ନୂଆଦିଲ୍ଲୀ,୨।୨: ପାକିସ୍ତାନର ପୂର୍ବତନ ଅଲରାଉଣ୍ଡର ଶାହିଦ ଆଫ୍ରିଦି ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା। ସେ ଯେତେବେଳେ ପଡ଼ିଆକୁ ଆସନ୍ତି,ବୋଲରମାନଙ୍କୁ ଅଡୁଆରେ ପକାନ୍ତି। ଆଫ୍ରିଦି ଇନିଂସର ପ୍ରଥମ ବଲରୁ ବିସ୍ଫୋରକ ଖେଳିବା ଆରମ୍ଭ କରନ୍ତି।
କିନ୍ତୁ ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ପ୍ରଶଂସକମାନେ ଆଫ୍ରିଦିଙ୍କ ବିସ୍ଫୋରକ ଇନିଂସକୁ ବହୁତ ମିସ କରନ୍ତି। କିନ୍ତୁ ଆଜିକାଲି ପାକିସ୍ତାନରେ ଖେଳାଯାଉଥିବା ସିନ୍ଧ ପ୍ରିମିୟର ଲିଗ ଖେଳୁଛନ୍ତି ଆଫ୍ରିଦ। ଲିଗରେ ଆଫ୍ରିଦିଙ୍କର ସମାନ ପୁରୁଣା ଏବଂ ବିସ୍ଫୋରକ ଶୈଳୀ ଦେଖିବାକୁ ମିଳିଥିଲା ।
ଆଫ୍ରିଦି ଲିଗରେ ବେନାଜିରାବାଦ ରେଡ୍ସ ପାଇଁ ଖେଳୁଛନ୍ତି। ଟୁର୍ନାମେଣ୍ଟରେ ମିରପୁରଖାସ୍ ଟାଇଗର୍ସ ବିପକ୍ଷରେ ଖେଳାଯାଇଥିବା ମ୍ୟାଚରେ ଲାଲା ନାମରେ ଜଣାଶୁଣା ଶାହିଦ ଆଫ୍ରିଦି ୩୨ ବଲରେ ୫୦ ରନ୍ର ଚମତ୍କାର ଇନିଂସ ଖେଳିଥିଲେ। ତାଙ୍କର ଏହି ଇନିଂସରେ ୪ ଚୌକା ଓ ୪ ଛକା ସାମିଲ ଅଛି। ଏହି ଇନିଂସ ସହିତ ଆଫ୍ରିଦି ପ୍ରଶଂସକମାନଙ୍କୁ ତାଙ୍କର ପୁରୁଣା ଶୈଳୀ ବିଷୟରେ ମନେ ପକାଇଲେ।
ଆଫ୍ରିଦି, ମେ ୩୧, ୨୦୧୮ରେ ୱେଷ୍ଟଇଣ୍ଡିଜ ବିପକ୍ଷରେ ତାଙ୍କ କ୍ୟାରିୟରର ଶେଷ ଅନ୍ତର୍ଜାତୀୟ ମ୍ୟାଚ ଖେଳିଥିଲେ। କିନ୍ତୁ ଆଫ୍ରିଦି ଏହି ମ୍ୟାଚ ପାକିସ୍ତାନ ପାଇଁ ନୁହେଁ ବରଂ ଆଇସିସି ୱାଲର୍ଡ ଏକାଦଶ ପାଇଁ ଖେଳିଥିଲେ।
ଆଫ୍ରିଦି ପାକିସ୍ତାନ ପାଇଁ ତିନୋଟି ଫର୍ମାଟ ଖେଳିଥିଲେ। ସେ ୧୯୯୬ ରୁ ୨୦୧୮ମଧ୍ୟରେ ଅନ୍ତର୍ଜାତୀୟ କ୍ରିକେଟ ଖେଳିଥିଲେ। ସେ ତାଙ୍କ କ୍ୟାରିୟରରେ ୨୭ ଟେଷ୍ଟ, ୩୯୮ ଦିନିକିଆ ଏବଂ ୯୯ ଅନ୍ତର୍ଜାତୀୟ ଟି-୨୦ ମ୍ୟାଚ ଖେଳିଥିଲେ।
