ଚମ୍ପୁଆ, ୩୦।୬ (ଡି.ଏନ.ଏ.) – ଦୀର୍ଘ ୪୧ ବର୍ଷ ପରେବି ବିଦ୍ୟାଳୟକୁ ରାସ୍ତା ନ ଥିବା ପରିତାପର ବିଷୟ ପାଲଟିଛି। ଦେଶର ଭବିଷ୍ୟତ ନିର୍ମାଣ କରୁଥିବା ଏହି ବିଦ୍ୟାଳୟ ପ୍ରତି ନା ପଡୁଛି ଏନଏସିର ନଜର ନା ପଡୁଛି ଶିକ୍ଷାବିଭାଗର ନଜର। ସେଥିଲାଗି ଶିକ୍ଷକ ଠାରୁ ଆରମ୍ଭ କୁନି କୁନି ଛାତ୍ରୀଛାତ୍ର ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଚମ୍ପୁଆ ସହରର ମଧ୍ୟଭାଗରେ ଥିବା ବ୍ଲକ କଲୋନୀ ପ୍ରାଥମିକ ବିଦ୍ୟାଳୟ। ୧୯୭୯ ମସିହା ମେ’ ୨୨ ତାରିଖରେ ଏହି ବିଦ୍ୟାଳୟ ପ୍ରତିଷ୍ଠା ହୋଇଥିଲା। ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୩୮ ପିଲା ଏହି ବିଦ୍ୟାଳୟରେ ଅଧ୍ୟୟନ କରୁଛନ୍ତି। ବହୁ ଛାତ୍ରୀଛାତ୍ର ଏଠାରୁ ପାଠ ପଢ଼ି ଭଲ ମଣିଷ ହୋଇଛନ୍ତି। କିନ୍ତୁ ଭବିଷ୍ୟତ ଗଢ଼ୁଥିବା ଏହି ସ୍କୁଲ ବହୁ ବର୍ଷ ହେଲା ଅବହେଳିତ ଅବସ୍ଥାରେ ପଡ଼ିରହିଛି। ବିଦ୍ୟାଳୟ ପାଇଁ ଉନ୍ନତି ଅର୍ଥ ଆସୁଛି ମାତ୍ର ତାହା ବିଦ୍ୟାଳୟର କୌଣସି କାମରେ ଲାଗୁନାହିଁ। ଚମ୍ପୁଆ ପଞ୍ଚାୟତରୁ ଏନଏସି ହୋଇ ୫ ବର୍ଷ ପୂରଣ କରିବାକୁ ଗଲାଣି। ବିଦ୍ୟାଳୟର ଉଭୟ ପାର୍ଶ୍ୱରେ ପକ୍କା ସଡକ କରାଯାଇଛି। ମାତ୍ର ଏହା ବିଦ୍ୟାଳୟକୁ ସଂଯୋଗ କରାଯାଇ ନାହିଁ। ଏପରିକି ଏହି ବିଦ୍ୟାଳୟର ଅନତି ଦୂରରେ ବିଆରସିସି( ଗୋଷ୍ଠି ସାଧାନ କେନ୍ଦ୍ର) ରହିଛି। ସର୍ବ ଶିକ୍ଷା ଅଭିଯାନରେ ବିଭିନ୍ନ କାଯର୍ୟକ୍ରମ ଏଠାରେ ଅନୁଷ୍ଠିତ ହେଉଥିବା ବେଳେ ଶିକ୍ଷା ବିଭାଗର ବହୁ ଅଧିକାରୀ ଉକ୍ତ କେନ୍ଦ୍ରକୁ ଗସ୍ତ କରନ୍ତି। ମାତ୍ର ନିକଟରେ ଥିବା ଏହି ବିଦ୍ୟାଳୟ ପ୍ରତି କାହାର ଶୁଭ ନଜର ପଡୁ ନାହିଁ। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ଗୋବର୍ଦ୍ଧନ ନାଏକଙ୍କୁ ପଚାରିବାରୁ କହିଛନ୍ତି ଯେ, ବିଦ୍ୟାଳୟ ଉନ୍ନତି ଫଣ୍ଡରୁ ତୁରନ୍ତ ମୋରମ ପକାଯାଇ ରାସ୍ତା କରାଯିବା ପରେ ପକ୍କା ସଡକ ପାଇଁ ଏନଏସି ବିଭାଗକୁ ଚିଠି କରାଯିବ।
