ନୂଆଦିଲ୍ଲୀ, ୨୧।୮ : ଦିଲ୍ଲୀର ନୂତନ ଅବକାରୀ ନୀତିକୁ ନେଇ ରାଜନୀତି ଜୋରଦାର ହେବାରେ ଲାଗିଛି। ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ କେନ୍ଦ୍ର ସରକାରଙ୍କୁ ଘେରିବା ଆରମ୍ଭ କରିଛନ୍ତି। ରବିବାର ସେ ଟୁଇଟ୍ କରି କହିଛନ୍ତି ଯେ ଯେଉଁ ସମୟରେ ସାଧାରଣ ଲୋକ ଦରଦାମ୍ ବୃଦ୍ଧି ସହିତ ଲଢୁଛନ୍ତି, ଯେତେବେଳେ କୋଟି କୋଟି ଯୁବକ ବେକାର ଅଛନ୍ତି, ଏପରିସ୍ଥଳେ କେନ୍ଦ୍ର ସରକାର ସମସ୍ତ ରାଜ୍ୟ ସରକାରଙ୍କ ସହ ବେକାରୀ ଏବଂ ଦରଦାମ ବିରୋଧରେ ଲଢ଼ିବା ଉଚିତ।
ମାତ୍ର କେନ୍ଦ୍ର ସରକାର ଏଭଳି ସମୟରେ ସମଗ୍ର ଦେଶ ସହିତ ଚଢ଼ାଉ ଲଢ଼େଇ ଜାରି ରଖିଛନ୍ତି। ପ୍ରତିଦିନ ସକାଳେ ସିବିଆଇ ଏବଂ ଇଡ଼ିର ନୂଆ ଖେଳ ଆରମ୍ଭ ହେଉଛି। ବିରୋଧୀ ଦଳର ରାଜନେତାଙ୍କୁ ଟାର୍ଗେଟ କରାଯାଉଛି। ଅଣଭାଜପା ଶାସିତ ରାଜ୍ୟରେ ସରକାରଙ୍କୁ କ୍ଷମତାଚ୍ୟୁତ କରାଯିବାର ଉଦ୍ୟମ ହେଉଛି। ଏଭଳି ଜାରି ରହିଲେ ଦେଶ କିପରି ଅଗ୍ରଗତି କରିବ? ଦେଶର ବିକାଶ କିପରି ସମ୍ଭବ ହେବ ବୋଲି ସେ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି।
