -୨୦ ମ୍ୟାଚ ଖେଳିଥିଲେ। ଏଥିରେ ସେ ମୋଟ ୧୨୬୮ ରନ ସ୍କୋର କରିଥିଲେ। ୧୯୯୫-୯୬ ରେ ଡେବ୍ୟୁ କରିଥିବା ମୋଙ୍ଗିଆ ୨୦୦୨ରେ ଗୁଆହାଟୀରେ ଜିମ୍ବାୱେ ବିପକ୍ଷରେ ୧୫୯ରନ ସ୍କୋର କରି ଦଳରେ ନିଜର ଦାବିକୁ ଦୃଢ କରିଦେଇଥିଲେ। ୨୦୦୩ରେ ସୌରଭ ଗାଙ୍ଗୁଲିଙ୍କ ଅଧିନାୟକତ୍ୱରେ ବିଶ୍ୱକପ୍ର ଫାଇନାଲ ଖେଳିଥିଲେ। ମୋଙ୍ଗିଆଙ୍କୁ ଶେଷ ଥର ପାଇଁ ୨୦୦୭ରେ କ୍ରିକେଟ ପଡ଼ିଆରେ ପଞ୍ଜାବ ପାଇଁ ଖେଳୁଥିବା ଦେଖିବାକୁ ମିଳିଥିଲା। ୨୦୧୯ରେ, ୪୨ ବର୍ଷରେ ସେ ଅବସର ନେଇଥିଲେ।
