ନୂଆଦିଲ୍ଲୀ,୬।୧: ଉତ୍ତରାଖଣ୍ଡର ଚାମୋଲି ଜିଲା ଅନ୍ତର୍ଗତ ଜୋଷୀମଠ ଅଞ୍ଚଳରେ ମାଟି ଦବିଛି। ଫଳରେ ଶହ ଶହ ଘରେ ଏବଂ ରାସ୍ତାରେ ବିପଜ୍ଜନକ ଫାଟ ସୃଷ୍ଟି ହୋଇଛି। ଜୋଷୀମଠରେ ମାଟି ଦବୁଥିବାରୁ ୫୬୦ରୁ ଊର୍ଦ୍ଧ୍ୱ ଘରେ ବଡ଼ ଧରଣର ଫାଟ ସୃଷ୍ଟି ହୋଇଛି। ୫୦ ପ୍ରତିଶତ ପରିବାର ରହୁଥିବା ଘରେ ବସବାସ କରିବା ବିପଜ୍ଜନକ ହୋଇପଡ଼ିଛି। ଏହାର ପ୍ରତିବାଦରେ ଜୋଷୀମଠରେ ବିକ୍ଷୋଭ ଜାରି ରହିଛି। ଅନ୍ୟପଟେ ଭୂସ୍ଖଳନ ଯୋଗୁ ଏକ ବିଲ୍ଡିଂ ଢଳିପଡ଼ିଛି। ଫଳରେ ସାରା ସହରରେ ଲୋକେ ଆତଙ୍କିତ ହୋଇପଡ଼ିଛନ୍ତି। ସେଠାରେ ବଡ଼ ଧରଣର ବିପର୍ଯ୍ୟୟ ସୃଷ୍ଟି ହେବାକୁ ଯାଉଥିବା ବେଳେ ପ୍ରଶାସନିକ ଉଦାସୀନତାକୁ ନେଇ ଶୁକ୍ରବାର ସହରରେ ବନ୍ଦ ପାଳନ କରାଯାଇଥିଲା। ପ୍ରଶାସନ କେତେକ ବାସିନ୍ଦାଙ୍କୁ ସ୍ଥାନାନ୍ତର କରିଛନ୍ତି। ବଦ୍ରିନାଥ ଏବଂ ହେମକୁଣ୍ଡ ସାହିବ ରାସ୍ତା ମଧ୍ୟରେ ରହିଥିବା ମୁଖ୍ୟ ସହର ଜୋଷୀମଠର ସମସ୍ତ ପ୍ରକଳ୍ପ କାର୍ଯ୍ୟକୁ ବନ୍ଦ ରଖାଯାଇଛି। ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଶୁକ୍ରବାର ଏକ ଉଚ୍ଚସ୍ତରୀୟ ବୈଠକ ଡାକି ସ୍ଥିତି ଅନୁଧ୍ୟାନ କରିଛନ୍ତି। ଏହି ବୈଠକରେ ଡିଜିପି, ଅତିରିକ୍ତ ମୁଖ୍ୟ ଶାସନ ସଚିବ, ଅତିରିକ୍ତ ସଚିବ ଏବଂ ବିପର୍ଯ୍ୟୟ ଅଧିକାରୀ ଉପସ୍ଥିତ ଥିଲେ। ଜୋଷୀମଠରୁ ଭିଡିଓ କନ୍ଫରେନ୍ସିଂ ଜରିଆରେ ଗଡ଼ଓ୍ବାଲ କମିଶନର ଓ ଜିଲାଅଧିକାରୀ ମଧ୍ୟ ବୈଠକରେ ସାମିଲ ହୋଇଥିଲେ। ଅନ୍ୟପଟେ ଶନିବାର ଧାମି ଜୋଷୀମଠ ପରିଦର୍ଶନ କରିବେ। ଭାଜପାର ଏକ ଟିମ୍ ମଧ୍ୟ ସେଠାକୁ ପଠାଯାଇଛି। ବିଶେଷଜ୍ଞ ଟିମ୍ ସ୍ଥିତି ଅନୁଧ୍ୟାନ କରିବାକୁ ଯାଉଛନ୍ତି।
