ବାଲେଶ୍ୱର ଅଫିସ, ୧୧ା୩ ବାଲେଶ୍ୱର ପୌରାଞ୍ଚଳର ୩ନଂ. ୱାର୍ଡରେ ବିଭିନ୍ନ ସମସ୍ୟା ଲାଗି ରହିଛି। ରାସ୍ତା ସମସ୍ୟା ପ୍ରମୁଖ। ଖରାଦିନେ ଯେନତେନ ପ୍ରକାରେ ଚଳିଯାଉଥିବା ବେଳେ ବର୍ଷା ହେଲେ କାମ ସରିଲା। ଲୋକଙ୍କୁ ଘରୁ ବାହାରିବାକୁ ହେଲେ ଆଣ୍ଠୁଏ ପାଣିରେ ପଶି ଯାତାୟାତ କରିବାକୁ ପଡିଥାଏ। ଏବେ ନିର୍ବାଚନ ସମୟ ଉପନୀତ ହୋଇଥିବାରୁ ଭୋଟରମାନେ ଏହାର ସମାଧାନ ଲାଗି ଜିଦ୍ ଧରିଛନ୍ତି। ସିଧାସଳଖ ସମସ୍ୟା ସମାଧାନ କରିପାରିବାର ପ୍ରତିଶ୍ରୁତି ପାଇବା ପରେ ପ୍ରାର୍ଥୀଙ୍କୁ ଭୋଟ୍ ଦେଇ ବିଜୟୀ କରାଇବେ ବୋଲି ଲୋକେ କହିଛନ୍ତି।
୩ନଂ. ୱାର୍ଡ଼ ସୁନହଟ୍, ନନ୍ଦସାହି, ମଳିକସାହି, ତିଗିରଣିଆ, ନିଚ୍ଚାପଦା, ଉଚ୍ଚାପଦା, ମୋହିନପଡ଼ିଆ, ଦେବାନୀପାଟଣା, ମସଜିଦ୍ ଓ ପାତ୍ରପଡ଼ାର କିଛି ଅଞ୍ଚଳକୁ ନେଇ ଗଠିତ। ଏଥିରେ ୪ହଜାର ୭୫ ଭୋଟର ରହିଛନ୍ତି। ରାସ୍ତା ପାଇଁ ଦୀର୍ଘଦିନ ଧରି ଦାବି ହେବା ପରେ କିଛିଦିନ ପୂର୍ବରୁ ପୌରପାଳିକା ପକ୍ଷରୁ ୱାର୍ଡ଼ର ଅନୀଲ କୁଇଲିଙ୍କ ଘରଠାରୁ ଉତ୍କଳ କେଶରୀ ମଲ୍ଲିକ ଓ ଅରୁଣ ପଣ୍ଡା ଏବଂ ଶିଦ୍ଧେଶ୍ୱର ଦେଙ୍କ ଘରଠାରୁ ଶରତ ମହାନ୍ତିଙ୍କ ଘର ପର୍ଯ୍ୟନ୍ତ ୩ଟି ରାସ୍ତା ଓ ଡ୍ରେନ୍ କାମ ପାଇଁ ୧୯ଲକ୍ଷ ୪ହଜାର ଟଙ୍କା ମଞ୍ଜୁର ହୋଇ ଫଳକ ଲାଗିଥିଲା। ହେଲେ ଦୁଇଟି ରାସ୍ତାର କାମ ଆରମ୍ଭ ହୋଇ ଅଧାପନ୍ତରିଆ ହୋଇପଡ଼ିଛି। ଆଉ ଗୋଟିଏ ରାସ୍ତାର କାମ ଆଜିଯାଏ ଆରମ୍ଭ ହୋଇନାହଁି। ଯେଉଁ ଦୁଇ ରାସ୍ତାର କାମ ଆରମ୍ଭ ହୋଇଛି ଏଥିରୁ ଆହୁରି ଅଧାରୁ ଅଧିକ କାମ ଅସମ୍ପୂର୍ଣ୍ଣ ହୋଇପଡ଼ିଛି। କାମ ହେବାକୁ ୪ମାସ ହୋଇନାହଁି, ହେଲେ ରାସ୍ତା ପାର୍ଶ୍ୱ ଫାଟିବା ସହ ଭାଙ୍ଗି ବି ଗଲାଣି। ଯେତିକି ରାସ୍ତା ହୋଇଛି ତାହା ନିମ୍ନମାନର ହୋଇଥିବା ଅଭିଯୋଗ ହୋଇଛି। ବଡ଼ କଥା ହେଲା, କାମ ସମ୍ପୂର୍ଣ୍ଣ ହୋଇ ନ ଥିବା ବେଳେ ଟଙ୍କା କିନ୍ତୁ ଉଠାଣ ସରିଥିବା ଜଣାଯାଇଛି। ସେହିପରି ଉକ୍ତ ସାହିରେ ୧୦ଲକ୍ଷ ଏବଂ ୫ଲକ୍ଷ ୮୭ହଜାର ଟଙ୍କାରେ ଆଉ ଦୁଇଟି ରାସ୍ତା କାମ ପାଇଁ ଟେଣ୍ଡର ହୋଇଛି। ହେଲେ ଆଜି ଯାଏ କାମ ଆରମ୍ଭ ହୋଇନାହଁି। ଅନ୍ୟପକ୍ଷରେ ୱାର୍ଡ଼ର କିଛି ଅଞ୍ଚଳ ସିଙ୍ଗଲ ଫେଜ୍ରେ ବିଦ୍ୟୁତ୍ ସଂଯୋଗ ହୋଇଥିବାରୁ ଲୋକେ ହଇରାଣ ହେଉଛନ୍ତି। ବିଦ୍ୟୁତ୍ ତାର ବିପଦସଙ୍କୁଳ ଅବସ୍ଥାରେ ଓହଳି ରହିଥିବା ୱାର୍ଡ଼ବାସୀ ବଂଶୀଧର ପ୍ରଧାନ କହିଛନ୍ତି। ସେହିପରି ୱାର୍ଡ଼ରେ ଅଧିକାଂଶ ଡ୍ରେନ୍ ଭାଙ୍ଗିରୁଜିଗଲାଣି। ପାଣି ନିଷ୍କାସନ ହୋଇପାରୁ ନ ଥିବାରୁ ବର୍ଷାଦିନେ ଅଞ୍ଚଳବାସୀ ବହୁ ହଇରାଣ ହେଉଛନ୍ତି। ବିଶେଷକରି ମଳିକସାହିର ଏମିତି ଏକ ଅଞ୍ଚଳ ରହିଛି ଯେଉଁଠି ବର୍ଷା ହେଲେ ଲୋକମାନେ ଆଣ୍ଠୁଏ ଉପରେ ପାଣିରେ ରାସ୍ତା ଉପରକୁ ଆସିଥାନ୍ତି ବୋଲି ସୀତାରାମ ମଳିକ ଅଭିଯୋଗ ଆଣିଛନ୍ତି। ସେମିତି ପୌରପାଳିକା ପକ୍ଷରୁ ନିୟମିତ ସଫେଇ କାର୍ଯ୍ୟ ମଧ୍ୟ ହେଉ ନ ଥିବା ଭବାନୀଶଙ୍କର ନାୟକ ଅଭିଯୋଗ କରିଛନ୍ତି। ଚଳିତ ପୌର ନିର୍ବାଚନରେ ସମସ୍ୟାଗୁଡ଼ିକର ସମାଧାନର ପ୍ରତିଶ୍ରୁତି ଯେଉଁ ପ୍ରାର୍ଥୀ ଦେବେ ତାଙ୍କୁ ଭୋଟ ଦେଇ ବିଜୟ କରିବା ନେଇ ୱାର୍ଡ଼ବାସୀ ଏକାଠି ହୋଇଛନ୍ତି।
